ଅହମ୍ମଦାବାଦ,୫।୧୨: ଗୁଜରାଟ ବିଧାୟନସଭା ନିର୍ବାଚନ ପାଇଁ ସୋମବାର ଦ୍ୱିତୀୟ ପର୍ଯ୍ୟାୟ ମତଦାନ ଜାରି ରହିଛି।୧୪ଟି ଜିଲାରେ ୯୩ ବିଧାନସଭା ଆସନରେ ସକାଳ ୮ଟାରୁ ସନ୍ଧ୍ୟା ୫ଟା ୩୦ ପର୍ଯ୍ୟନ୍ତ ଭୋଟିଂ ପ୍ରକ୍ରିୟା ଜାରି ରହିଥିଲା। ସକାଳୁ ଲମ୍ବାଲାଇନ୍ରେ ଆସି ଲୋକମାନେ ନିଜର ମତଦାନ ସାବ୍ୟସ୍ତ କରୁଛନ୍ତି। ରାଜନୈତିକ ବ୍ୟବସ୍ଥାକୁ ସୁରୁଖୁରରେ ଚଳାଇବା ପାଇଁ ନିଜର ବହୁମୂଲ୍ୟ ଭୋଟର ମୂଲ୍ୟ କେତେ ତାହା ଭୋଟରଙ୍କୁ ବେଶ୍ ଭଲଭାବେ ଜଣା। ଇତିମଧ୍ୟରେ ନାଦିଆଦରେ ଏକ ଅନ୍ୟନ୍ୟ ଉଦାହରଣ ସୃଷ୍ଟି କରିଛନ୍ତି ଜଣେ ଭିନ୍ନକ୍ଷମ ବ୍ୟକ୍ତି। ସୂଚନା ମୁତାବକ, ଗୁଜରାଟ ନାଦିଆଦର ଖେଡାର ଅଙ୍କିତ ସୋନି ଅକ୍ଷମତା ସତ୍ତ୍ୱେ ଭୋଟ ଦେବାରେ ସକ୍ରିୟ ଅଂଶଗ୍ରହଣ କରିଥିଲେ। ସେ ନିଜ ପାଦର ଆଙ୍ଗୁଠିର ସହାୟତାରେ ଭୋଟ ଦେଇଥିବା ଦେଖିବାକୁ ମିଳିଛି। ଗଣମାଧ୍ୟମ ସହ ବାର୍ତ୍ତାଳାପ ସମୟରେ ଅଙ୍କିତ ସୋନି କହିଛନ୍ତି, ୨୦ବର୍ଷ ପୂର୍ବେ ଏକ ଦୁର୍ଘଟଣାରେ ସେ ଦୁଇ ହାତ ହରାଇଛନ୍ତି। କିନ୍ତୁ ତାହା ତାଙ୍କୁ ଭୋଟ ଦେବାରେ କେବେ ବି ଅଟକାଇପାରିନାହିଁ। ଏଥିସହ ସେ କହିଛନ୍ତି, ବର୍ତ୍ତମାନ ସେ ଭୋଟ ଦେବା ପାଇଁ ନିଜର ପାଦ ବ୍ୟବହାର କରୁଛନ୍ତି।
