ବିବାହ ପ୍ରତ୍ୟେକ ଯୁବତୀଙ୍କ ପାଇଁ ସ୍ବତନ୍ତ୍ର ହୋଇଥାଏ। ମେକଅପ୍ଠାରୁ ଆରମ୍ଭ କରି ପ୍ରତ୍ୟେକ ଜିନିଷ ପସନ୍ଦର ହେବା ଦରକାର ବୋଲି କନ୍ୟାମାନେ ଚାହିଁଥାନ୍ତି। ଜିନିଷ ଯଦି ମନପସନ୍ଦର ନ ହେଲା ତେବେ କନ୍ୟା ମନରେ କଷ୍ଟ ହୁଏ। କିନ୍ତୁ ଜଣେ କନ୍ୟାଙ୍କର ବିବାହ ସମୟରେ ବାଜୁଥିବା ଗୀତ ପସନ୍ଦ ଆସିଲାନି ବୋଲି ରାଗି ପଞ୍ଚମ ହୋଇଗଲେ। ତାଙ୍କର ଏହି ଭିଡିଓ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେଉଛି।
ଭିଡିଓକୁ କନ୍ୟା ଶିବାନୀ ପପ୍ପଲ ନିଜେ ତାଙ୍କ ଇନ୍ଷ୍ଟାଗ୍ରାମରେ ଶେୟାର କରିଛନ୍ତି। ଏଥିରେ ସେ କ୍ୟାପଶନ ଲେଖିଛନ୍ତି, ମୁଁ ମଣ୍ଡପକୁ ଏଣ୍ଟ୍ରି କରିବା ସମୟରେ ବାଜୁଥିବା ଗୀତ ମୋର ପସନ୍ଦ ଆସି ନ ଥିଲା। କାରଣ ମୁଁ ଯେଉଁ ଗୀତ ବଜାଇବାକୁ କହିଥିଲି ତାହା ବାଜୁ ନ ଥିଲା। ଏଥିରେ ଅସନ୍ତୁଷ୍ଟ ହୋଇ କନ୍ୟାଙ୍କ ଗୋଡ଼ ଆଉ ମଣ୍ଡପକୁ ପଡ଼ିଲାନି। ଏହା ଦେଖି ସେଠାରେ ଉପସ୍ଥିତ ଥିବା ଲୋକେ ଆଶ୍ଚର୍ଯ୍ୟ ହୋଇଗଲେ।
ଭିଡିଓରେ ଦେଖିବାକୁ ମିଳିଛି କନ୍ୟା ଜଣକ କହୁଛନ୍ତି, ମୁଁ ଯେଉଁ ଗୀତ ବଜାଇବାକୁ କହିଥିଲା କାହିଁକି ସେ ଗୀତ ବାଜିଲାନି। ପରିବାର ଲୋକେ ତାଙ୍କୁ ବହୁତ ବୁଝାଇବାକୁ ଚେଷ୍ଟା କରୁଥିଲେ ମଧ୍ୟ ସେ କାହା କଥା ଶୁଣି ନ ଥିଲେ। ଏହି ଭିଡିଓକୁ ବର୍ତ୍ତମାନ ସୁଦ୍ଧା ୧ ଲକ୍ଷରୁ ଅଧିକ ଲୋକ ଦେଖିସାରିଛନ୍ତି। ଅନେକ ୟୁଜର ନିଜ ନିଜ ସୋସିଆଲ ମିଡିଆ ଆକାଉଣ୍ଟରେ ମଧ୍ୟ ଶେୟାର କରୁଥିବା ଦେଖିବାକୁ ମିଳିଛି।
