କ୍ୱିଭ,୪।୭: ମାସ ମାସ ଧରି ଯୁଦ୍ଧ ପରେ ରୁଷିଆର ସୈନ୍ୟମାନେ ଶେଷରେ ୟୁକ୍ରେନର ଡୋନେସ୍କ ପ୍ରଦେଶର ଚାସିଭ ୟାର ସହରକୁ ଜିତି ଦେଇଛନ୍ତି। ଏହି ରଣନୈତିକ ଗୁରୁତ୍ୱପୂର୍ଣ୍ଣ ସହରରୁ ୟୁକ୍ରେନ ନିଜର ସେନା ପ୍ରତ୍ୟାହାର କରିବାକୁ ଘୋଷଣା କରିଛି। ବୁଧବାର ରାତିରେ ଏହି ସହରକୁ ନିଜ ଅଧୀନକୁ ନେଇଥିବା ରୁଷଆ କହିଛି।
ଏହି ଉପାୟରେ, ପ୍ରାୟ ୨୯ମାସ ଧରି ଚାଲିଥିବା ଯୁଦ୍ଧରେ, ୟୁକ୍ରେନ ଅନ୍ୟ ଏକ ସହର ହରାଇଛି। ଏହି ଯୁଦ୍ଧରେ ରୁଷିଆ ବର୍ତ୍ତମାନ ପର୍ଯ୍ୟନ୍ତ ୟୁକ୍ରେନର ୨୦ ପ୍ରତିଶତରୁ ଅଧିକ ଭୂଭାଗ ଦଖଲ କରିଛି।
ରୁଷିଆର ସେନା ଦ୍ୱାରା କବଜା କରାଯାଇଥିବା ଚାସିଭ ୟାର୍ ସହର ରଣନୈତିକ ଦୃଷ୍ଟିରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହି ସହରକୁ କାବୁ କରିବା ସହିତ ରୁଷିଆ ପାଇଁ ୟୁକ୍ରେନର ଦୁଇଟି ଗୁରୁତ୍ୱପୂର୍ଣ୍ଣ ସହର – କ୍ରାମାଟୋର୍ସ୍କ ଏବଂ ସ୍ଲୋଭିଆନ୍ସକୁ କାବୁ କରିବା ସହଜ ହେବ। ୟୁକ୍ରେନ କହିଛି ଯେ ସେମାନଙ୍କ ସୁରକ୍ଷା ପାଇଁ ସୈନ୍ୟ ପ୍ରତ୍ୟାହାର କରିବା ଭଲ ବୋଲି ବିବେଚନା କରାଯାଏ, ତେଣୁ ଚାସିଭ ୟାର ଛାଡ଼ିବାକୁ ନିଷ୍ପତ୍ତି ନିଆଯାଇଥିଲା।
ରୁଷିଆର ସମର୍ଥକ ୟୁକ୍ରେନ ବିଦ୍ରୋହୀମାନେ ୨୦୧୪ ରୁ ଡୋନେଟୋସ୍କର କିଛି ଅଂଶକୁ ନିୟନ୍ତ୍ରଣ କରିଛନ୍ତି। ଫେବୃଆରୀ ୨୦୨୨ରୁ ଆରମ୍ଭ ହୋଇଥିବା ଯୁଦ୍ଧ ପରେ ରୁଷିଆର ସେନା ଏହି ପ୍ରଦେଶର ଦଖଲକୁ ବୃଦ୍ଧି କରିଛି। ଏହି ସମୟରେ, ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି କହିଛନ୍ତି ଯେ ତାଙ୍କ ସେନାର ୧୪ ଟି ବ୍ରିଗେଡରେ ଯୁଦ୍ଧ କରିବାକୁ ପର୍ଯ୍ୟାପ୍ତ ଅସ୍ତ୍ର ନାହିଁ। ଏଥିରୁ ରୁଷିଆ ଉପକୃତ ହେଉଛି।