ବାରିପଦା ଅଫିସ,୨୯ା୧୨- ବହୁଚର୍ଚ୍ଚିତ ଶିମିଳିପାଳ ଅଭୟାରଣ୍ୟର ବାଘୁଣୀ ‘ଖଇରୀ’କୁ ପାଳିପୋଷି ବଡ଼ କରିଥିବା ନିହାର ନଳିନୀ ସ୍ବାଇଁ(୮୮)ଙ୍କର ମଙ୍ଗଳବାର ରାତି ୧ଟାରେ କଟକଠାରେ ପରଲୋକ ହୋଇଯାଇଛି। ଜୀବଜନ୍ତୁ ପ୍ରେମୀ ତଥା ଖଇରୀର ପାଳିତା ମା’ ଭାବେ ସେ ବେଶ୍ ପରିଚିତ ଥିଲେ। ସ୍ବାମୀ ସରୋଜ ରାଜ ଚୌଧୁରୀଙ୍କ ବିୟୋଗ ପରେ ସେ କଟକ ସିଦ୍ଧେଶ୍ୱର ସାହିସ୍ଥିତ ବୃଦ୍ଧାଶ୍ରମରେ ରହୁଥିଲେ।
୧୯୭୪ରେ ସରୋଜ ଯଶୀପୁରର ଡିଏଫ୍ଓ ଏବଂ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଥିଲେ। ସେହି ସମୟରେ ଖଇରୀ ନଦୀକୂଳରୁ ସେ ଉଦ୍ଧାର କରିଥିଲେ ଏକ ମହାବଳ ବାଘ ଛୁଆକୁ। ସେହିଦିନଠାରୁ ନଳିନୀ ଓ ତାଙ୍କ ସ୍ବାମୀ ସରୋଜ ତାକୁୁ ଅତି ଯନତ୍ର ସହ ଲାଳନପାଳନ କରି ତାର ନାମ ଖଇରୀ ଦେଇଥିଲେ। ଚୌଧୂରୀ ଦମ୍ପତି ନିଃସନ୍ତାନ ଥିବାରୁ ଖଇରୀକୁ ନିଜ ଝିଅ ଭଳି ପାଳିଥିଲେ। ମଣିଷ ସମାଜରେ ରହି ଖଇରୀ ମଧ୍ୟ ତା’ର ହିଂସ୍ର ସ୍ବଭାବ ଭୂଲି ଯାଇଥିଲା। ସେତେବେଳେ ଏହି ବାଘୁଣୀକୁ ନେଇ ଖୁବ୍ ଚର୍ଚ୍ଚା ହୋଇଥିଲା। ୭ବର୍ଷ ବୟସର ହୋଇଥିବା ବେଳେ ୧୯୮୧ରେ ଏକ ପାଗଳା କୁକୁର କାମୁଡ଼ାରେ ଖଇରୀର ମୃତ୍ୟୁ ଘଟିଥିଲା। ଖଇରୀର ମୃତ୍ୟୁ ପରେ ଦୁଃଖରେ ମ୍ରିୟମାଣ ସରୋଜଙ୍କ ସେହି ବର୍ଷ ପରଲୋକ ଘଟିଥିଲା। ସ୍ବାମୀଙ୍କୁ ହରାଇବା ପରେ ନଳିନୀ ବୃଦ୍ଧାଶ୍ରମରେ ରହୁଥିଲେ।
