ଢେଙ୍କାନାଳ ଅଫିସ,୭।୪: ‘ମାନବ ସେବା ହିଁ ମାଧବ ସେବା’। ଏହି ଉକ୍ତିକୁ ଯଥାର୍ଥରେ ପ୍ରତିପାଦନ କରିଛନ୍ତି ଢେଙ୍କାନାଳର ଯୁବ ସାମାଜିକ କର୍ମୀ ତଥା ସାମାଜିକ ସାଂସ୍କୃତିକ ବିକାଶ ସଂଘର ସମ୍ପାଦିକା ଅନନ୍ୟା ଦାସ। ନିରାଶ୍ରୟଙ୍କୁ ସହାୟତା ଯୋଗାଇ ଦେବା, ବିପଦରେ ପଡ଼ିଥିବା ଲୋକଙ୍କୁ ଯଥାସମ୍ଭବ ସାହାଯ୍ୟ କରିବା, ଦୁର୍ଗମ ଅଞ୍ଚଳର ସମସ୍ୟା ପ୍ରଶାସନର ଦୃଷ୍ଟିକୁ ଆଣିବା ଭଳି ମହତ୍ କାର୍ଯ୍ୟ କରି ଖୁବ୍ କର୍ମଦିନରେ ସେ ଚର୍ଚ୍ଚିତ ଚେହେରା ପାଲଟିଛନ୍ତି।
ଗଁଦିଆ ବ୍ଲକର ଦୁର୍ଗମ ଆଦିବାସୀ ଅଞ୍ଚଳର ପିଲାଙ୍କ ହାତରେ ଶିକ୍ଷାର ମଶାଲ ଧରାଇବାକୁ ପଣ କରିଛନ୍ତି ଅନନ୍ୟା। ନିଜ ଅନୁଷ୍ଠାନ ସହାୟତାରେ ସେ ନିୟମିତ ଅପହଞ୍ଚ ଇଲାକାରେ ପହଞ୍ଚତ୍ ଛାତ୍ରୀଛାତ୍ରଙ୍କୁ ପାଠ୍ୟପୁସ୍ତକ, ଆବଶ୍ୟକ ଉପକରଣ ଏବଂ ପୋଷାକ ପ୍ରଦାନ କରୁଛନ୍ତି। ଲୋକଙ୍କ ସହ ଆଲୋଚନା କରି ସେମାନେ ଦୈନନ୍ଦିନ ଜୀବନରେ ଭୋଗୁଥିବା ସମସ୍ୟା ସମ୍ପର୍କରେ ପ୍ରଶାସନକୁ ଅବଗତ କରାଇ ସମାଧାନର ରାସ୍ତା ବାହାର କରୁଛନ୍ତି। ତାଙ୍କ ଉଦ୍ୟମରେ ଗ୍ରାମାଞ୍ଚଳରେ ବହୁ ଦିବ୍ୟାଙ୍ଗ ଛାତ୍ରୀଛାତ୍ର ହୁଇଲ୍ ଚେୟାର ପାଇପାରିଛନ୍ତି। ମାନସିକ ରୋଗୀ, ସ୍ବଳ୍ପ ଶିକ୍ଷିତ ବ୍ୟକ୍ତିଙ୍କ ଆଧାରକାର୍ଡ କରାଇଦେବା, ଦୁର୍ଘଟଣାରେ ଗୁରୁତରଙ୍କୁ ଡାକ୍ତରଖାନାରେ ପହଞ୍ଚାଇବା ଏବଂ ଆର୍ଥିକ ସହାୟତା ପ୍ରଦାନ କରିବାରେ ସେ ସର୍ବଦା ତତ୍ପର। କେବଳ ଏତିକି ନୁହେଁ, ଆବଶ୍ୟକ ସମୟରେ ରକ୍ତଦାନ କରି ସେ ବହୁ ରୋଗୀଙ୍କ ଜୀବନ ବଞ୍ଚାଇଛନ୍ତି।
କୋଭିଡ୍ ସମୟରେ ଅନନ୍ୟାଙ୍କ ମାନବିକତା ଲୋକଲୋଚନକୁ ଆସିଥିଲା। ନିଜ ସହଯୋଗୀଙ୍କ ସହ ସ୍କୁଟିରେ ରାସ୍ତାକଡ଼ରେ ବସବାସ କରୁଥିବା ଯାଯାବର ପରିବାରଙ୍କୁ ଖାଦ୍ୟ ବିତରଣ କରିଥିଲେ। ହାଡ଼ଭଙ୍ଗା ଶୀତରେ କମ୍ବଳ ବାଣ୍ଟି ବହୁ ଅସହାୟଙ୍କୁ ବଢ଼ାଇଥିଲେ ସହାୟତାର ହାତ। ଏଭଳି କାର୍ଯ୍ୟ ଅନନ୍ୟାଙ୍କୁ ଅନ୍ୟମାନଙ୍କଠାରୁ ଭିନ୍ନ କରିଥିବାବେଳେ ବିଭିନ୍ନ ଅନୁଷ୍ଠାନ ପକ୍ଷରୁ ତାଙ୍କୁ ମିଳିଛି ସମ୍ବର୍ଦ୍ଧନା। ଅନନ୍ୟା ସ୍ନାତକ ପାସ୍ କରିବା ପରେ ମାଷ୍ଟର ଇନ୍ ସୋସିଆଲ ଓ୍ବାର୍କ (ଏମ୍ଏସ୍ଡବ୍ଲ୍ୟୁ) ପାଠ୍ୟକ୍ରମରେ ନାମ ଲେଖାଇଛନ୍ତି। ନିଜ ପ୍ରତିକ୍ରିୟାରେ ସେ କୁହନ୍ତି, ଏଭଳି କାର୍ଯ୍ୟରେ ମା’ ପଦ୍ମାଳୟା ଦାସ ଏବଂ ବାପା ସତ୍ୟସ୍ବରୂପ ଦାସଙ୍କ ପ୍ରେରଣା ତାଙ୍କ ପାଇଁ ଆଶୀର୍ବାଦ ପାଲଟିଛି। ପାଠ ପଢ଼ିବା ସହ ଅସହାୟଙ୍କ ସହାୟତା କରିବା ଜାରି ରଖିବେ। କାରଣ ମାନବ ସେବା ହିଁ ମାଧବ ସେବା।