ଭୁବନେଶ୍ୱର,୮।୫(ବ୍ୟୁରୋ): ଭୁବନେଶ୍ୱରରେ ଲୋକଙ୍କୁ ମୌଳିକ ସୁବିଧା ଯୋଗାଇ ଦେବାକୁ ବିଏମ୍ସି ବିଭିନ୍ନ ଉନ୍ନତିମୂଳକ କାର୍ଯ୍ୟ କରୁଛି। ସହରକୁ ଆଲୋକୀକରଣ କରିବା ପାଇଁ ମୋଟ ୭୬ହଜାର ୨୬୭ଟି ଷ୍ଟ୍ରିଟ୍ଲାଇଟ୍ ଲଗାଯାଇଛି। ସେଥିମଧ୍ୟରୁ ୯୦ ପ୍ରତିଶତ ଏଲ୍ଇଡି ଲାଇଟ୍ ରହିଛି। ଜାଗା ମିଶନ ଅନ୍ତର୍ଗତ ୩୧୯ଟି ବସ୍ତିରେ ୧୪ଶହରୁ ଊର୍ଦ୍ଧ୍ୱ ଷ୍ଟ୍ରିଟ୍ଲାଇଟ୍ ଲଗାଯାଇଛି। ତଥାପି ସହରର ଏକାଧିକ ଅଞ୍ଚଳ ଏବେ ବି ଅନ୍ଧାରରେ ରହୁଛି। ଏଥିପାଇଁ ବିଏମ୍ସି ପକ୍ଷରୁ ଷ୍ଟ୍ରିଟ୍ ଲାଇଟ୍ ନ ଥିବା ଅଞ୍ଚଳର ସର୍ଭେ କରାଯାଇ ଚିହ୍ନଟ ହୋଇଥିବା ସ୍ଥାନରେ ୧ହଜାର ଏଲ୍ଇଡି ଲାଇଟ୍ ସହିତ ୧୦୦ଟି ପୋଲ୍, ହାଇମାଷ୍ଟ ଲାଇଟ୍, ୩୦ଟି ମିନିମାଷ୍ଟ ଲାଇଟ୍ ଏବଂ ୧୦୦ଟି ଫୋର୍ ଆର୍ମ ଲାଇଟ୍ ଲଗାଯିବ। ଏନେଇ ଟେଣ୍ଡର ପ୍ରକ୍ରିୟା ସରିଥିବାବେଳେ ୨ମାସ ମଧ୍ୟରେ କାମ ସରିବ। ୨୦୨୧-୨୨ରେ ୯ହଜାର ୩୯୦ଟି ଷ୍ଟ୍ରିଟ୍ ଲାଇଟ୍ ଲଗାଯାଇଥିବାବେଳେ ୨ହଜାର ୪୩୦ଟି ପୋଲ୍ ପୋତାଯାଇଥିବା ସୂଚନା ମିଳିଛି। ଅପରପକ୍ଷେ ସହରର ବିଭିନ୍ନ ସ୍ଥାନରେ ଷ୍ଟ୍ରିଟ୍ ଲାଇଟ୍ ରହିଥିବାବେଳେ ମେଣ୍ଟେନାନ୍ସ ଅଭାବରୁ ଲାଇଟ୍ ଜଳୁନାହିଁ। ଏହାର ରକ୍ଷଣାବେକ୍ଷଣର ଦାୟିତ୍ୱ ଦୁଇଟି କମ୍ପାନୀ ଯଥା ଇ-ସ୍ମାର୍ଟ ଏବଂ ନିଭ୍ ଏନର୍ଜିକୁ ଦିଆଯାଇଛି। କୌଣସି ଅଞ୍ଚଳରେ ଷ୍ଟ୍ରିଟ୍ ଲାଇଟ୍ ସମସ୍ୟା ପାଇଁ ଟୋଲ୍ ଫ୍ରି ନମ୍ବର ୧୮୦୦୩୪୫୭୧୧୬/ ୦୬୭୪୨୪୩୦୦୫୧ ଏବଂ ୭୬୮୨୮୮୯୮୯୮ ଜାରି କରାଯାଇଛି। ତେବେ ବିଏମ୍ସି ପକ୍ଷରୁ ଏଗୁଡ଼ିକର ଯାଞ୍ଚ କରିବା ପାଇଁ ଏକ ୧୦ଜଣିଆ ଆଇଟିଆଇ ଟିମ୍ ଓ ୬ଜଣ ଜମାଦାର ରହିଛନ୍ତି। ତେବେ ୬୭ଟି ଓ୍ବାର୍ଡର ଗଳିକନ୍ଦିଠାରୁ ଆରମ୍ଭ କରି ମୁଖ୍ୟରାସ୍ତା ପର୍ଯ୍ୟନ୍ତ ହଜାର ହଜାର ଲାଇଟ୍ ଲଗାଯାଇଥିବାବେଳେ ଏହାର ମରାମତି ପାଇଁ ମାତ୍ର ୬ଜଣ ଜମାଦାର ରହିବା ବ୍ୟବସ୍ଥା ଉପରେ ପ୍ରଶ୍ନବାଚୀ ଲଗାଉଛି। ଏ ସମ୍ପର୍କରେ ବିଏମ୍ସିର ଇଲେକ୍ଟ୍ରି ବିଭାଗର ଜଣେ ଅଧିକାରୀ କହିଛନ୍ତି, ଅଳ୍ପ କର୍ମଚାରୀଙ୍କୁ ନେଇ କାମ କରିବାକୁ ପଡୁଛି। ଏ ନେଇ ଆମେ ମେୟର ଏବଂ କମିଶନରଙ୍କୁ ଅବଗତ କରାଇଛୁ। ଜମାଦାରଙ୍କ ବ୍ୟତୀତ ଯେଉଁ ଅଞ୍ଚଳରେ ଷ୍ଟ୍ରିଟ ଲାଇଟ୍ ସମସ୍ୟା ହେଉଛି, ସେଠାକାର ସ୍ଥାନୀୟ ଲୋକ ଏବଂ କର୍ପୋରେଟରମାନେ ଟୋଲ୍ ଫ୍ରି ନମ୍ବରରେ ସୂଚନା ଦେଉଛନ୍ତି। ଏହାପରେ ତୁରନ୍ତ ସେଠାକାର ଲାଇଟ୍କୁ ସଜଡ଼ା ଯାଉଛି।
