ଯାଜପୁର ଅଫିସ,୬ା୧: ରାଜ୍ୟରେ ବିଦ୍ୟୁତ୍ କାଟ୍ ହେବ ନାହିଁ ବୋଲି ସରକାର ଘୋଷଣା କରିଛନ୍ତି । ହେଲେ ଅଘୋଷିତ ବିଦ୍ୟୁତ୍ କାଟ୍କୁ ମନା କରିନାହାନ୍ତି। ସେଥିଲାଗି ଗୁରୁବାର ସକାଳ ୮ଟାରୁ ରାତି ସାଢେ ୭ଟା ପର୍ଯ୍ୟନ୍ତ ଯାଜପୁର ରୋଡ ସହର ସମେତ ପାଣିକୋଇଲି, କୋରେଇ, କୁଆଖିଆ ଆଦି ବିଭିନ୍ନ ଅଞ୍ଚଳରେ ବିଦ୍ୟୁତ୍ କାଟ ହୋଇଛି। ପୂର୍ବରୁ ରକ୍ଷଣାବେକ୍ଷଣ ନାମରେ ସକାଳ ୮ଟାରୁ ଅପରାହ୍ନ ୫ଟା ପର୍ଯ୍ୟନ୍ତ ବିଦ୍ୟୁତ୍ କାଟ୍ ହେବ ବୋଲି ଘୋଷଣା କରାଯାଇଥିଲା। ତେବେ ଘୋଷଣା ଅନୁସାରେ ୫ଟାରେ ବିଦ୍ୟୁତ୍ ସରବରାହ ନ ହୋଇ ୧ ଘଣ୍ଟା ପରେ ୬ଟାରେ ବିଦ୍ୟୁତ୍ ଆସିଥିଲା। ମାତ୍ର ୪୦ ମିନିଟ୍ ବିଦ୍ୟୁତ୍ ସରବରାହ ତିଷ୍ଠି ରହିବା ପରେ ପୁଣି ୬ଟା ୪୦ରେ ହଠାତ୍ ବିଦ୍ୟୁତ୍ ଚାଲିଯାଇଥିଲା ା ଏହାର ପ୍ରାୟ ୧ ଘଣ୍ଟା ପରେ ପୁଣି ବିଦ୍ୟୁତ୍ ସଂଯୋଗ ହୋଇଥିଲା। ଏ ସଂକ୍ରାନ୍ତରେ ବିଦ୍ୟୁତ୍ ବିଭାଗୀୟ ଅଧିକାରୀ ମଧ୍ୟ ସନ୍ତୋଷଜନକ ଉତ୍ତର ଦେଇ ପାରି ନ ଥିଲେ। ଦିନତମାମ ପ୍ରାୟ ୩୦ ଲକ୍ଷ ଉପଭୋକ୍ତା ହଇରାଣ ହୋଇଥିଲେ। ବିଜୁଳି ଆସିବାପରେ ଆଶ୍ୱସ୍ତ ହେଉଥିବାବେଳେ ରକ୍ଷଣାବେକ୍ଷଣ ହେବା ପରେ ବି ପୁଣି ବିନା ଘୋଷଣାରେ କେଉଁ କାରଣରୁ ବିଦ୍ୟୁତ୍ କାଟ୍ ହେଲା ବୋଲି ଉପଭୋକ୍ତାମାନେ ପ୍ରଶ୍ନ ଉଠାଇଛନ୍ତି। ଯାଜପୁର ରୋଡ ସହରର ଧବଳଗିରିରେ ଥିବା ୧୩୨/୩୩ କେଭି ଗ୍ରୀଡ ଅଧିକାରୀଙ୍କ ଖାମଖିଆଲି ମନୋଭାବ ଏବଂ ପରିଚାଳନାରେ ଅବ୍ୟବସ୍ଥା ଯୋଗୁ ଏଭଳି ପରିସ୍ଥିତି ସୃଷ୍ଟି ହୋଇଥିଲା । ଏହାସହ ଉକ୍ତ ଗ୍ରୀଡ୍ର କେତେଜଣ କର୍ମଚାରୀ ଅସାଧୁ ଉପାୟରେ ବିଦ୍ୟୁତ୍ ବଣ୍ଟନ କରି ଧରାପଡିଥିବାରୁ ତାଙ୍କ ଉପରେ ଜରିମାନା ହୋଇଥିଲା। ଟାଟା ପାୱାର କମ୍ପାନୀ ଉପରେ ରାଗ ଶୁଝାଇବାକୁ ଯାଇ ସହରବାସୀ ନୟାନ୍ତ ହେଉଛନ୍ତି ବୋଲି ସହରରେ ଆଲୋଚନା ହେଉଛି।
ଓଡ଼ିଶା ସରକାର ରାଜ୍ୟର ବିଦ୍ୟୁତ୍ ଉପଭୋକ୍ତାମାନଙ୍କୁ ଉପଯୁକ୍ତ ସେବା ଯୋଗାଇ ଦେବା ପାଇଁ ଏହି ବ୍ୟବସ୍ଥାର ସଂସ୍କାର ଏବଂ ପରିଚାଳନା ରାଜ୍ୟ ବିଦ୍ୟୁତ୍ ବୋର୍ଡ ହାତରୁ ନେଇ ୱେସ୍କୋ, ନେସ୍କୋ ଆଦି କମ୍ପାନୀକୁ ଅର୍ପଣ କରାଯାଇଥିଲା। କଥାକଥିତ ବିଦ୍ୟୁତ୍ ସଂସ୍କାରକୁ ଦୀର୍ଘବର୍ଷ ବିତିଯାଇଥିଲେ ମଧ୍ୟ ଉପଭୋକ୍ତାମାନେ ବିଦ୍ୟୁତ୍ ସେବା ଠିକ୍ ଭାବେ ପାଇ ନ ପାରିବାରୁ ଗତ କିଛି ମାସ ହେବ ଟାଟା ପାୱାରକୁ ଦାୟିତ୍ୱ ହସ୍ତାନ୍ତର କରାଯାଇଛି। ହେଲେ ଅଷୋଘିତ ବିଦ୍ୟୁତ କାଟ, ଲୋଡ ଫେକ୍ଟର ଆଦି ନାନାବିଧ ସମସ୍ୟା ଭିତରେ ଉପଭୋକ୍ତାମାନେ ଅଣନିଃଶ୍ୱାସୀ ହୋଇପଡୁଥିଲେ ମଧ୍ୟ ଟାଟା ପାୱାର ଏହାର ନିରାକରଣରେ ଏଯାଏ ସମ୍ପୂର୍ଣ୍ଣ ବିଫଳ ହୋଇଛି । କ୍ରମବର୍ଦ୍ଦିଷ୍ଣୁ ଯାଜପୁର ରୋଡ ସହରର ବିଦ୍ୟୁତ ସରବରାହ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡିଛି। ପ୍ରତ୍ୟହ ସହରର କୌଣସି ନା କୌଣସି ଅଞ୍ଚଳକୁ ବିଦ୍ୟୁତ୍ ଯୋଗାଣ ବ୍ୟାହତ ହେଉଛି । ଏପରିକି ପର୍ବପର୍ବାଣୀ ଓ ଆଇନଶୃଙ୍ଖଳା ଦୃଷ୍ଟିରୁ ସମ୍ବେଦନଶୀଳ ଦିନରେ ମଧ୍ୟ ବିଦ୍ୟୁତ୍ ଯୋଗାଣ ବ୍ୟାହତ ହେଉଛି । ଏହାବାଦ୍ ଜିଲାର ଆଭ୍ୟନ୍ତରୀଣ ଅଞ୍ଚଳରେ ବିଦ୍ୟୁତ୍ ସେବା କଥା ନ କହିବା ଭଲ ବୋଲି ସାଧାରଣରେ ଚର୍ଚ୍ଚା ହେଉଛି। ଏ ସଂକ୍ରାନ୍ତରେ ଧବଳଗିରି ଗ୍ରୀଡ୍ର ଏସ୍ଡିଓ ରାଜୀବଲୋଚନ ସାହୁଙ୍କୁ ପଚାରିବାରୁ କୌଣସି ଉତ୍ତର ନ ଦେଇ କେବଳ ନିଜର ଦାୟିତ୍ୱ ଖସାଇ ଡିଷ୍ଟ୍ରିବ୍ୟୁଶନ ଅଧିକାରୀଙ୍କୁ ପଚାର ବୋଲି କହିଥିଲେ।