ପ୍ୟାରିସ୍, ୨୩ା୯ (ପି.ଟି.)-ଭାରତର ଅଙ୍କିତା ରାଇନା ଫ୍ରେଞ୍ଚ ଓପନ୍ ମହିଳା ସିଙ୍ଗଲ୍ସ କ୍ୱାଲିଫାୟର୍ସ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ଏକ ସଂଘର୍ଷପୂର୍ଣ୍ଣ ମ୍ୟାଚରେ ସେ ସର୍ବୀୟାର ଜୋଭାନା ଜୋଭିଚ୍ଙ୍କୁ ୬-୪, ୪-୬, ୬-୪ ସେଟ୍ରେ ହରାଇ ଦେଇଛନ୍ତି। ଏହି ମ୍ୟାଚ ଦୀର୍ଘ ୨ଘଣ୍ଟା ୪୭ ମିନିଟ୍ ଧରି ଚାଲିଥିଲା ତେବେ ପ୍ରଥମ ଗ୍ରାଣ୍ଡସ୍ଲାମ ସିଙ୍ଗଲ୍ସ ମୁଖ୍ୟ ଡ୍ର’ ପାଇଁ ଯୋଗ୍ୟତା ହାସଲ କରିବା ଲାଗି ରାମକୁମାର ରମାନାଥନ ତାଙ୍କ ଉଦ୍ୟମରେ ଅସଫଳ ରହିଛନ୍ତି। ୧୯୮ ର଼୍ୟାଙ୍କିଙ୍ଗପ୍ରାପ୍ତ ଭାରତୀୟ ଡେଭିସ୍ କପ୍ ଖେଳାଳି କ୍ୱାଲିଫାଇଂ ପ୍ରଥମ ରାଉଣ୍ଡରେ ତାଙ୍କଠାରୁ ନିମ୍ନ ର଼୍ୟାଙ୍କିଙ୍ଗପ୍ରାପ୍ତ ଫ୍ରେଞ୍ଚ ଓ୍ବାଇଲ୍ଡ କାର୍ଡ ଟ୍ରିଷ୍ଟାନ୍ ଲାମାସିନେଙ୍କ (୨୬୮)ଠାରୁ ୫-୭, ୨-୬ ସେଟ୍ରେ ହାରିଯାଇଛନ୍ତି। ଏହି ମ୍ୟାଚ୍ ୧ ଘଣ୍ଟା ୨୭ ମିନିଟ୍ ଧରି ଚାଲିଥିଲା। ୨୫ ବର୍ଷୀୟ ରାମକୁମାର ୪ଥର ସର୍ଭିସ ସୁଯୋଗ ହାତଛଡ଼ା କରିଥିଲେ। ଦେଶର ଟପ୍ ସିଙ୍ଗଲ୍ସ ଖେଳାଳି ସୁମିତ ନାଗାଲ ପୂର୍ବରୁ ବିଦାୟ ନେଇ ସାରିଛନ୍ତି। ପୁରୁଷ ସିଙ୍ଗଲ୍ସ କ୍ୱାଲିଫାଇଂ ରାଉଣ୍ଡରେ ଏକମାତ୍ର ଭାରତୀୟ ଖେଳାଳି ଭାବେ ପ୍ରଜନେଶ ଗୁଣେଶ୍ୱରନ ତିଷ୍ଠି ରହିଛନ୍ତି। ଗ୍ରାଣ୍ଡସ୍ଲାମ ମୁଖ୍ୟ ଡ୍ର’ରେ ପ୍ରବେଶ କରିବା ଲାଗି ରାମକୁମାର ୨୦୧୫ରୁ ଚେଷ୍ଟା ଚଳାଇ ଆସିଛନ୍ତି। କିନ୍ତୁ ସେ ଏପର୍ଯ୍ୟନ୍ତ ସଫଳ ହୋଇ ପାରି ନାହାନ୍ତି। ୨୦୧୮ରେ ଅଷ୍ଟ୍ରଲିଆନ କ୍ୱାଲିଫାୟର୍ସରେ ସେ ତୃତୀୟ ରାଉଣ୍ଡକୁ ଉନ୍ନୀତ ହୋଇ ପାରିଥିଲେ।