ମସ୍କୋ,୩୦।୭ : ରୁଷିଆର ରାଜଧାନୀ ମସ୍କୋରେ ପୁଣି ଡ୍ରୋନ ଆକ୍ରମଣ ହୋଇଛି। ଏହି ଆକ୍ରମଣକୁ ୟୁକ୍ରେନ ଉପରେ ଦାୟୀ କରାଯାଇଛି। ବିଶେଷ କଥା ହେଉଛି ଏହି ଆକ୍ରମଣ ଏକ ସମୟରେ ଘଟିଥିଲା ଯେତେବେଳେ ରୁଷିଆର ବାୟୁ ପ୍ରତିରକ୍ଷା ବ୍ୟବସ୍ଥା ମଧ୍ୟ ସକ୍ରିୟ ଥିଲା, ତଥାପି ରୁଷିଆ ଡ୍ରୋନ ଆକ୍ରମଣରୁ ରକ୍ଷା ପାଇପାରି ନ ଥିଲା। ଏହି ଆକ୍ରମଣରେ ଦୁଇଟି କୋଠା ନଷ୍ଟ ହୋଇଯାଇଛି। ଡ୍ରୋନ ଆକ୍ରମଣର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ମସ୍କୋର ମେୟର ମଧ୍ୟ ଏହି ଆକ୍ରମଣକୁ ନିଶ୍ଚିତ କରିଛନ୍ତି। ଏନେଇ ୟୁକ୍ରେନ୍ ମୁଣ୍ଡରେ ଅଠର ବୋଳା ଯାଇଛି। ୟୁକ୍ରେନ୍ ଜାଣିଶୁଣି ଏଭଳି କରିଥିବା ଅଭିଯୋଗ ହୋଇଛି।
ସତର୍କତାମୂଳକ ପଦକ୍ଷେପ ଭାବରେ ରୁଷିଆ ଏହାର ନୁକାଭୋ ବିମାନ ବନ୍ଦରକୁ ବନ୍ଦ କରି ଦେଇଛି। ଗଣମାଧ୍ୟମର ରିପୋର୍ଟ ଅନୁଯାୟୀ, ମସ୍କୋର ଆଇକ୍ୟୁ କ୍ୱାର୍ଟର ନାମକ ଉଚ୍ଚ ମହଲା କୋଠା ଉପରେ ଆକ୍ରମଣ କରାଯାଇଥିଲା।
ଏହି ବିଲଡିଂରେ ଆବାସିକ ଆପାର୍ଟମେଣ୍ଟ ଏବଂ ସରକାରୀ କାର୍ଯ୍ୟାଳୟ ରହିଛି। ଖବର ଅନୁଯାୟୀ ଏହି ଆକ୍ରମଣରେ ଜଣେ ବ୍ୟକ୍ତି ମଧ୍ୟ ଆହତ ହୋଇଛନ୍ତି। ମସ୍କୋର ଅନ୍ୟ ଏକ କୋଠା ଉପରେ ଡ୍ରୋନ ଆକ୍ରମଣ ହେବାର ଖବର ମଧ୍ୟ ରହିଛି। ଏକ ଭିଡିଓ ସାମ୍ନାକୁ ଆସିଛି ଯେଉଁଥିରେ ଜଣେ ମହିଳା ତାଙ୍କ ବାସଭବନରେ ଡ୍ରୋନ ଖସିପଡିଥିବା ବେଳେ ତାଙ୍କ ଆପାର୍ଟମେଣ୍ଟରେ ଶୋଇଥିବାର ନଜର ଆସିଛନ୍ତି। ସୋସିଆଲ ମିଡିଆରେ ଏହାର ଭିଡିଓ ମଧ୍ୟ ଭାଇରାଲ ହେବାରେ ଲାଗିଛି।
ମସ୍କୋ ମେୟର ସର୍ଗେଇ ସୋବିୟାନିନ ମଧ୍ୟ ମସ୍କୋର ଦୁଇଟି ଅଟ୍ଟାଳିକା ଉପରେ ଡ୍ରୋନ ଆକ୍ରମଣକୁ ନିଶ୍ଚିତ କରିଛନ୍ତି। ତେବେ ଏହି ଆକ୍ରମଣରେ ଅଧିକ କ୍ଷୟକ୍ଷତି ହୋଇ ନ ଥିବା ସେ କହିଛନ୍ତି। ରବିବାର ସକାଳେ ଏହି ଆକ୍ରମଣ ହୋଇଛି। ରୁଷିଆର ପ୍ରତିରକ୍ଷା ମନ୍ତ୍ରଣାଳୟ ରିପୋର୍ଟ କରିଛି ରୁଷିଆର ବାୟୁ ପ୍ରତିରକ୍ଷା ପଶ୍ଚିମ ମସ୍କୋରେ ଏକ ୟୁକ୍ରେନ ଡ୍ରୋନକୁ ଧ୍ୱଂସ କରିଛି। ଗତ ସପ୍ତାହରେ ମସ୍କୋରେ ଦୁଇଟି ଡ୍ରୋନ ଆକ୍ରମଣ ହେବାର ଖବର ମଧ୍ୟ ଆସିଥିଲା। ଏଥି ପାଇଁ ୟୁକ୍ରେନକୁ ଦାୟୀ କରାଯାଇଥିଲା।