ନୂଆଦିଲ୍ଲୀ, ୨୧ା୪ (ପି.ଟି.)-ବେବିରୋଜିସାନା ଚାନୁ ୟୁରୋପିଆନ ଚାମ୍ପିୟନ ଆଲେକ୍ସାସ କୁବିକାଙ୍କୁ ହରାଇଦେବା ଫଳରେ ପୋଲାଣ୍ଡର କିଲ୍ସିଠାରେ ଚାଲିଥିବା ପୁରୁଷ ଓ ମହିଳା ୟୁଥ୍ ଓ୍ବାଲର୍ଡ ଚାମ୍ପିୟନଶିପ୍ରେ ଭାରତର ଆଉ ୭ ବକ୍ସର ସେମିଫାଇନାଲରେ ପ୍ରବେଶ କରିଛନ୍ତି। ପ୍ରତିଯୋଗିତାର ୭ମ ଦିବସରେ ବେବିରୋଜିସାନା (୫୧କେଜି)ଙ୍କ ବ୍ୟତୀତ, ଅରୁନ୍ଧତି ଚୌଧାରୀ (୬୯କେଜି), ସାନାମାଚା ଚାନୁ (୭୫କେଜି), ଅଙ୍କିତ ନରଓ୍ବାଲ (୬୪କେଜି), ବିଶାଲ ଗୁପ୍ତା (୯୧କେଜି), ବିଶ୍ୱାମିତ୍ର ଚୋଙ୍ଗଥାମ୍ (୪୯କେଜି) ଏବଂ ସଚିନ୍ (୫୬କେଜି) ପ୍ରମୁଖ ସେମିଫାଇନାଲରେ ପ୍ରବେଶ କରିବା ଦ୍ୱାରା ଅତିକମ୍ରେ ଏକ ବ୍ରୋଞ୍ଜ ପଦକ ନିଶ୍ଚିତ କରିଛନ୍ତି। ଏହି ଚାମ୍ପିୟନଶିପ୍ରେ ଭାରତର ୨୦ ଜଣିଆ ଦଳ ଭାଗ ନେଇଛନ୍ତି। ପୂର୍ବରୁ ୬ଷ୍ଠ ଦିବସରେ ଭିନ୍କା, ଅଲ୍ଫିୟା, ଗୀତିକା ଓ ପୁନମ୍ ସେମିଫାଇନାଲରେ ପ୍ରବେଶ କରିସାରିଛନ୍ତି। ଫଳରେ ଭାରତ ୧୧ଟି ପଦକ ନିଶ୍ଚିତ କରିଛି।
