ମସ୍କୋ,୨୫।୨: ୟୁକ୍ରେନ ଉପରେ ବାରମ୍ବାର ସାଇବର ଆକ୍ରମଣ ହେଉଥିବା ବେଳେ ଏଥିପାଇଁ ସେ ରୁଷିଆକୁ ଦାୟୀ କରିଛି। ବର୍ତ୍ତମାନ ସାଇବର ହ୍ୟାକର୍ସଙ୍କ ଏକ ଗୋଷ୍ଠୀ ରୁଷିଆ ବିରୋଧରେ ସାଇବର ଯୁଦ୍ଧ ଆରମ୍ଭ କରିଛି। ଏଥିରେ ଅନେକ ରୁଷିଆର ସରକାରୀ ୱେବସାଇଟକୁ ଟାର୍ଗେଟ କରାଯାଇ ବନ୍ଦ କରାଦିଆଯାଇଛି। ଏନେଇ ହ୍ୟାକର୍ସ ଦାବି କରିଛନ୍ତି। ଏହି ଗୋଷ୍ଠୀର ପ୍ରତିନିଧିତ୍ୱ କରୁଥିବା ସୋସିଆଲ ମିଡିଆ ଆକାଉଣ୍ଟ ଦାବି କରିଛି ଯେ, ସେମାନେ ରୁଷିଆ ସରକାରଙ୍କ ବିରୋଧରେ ସାଇବର ଯୁଦ୍ଧ ଆରମ୍ଭ କରିଛନ୍ତି। ୟୁକ୍ରେନରେ ରୁଷିଆର ସାମରିକ କାର୍ଯ୍ୟାନୁଷ୍ଠାନ ଯୋଗୁ ଅନେକ ଓ୍ବେବସାଇଟ୍କୁ ଟାର୍ଗେଟ କରାଯାଇ ଡାଉନ କରିଦିଆଯାଇଛି ବୋଲି ହ୍ୟାକର ଦାବି କରିଛନ୍ତି। ଅନ୍ୟପଟେ ଏହି ସାଇବର ଆକ୍ରମଣ ଯୋଗୁ ରୁଷିଆର ସରକାରୀ ୱେବସାଇଟ, ପ୍ରତିରକ୍ଷା ମନ୍ତ୍ରଣାଳୟ ଭଳିି ଅନେକ ୱେବସାଇଟ ଡାଉନ ହୋଇଯାଇଥିବା ଜଣାପଡ଼ିଛି। କେତେକ ୱେବସାଇଟ ସ୍ଲୋ ହୋଇଯାଇଥିବା ବେଳେ ଆଉ କେତେକ ଅଫ୍ଲାଇନ କରିଦିଆଯାଇଛି। ଏଥିସହ ଏକ ଆକାଉଣ୍ଟ ଦ୍ୱାରା କରାଯାଇଥିବା ଟୁଇଟରେ କୁହାଯାଇଛି ଯେ ଆମେ ଲଗ୍ଇନ୍ରେ ଅଛୁ। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ସମୟରେ ଯେଉଁମାନଙ୍କର ମୃତ୍ୟୁ ହୋଇଛି, ସେମାନଙ୍କୁ ଆମେ ଭୁଲିବୁ ନାହିଁ। ସେହିପରି ଦ୍ୱିତୀୟ ଆକାଉଣ୍ଟରୁ ପୁଟିନ୍ଙ୍କ ସମୟ ଚାଲିଯାଇଛି, ବର୍ତ୍ତମାନ ଏହି ଆକ୍ରମଣ ପୁନଃରୁଦ୍ଧାର କରିବାରେ ବହୁ ଅସୁବିଧା ହେବ ବୋଲି ଟୁଇଟରେ ଉଲ୍ଲେଖ କରାଯାଇଛି।
