ବ୍ୟାଙ୍କକ୍: ଥାଇଲାଣ୍ଡର ଟ୍ରାନ୍ସଜେଣ୍ଡର ମହିଳା ବ୍ୟବସାୟୀ ଆନେ ଜାକାପୋଙ୍ଗ ଜାକ୍ରାଜୁଟାଟିପ୍ ୨୦ ନିୟୁତ ଡଲାର ମୂଲ୍ୟରେ ମିସ୍ ୟୁନିଭର୍ସ ଅର୍ଗାନାଇଜେଶନ୍ କିଣି ଇତିହାସ ସୃଷ୍ଟି କରିଛନ୍ତି। ମିସ୍ ୟୁନିଭର୍ସିଟିର ପ୍ରତିଯୋଗିତାର ୭୧ ବର୍ଷ ମଧ୍ୟରେ ପ୍ରଥମ କରି ଜଣେ ମହିଳା ଏହି ଅର୍ଗାନାଇଜେଶନ୍ର ମାଲିକାଣୀ ହୋଇଛନ୍ତି। ଆନେଙ୍କ କମ୍ପାନୀ ଜେକେଏନ୍ ଗ୍ଲୋବାଲ୍ ଗ୍ରୁପ୍ ପ୍ରାରମ୍ଭିକ ସମୟରେ ଥାଇଲାଣ୍ଡରେ ପ୍ରୋଜେକ୍ଟ ରନ୍ଓ୍ବେ ଏବଂ ସାର୍କ ଟାଙ୍କ୍ କାର୍ଯ୍ୟକ୍ରମ ପ୍ରସାରଣ କରୁଥିଲା। ମିସ୍ ୟୁନିଭର୍ସ ଅର୍ଗାନାଇଜେଶନ୍ କିଣିବା ଆନେଙ୍କ ବ୍ୟବସାୟରେ ଅନେକ ବୃଦ୍ଧି ଘଟାଇବ ବୋଲି ସେ କହିଛନ୍ତି। ଇଣ୍ଟରନ୍ୟାଶନାଲ ମ୍ୟାନେଜ୍ମେଣ୍ଟ ଗ୍ରୁପ୍ ୨୦୧୫ରେ ଏହି ଅର୍ଗାନାଇଜେଶନ୍କୁ କିଣିଥିଲା। ଏହା ପୂର୍ବରୁ ଆମେରିକାର ପ୍ରାକ୍ପୂର୍ବ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିକଟରେ ୧୯୯୬ରୁ ୨୦୧୫ ପର୍ଯ୍ୟନ୍ତ ଏହାର ସହମାଲିକାନା ଥିଲା।
ଜେକେଏନ୍ ଗ୍ଲୋବାଲ୍ ଗ୍ରୁପ୍ ମାଲିକାନା ଅଧିକାର କରିବା ପରେ ପଉଲା ଶୁଗାର୍ଟ ଅର୍ଗାନାଇଜେଶନ୍ର କାର୍ଯ୍ୟକାରୀ ଅଧ୍ୟକ୍ଷ ରହିବା ସହ ଏମି ଇମେରିଚ୍ ଏହାର ସିଇଓ ପଦରେ ରହିଛନ୍ତି। ଆନେଙ୍କ କମ୍ପାନୀ ମିସ୍ ୟୁନିଭର୍ସ ଅର୍ଗାନାଇଜେଶନ କିଣିବା ଦ୍ୱାରା ସୁନ୍ଦରୀ ପ୍ରତିଯୋଗିତା କ୍ଷେତ୍ରରେ ଆସନ୍ତା ଦିନମାନଙ୍କରେ ଅଧିକରୁ ଅଧିକ ଉନ୍ନତି ଓ ନୂଆ ଜିନିଷ ଦେଖିବାକୁ ମିଳିବ ବୋଲି ଏଣ୍ଡଇଭୋର କମ୍ପାନୀ ସଭାପତି ମାର୍କ ଶାପିରୋ କହିଛନ୍ତି।
ଆନେ ଜଣେ ଟ୍ରାନ୍ସଜେଣ୍ଡର ମହିଳା ହୋଇଥିବାବେଳେ ସେ ନିଜ ସମ୍ପର୍କରେ ସବୁବେଳେ ସ୍ପଷ୍ଟ ମନ୍ତବ୍ୟ ରଖିଥାନ୍ତି। ଏଥିସହ ଟ୍ରାନ୍ସେଜେଣ୍ଡରଙ୍କ ଅଧିକାର ଓ ହିତ ସାଧନ ପାଇଁ ସେ ସବୁବେଳେ ସ୍ବର ଉତ୍ତୋଳନ କରିଥାନ୍ତି। ଅନେକ ଟ୍ରାନ୍ସଜେଣ୍ଡର ଆନେଙ୍କୁ ନିଜ ପ୍ରେରଣା ବୋଲି ଭାବିଥାନ୍ତି।