ନୂଆଦିଲ୍ଲୀ,୨।୮: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ବୁଧବାର ଆଉ ଏକ ଝଟ୍କା ଲାଗିଛି। ଦିଲ୍ଲୀ ସେବା ଅଧ୍ୟାଦେଶ ସମ୍ପର୍କିତ କେନ୍ଦ୍ର ସରକାର ଆଣିଥିବା ଗଭର୍ନମେଣ୍ଟ ଅଫ୍ ନ୍ୟାଶ୍ନାଲ କ୍ୟାପିଟାଲ ଟେରିଟୋରି ଅଫ୍ ଦିଲ୍ଲୀ(ସଂଶୋଧନ) ବିଲ୍, ୨୦୨୩କୁ ଆନ୍ଧ୍ରପ୍ରଦେଶର ତେଲୁଗୁ ଦେଶମ ପାର୍ଟି (ଟିଡିପି) ସମର୍ଥନ କରିଛି। ଉଭୟ ରାଜ୍ୟ ସଭା ଏବଂ ଲୋକ ସଭାରେ ଏହି ବିଲ୍କୁ ସମର୍ଥନ କରିବ ବୋଲି ଦଳ ଘୋଷଣା କରିଛି। ଟିଡିପିର ଲୋକ ସଭାରେ ତିନିଜଣ ଏମ୍ପି ଏବଂ ରାଜ୍ୟ ସଭାରେ ଜଣେ ଏମ୍ପିଅଛନ୍ତି। ଟିଡିପି ସହଯୋଗରେ କେନ୍ଦ୍ର ସରକାରଙ୍କ ଶକ୍ତି ବୃଦ୍ଧି ପାଇବ। ଉଲ୍ଲେଖନୀୟ କଥା ହେଉଛି, ସଂସଦରେ ବିଲ ପାସ କରିବା ପାଇଁ ସରକାରଙ୍କ ପାଖରେ ପୂର୍ବରୁ ସଂଖ୍ୟା ଥିଲା। ଟିଡିପିଙ୍କ ସମର୍ଥନ ସହିତ ଆନ୍ଧ୍ରପ୍ରଦେଶର ଉଭୟ ଆଞ୍ଚଳିକ ଦଳ, ଶାସକ ଓ୍ବାଇଏସଆର-ସିପି ଏବଂ ବିରୋଧୀ ଟିଡିପି ବର୍ତ୍ତମାନ କେନ୍ଦ୍ର ସରକାରଙ୍କୁ ସମର୍ଥନ କରୁଛନ୍ତି।
ସୂଚନାଯୋଗ୍ୟ, ଗୋଟିଏ ଦିନ ପୂର୍ବରୁ ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନେତୃତ୍ୱାଧୀନ ବିଜୁ ଜନତା ଦଳ (ବିଜେଡି) ମଧ୍ୟ କେନ୍ଦ୍ର ସରକାରଙ୍କୁ ସମର୍ଥନ ଘୋଷଣା କରିଛି। ୨୬ ସଦସ୍ୟ ବିଶିଷ୍ଟ ବିରୋଧୀ ମେଣ୍ଟ ‘ଇଣ୍ଡିଆ’ ଏବଂ କିଛି ସ୍ବାଧୀନ ଏମ୍ପିଙ୍କ ସମେତ ପ୍ରାୟ ୧୦୯ ଏମ୍ପି ଏହି ବିଲ ବିରୋଧରେ ଭୋଟ ଦେବେ ବୋଲି ଆଶା କରାଯାଉଛି।
