ନୂଆଦିଲ୍ଲୀ,୧୪ା୯(ପି.ଟି.): ନିର୍ବାଚନ କମିଶନ (ଇସି) ଆଉ ୮୬ଟି ଅସ୍ତିତ୍ୱହୀନ ପଞ୍ଜୀକୃତ ଅଣସ୍ବୀକୃତ ରାଜନୈତିକ ଦଳ (ଆର୍ୟୁପିପି)ଙ୍କୁ ତାଲିକାରୁ ବାଦ୍ ଦେବା ଲାଗି ମଙ୍ଗଳବାର ନିର୍ଦ୍ଦେଶ ଦେଇଛନ୍ତି। ଏହାକୁ ମିଶାଇ ମୋଟ ବାଦ୍ ପଡ଼ିଥିବା ଆର୍ୟୁପିପି ସଂଖ୍ୟା ୫୩୭ରେ ପହଞ୍ଚତ୍ଛି। ଏମାନେ ନିର୍ବାଚନୀ ନିୟମାବଳୀ ଅନୁପାଳନ କରିବାରେ ବିଫଳ ହୋଇଛନ୍ତି। ବୃହତ୍ତର ଜନସ୍ବାର୍ଥ ଦୃଷ୍ଟିରୁ ତଥା ନିର୍ବାଚନୀ ଗଣତନ୍ତ୍ରରେ ସ୍ବଚ୍ଛତା ପାଇଁ ତୁରନ୍ତ ସଂଶୋଧନ ପଦକ୍ଷେପର ଆବଶ୍ୟକ ଥିଲା ବୋଲି ଇସି ପକ୍ଷରୁ ଏକ ବିବୃତିରେ କୁହାଯାଇଛି। ଏଥିସହିତ ୨୫୩ଟି ଆର୍ୟୁପିପିଙ୍କୁ ନିର୍ବାଚନ କମିଶନ ନିଷ୍କ୍ରିୟ ଘୋଷଣା କରିଛନ୍ତି। ମୁଖ୍ୟ ନିର୍ବାଚନ କମିଶନର ରାଜୀବ କୁମାର ଏବଂ ନିର୍ବାଚନ କମିଶନର ଅନୁପ ଚନ୍ଦ୍ର ପାଣ୍ଡେ ଏହି ନିଷ୍ପତ୍ତି ନେଇଛନ୍ତି। ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ଯାଞ୍ଚ କିମ୍ବା ଡାକ କର୍ତ୍ତୃପକ୍ଷଙ୍କଠାରୁ ପ୍ରାପ୍ତ ହୋଇ ନ ଥିବା ପତ୍ର/ନୋଟିସ ସମ୍ପର୍କିତ ରିପୋର୍ଟ ଆଧାରରେ ୮୬ଟି ପଞ୍ଜୀକୃତ ଅଣସ୍ବୀକୃତ ଦଳର ଅସ୍ତିତ୍ୱ ନ ଥିବା ଜଣାପଡ଼ିବା ପରେ ସେଗୁଡ଼ିକୁ ତାଲିକାରୁ ବାଦ୍ ଦିଆଯାଇଛି। ଗତ ମେ’ ୨୫ ଏବଂ ଜୁନ୍ ୨୦ରେ ଯଥାକ୍ରମେ ୮୭ ଏବଂ ୧୧୧ ଆର୍ୟୁପିପିଙ୍କୁ ତାଲିକାରୁ ବାଦ୍ ଦିଆଯାଇଥିଲା। ସେହିପରି ବିଭିନ୍ନ ରାଜ୍ୟର ମୁଖ୍ୟ ନିର୍ବାଚନ ଅଧିକାରୀମାନଙ୍କ ରିପୋର୍ଟ ଆଧାରରେ ନିୟମ ଅନୁପାଳନ କରି ନ ଥିବା ୨୫୩ ଆର୍ୟୁପିପିଙ୍କୁ ନିଷ୍କ୍ରିୟ ଦର୍ଶାଯାଇଛି।
