କୋଲକତା,୧।୧୦: ପଶ୍ଚିମବଙ୍ଗରେ ଭାରତୀୟ ଜନତା ପାର୍ଟିକୁ ଗୋଟିଏ ପରେ ଗୋଟିଏ ଝଟ୍କା ଲାଗୁଛି। ଏବେ ରାଇଗଞ୍ଜ ଭାଜପା ବିଧାୟକ କୃଷ୍ଣ କଲ୍ୟାଣୀ ଦଳରୁ ଇସ୍ତଫା ଦେଇଛନ୍ତି। କୃଷ୍ଣ କଲ୍ୟାଣୀଙ୍କ ଇସ୍ତଫା ନେଇ ପୂର୍ବରୁ କଳ୍ପନାଜଳ୍ପନା ଚାଲିଥିଲା। ସେ ଭାଜପା ଜିଲା ସଭାପତି ବାସୁଦେବ ସରକାରଙ୍କ ସହ ବିବାଦ ପରେ କୌଣସି କାର୍ଯ୍ୟକ୍ରମରେ ଯୋଗଦେବାକୁ ମନା କରିଦେଇଥିଲେ। ଗୋଟିଏ ଦିନ ପୂର୍ବରୁ ଭାଜପା ପକ୍ଷରୁ ଦ୍ୱାରା କୃଷ୍ଣ କଲ୍ୟାଣୀଙ୍କୁ ଏକ କାରଣ ଦର୍ଶାଅ ନୋଟିସ ଜାରି କରାଯାଇଥିଲା। ରାଇଗଞ୍ଜର ଭାଜପା ଏମ୍ପି ଦେବାଶ୍ରୀ ଚୌଧୁରୀଙ୍କ ବିରୋଧରେ ତାଙ୍କ ବକ୍ତବ୍ୟ ପରେ ତାଙ୍କୁ ଏହି ନୋଟିସ୍ ଜାରି କରାଯାଇଥିଲା। କିନ୍ତୁ ପରଦିନ କୃଷ୍ଣ କଲ୍ୟାଣୀ ନିଜେ ଇସ୍ତଫା ଦେଇଛନ୍ତି। ଇସ୍ତଫା ପରେ ସେ କହିଛନ୍ତି ଯେ, ଯେଉଁ ଦଳରେ ଦେବାଶ୍ରୀ ଚୌଧୁରୀ ଜଣେ ଏମ୍ପି ଅଛନ୍ତି, ମୁଁ ସେହି ଦଳରେ ରହିପାରିବି ନାହିଁ। ତେବେ ସେ କେଉଁ ଦଳରେ ଯୋଗଦେବାକୁ ଯାଉଛନ୍ତି ତାହା ଏପର୍ଯ୍ୟନ୍ତ ପ୍ରକାଶ କରି ନାହାଁନ୍ତି। ସୂଚନାଯୋଗ୍ୟ, ମେ ୨ରେ ଟିଏମସି କ୍ଷମତାକୁ ଆସିବା ପରେ ପଶ୍ଚିମବଙ୍ଗରେ ନେତାମାନେ ଦଳ ଛାଡିବା ଜାରି ରଖିଛନ୍ତି। ଏହାପୂର୍ବରୁ ବାବୁଲ ସୁପ୍ରିୟୋ ଏବଂ ମୁକୁଲ ରାୟଙ୍କ ବ୍ୟତୀତ ଅନ୍ୟ ତିନିଜଣ ବିଧାୟକ ମଧ୍ୟ ଦଳରୁ ଇସ୍ତଫା ଦେଇଛନ୍ତି।