ନୂଆଦିଲ୍ଲୀ,୮।୯ : କରୋନା ଯୋଗୁ ଲୋକମାନେ ବର୍ତ୍ତମାନ ବିଭିନ୍ନ ସମସ୍ୟା ଦେଇ ଗତି କରୁଛନ୍ତି। ଏଭଳି ସ୍ଥିତିରେ ସରକାର ଆଉ ଏକ ପ୍ୟାଜେକ ଲୋକଙ୍କ ଲାଗି ଆଣିପାରନ୍ତି ବୋଲି ଏକ ରିପୋର୍ଟରେ ପ୍ରକାଶ ପାଇଛି। ଅଣ ବେତନଭୋଗୀ ମଧ୍ୟବିତ୍ତ ପରିବାର ଏବଂ କ୍ଷୁଦ୍ର ବ୍ୟବସାୟୀଙ୍କ ଉପରେ ଏହି ପ୍ୟାକେଜରେ ଫୋକସ କରାଯିବ ବୋଲି କୁହାଯାଉଛି। ମଧ୍ୟବିତ ପରିବାର କରୋନା ଯୋଗୁ ନାହିଁ ନ ଥିବା ଅସୁବିଧା ସାମ୍ନା କରିଥିବା ସରକାରଙ୍କ ନଜରକୁ ଆସିଛି। ଏହା ପୂର୍ବରୁ ସରକାର ମେ ମାସରେ ୨୦ ଲକ୍ଷ ଟଙ୍କାର ଆତ୍ମନିର୍ଭର ପ୍ୟାକେଜ ଘୋଷଣା କରିଛନ୍ତି। ଦ୍ୱିତୀୟ ତ୍ରୈମାସରେ ଦେଶର ଅର୍ଥ ବ୍ୟବସ୍ଥାରେ ସୁଧାର ଆସିବ ବୋଲି ସରକାର ଅନୁମାନ ଲଗାଇଥିଲେ। ହେଲେ ବର୍ତ୍ତମାନ ଅର୍ଥ ବ୍ୟବସ୍ଥା ଟ୍ରାକ୍କୁ ଫେରି ପାରିନାହିଁ। ଧୀରେ ଧୀରେ ସାରା ଦେଶରେ ଲକ୍ଡାଉନ ହଟିଥିଲେ ମଧ୍ୟ ସବୁ କିଛି ଠିକ୍ ହେଲା ଭଳି ବର୍ତ୍ତମାନ ପ୍ରତୀୟମାନ ହେଉ ନ ଥିବା ସରକାର ଉପଲବ୍ଧି କରିଛନ୍ତି।
ଅଗଷ୍ଟରେ ପରଚେଜିଂ ମ୍ୟାନେଜର୍ସ ଇଣ୍ଡେକ୍ସ(ପିଏମ୍ଆଇ) ୫୨% ସ୍ତରରେ ରହିଛି। ମାନୁଫାକଚରିଂ କ୍ଷେତ୍ରରେ ଧୀରେ ଧୀରେ ସୁଧାର ଆସୁଥିବା ଏଥିରୁ ଅନୁମାନ ଲଗାଯାଇପାରେ। ମାତ୍ର ଦେଶର ଜିଡିପିରେ -୨୩.୯% ହ୍ରାସ ସରକାରଙ୍କ ଚିନ୍ତାକୁ ବଢାଇ ଦେଇଛି। ଏପଟେ କରୋନା ସଂକ୍ରମଣ କମୁ ନ ଥିବା ଯୋଗୁ ଏହା ଅସୁବିଧାକୁ ବଢାଉଛି। ନୂଆ ବ୍ୟବସ୍ଥା ଦ୍ୱାରା ବଜାରରେ ଚାହିଦା ବଢାଇବା ସହ ଲୋକଙ୍କୁ ଆଶ୍ୱସ୍ତି ପ୍ରଦାନ କରିବା ଲାଗି ସରକାର ଯୋଜନା ରଖିଛନ୍ତି। ପ୍ୟାକେଜ ଆସିଲେ କ୍ଷୁଦ୍ର ବ୍ୟବସାୟ ଏବଂ ମଧ୍ୟବିତ୍ତ ପରିବାରକୁ ଲାଭ ମିଳିବ। ହେଲେ ସରକାର କିଭଳି ପଦକ୍ଷେପ ହାତକୁ ନେଉଛନ୍ତି ତାହା ଦେଖିବାକୁ ବାକି ରହିଲା।