ନୂଆଦିଲ୍ଲୀ, ୧୧।୨- ଉତ୍ତରାଖଣ୍ଡ ଦଳର କୋଚ୍ ତଥା ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ଓ୍ବାସିମ ଜାଫରଙ୍କ ଉପରେ ଧର୍ମକୁ ଭିତ୍ତି କରି ଖେଳାଳିଙ୍କୁ ଚୟନ କରୁଥିବା ଅଭିଯୋଗ ଆଣିଥିଲା ଉତ୍ତରାଖଣ୍ଡ କ୍ରିକେଟ ଆସୋସିଏଶନ (ସିଏୟୁ)। ଏଭଳି ବିବାଦୀୟ ଅଭିଯୋଗ ପରେ କୋଚ୍ ପଦ ଛାଡ଼ିବା ସହ ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି ଜାଫର। ତାଙ୍କ ସମର୍ଥନରେ ପୂର୍ବତନ ଭାରତୀୟ ଅଧିନାୟକ ତଥା କୋଚ୍ ଓ କିମ୍ବଦନ୍ତୀ ସ୍ପିନର ଅନୀଲ କୁମ୍ବଲେ ବାହାରିଛନ୍ତି ।
‘ ଓ୍ବାସିମ ମୁଁ ତୁମ ସହ ଅଛି। ତୁମେ ଠିକ୍ କରିଛ। ଦୁର୍ଭାଗ୍ୟବଶତଃ ଖେଳାଳିମାନେ ତୁମ ମେଣ୍ଟରଶିପ ପାଇପାରିବେ ନାହିଁ ’ ବୋଲି ଟୁଇଟ୍ କରିଛନ୍ତି କୁମ୍ବଲେ।
ଦେଶ ପକ୍ଷରୁ ୩୧ ଟେଷ୍ଟ ଖେଳିଥିବା ୪୨ ବର୍ଷୀୟ ଜାଫର ଘରୋଇ କ୍ରିକେଟରେ କିମ୍ବଦନ୍ତୀ ଭାବେ ପରିଚିତ। ଧାର୍ମିକ ଦୃଷ୍ଟିକୋଣରୁ ମୋ ଉପରେ ଲଗାଯାଇଥିବା ଅଭିଯୋଗ ମୋତେ ଦୁଃଖ ଦେଇଛି। ମୁଁ ଇକବାଲ ଅବଦୁଲାଙ୍କୁ ଦଳର ଅଧିନାୟକ କରିବାକୁ ଚାହୁଁଥିବା ସେମାନେ ଅଭିଯୋଗ କରିଥିଲେ, ଯାହାକି ସମ୍ପୂର୍ଣ୍ଣ ଭିତ୍ତିହୀନ ବୋଲି ଏକ ଭର୍ଚୁଆଲ ଖବରଦାତା ସମ୍ମିଳନୀରେ ଜାଫର କହିଛନ୍ତି।