ମସ୍କୋ,୧୬।୨: ଜେଲରେ ଥିବା ରୁଷିଆର ବିରୋଧୀଦଳର ନେତା ଆଲେକ୍ସି ନଭଲନିଙ୍କ ଦେହାନ୍ତ ହୋଇଛି। ୟାମାଲୋ-ନେନେଟସ ଅଞ୍ଚଳର କାରାଗାର ସେବା ଶୁକ୍ରବାର ଏହି ସୂଚନା ଦେଇଛି। ଏହି ଜେଲରେ ଆଲେକ୍ସି ନଭଲନି ତାଙ୍କ ଦଣ୍ଡ ଭୋଗୁଥିଲେ। ୟାମାଲୋ-ନେନେଟସ ସ୍ବୟଂଶାସିତ ଜିଲାର ଫେଡେରାଲ ପ୍ରାୟଦ୍ୱିପୀୟ ସେବା ଏହାର ୱେବସାଇଟରେ ପ୍ରକାଶିତ ଏକ ବିବୃତ୍ତିରେ କହିଛି ଯେ ନଭଲନି ଶୁକ୍ରବାର ବୁଲିବା ପରେ ନିଜକୁ ଅସୁସ୍ଥ ଅନୁଭବ କରଥିଲେ ଏବଂ ତୁରନ୍ତ ଚେତା ହରାଇଥିଲେ। ରଏଟର୍ସ ରିପୋର୍ଟ ଅନୁଯାୟୀ, ଡାକ୍ତରଙ୍କୁ ଡକାଯାଇଥିଲା, କିନ୍ତୁ ସେମାନେ ତାଙ୍କୁ ବଞ୍ଚାଇବାରେ ଅସମର୍ଥ ହୋଇଥିଲେ। ସରକାରୀ ସୂତ୍ରରୁ ପ୍ରକାଶ ଯେ ଆଲେକ୍ସୀ ନଭଲନିଙ୍କ ମୃତ୍ୟୁର କାରଣ ଏପର୍ଯ୍ୟନ୍ତ ଜଣା ପଡନାହିଁ।
ରୁଷିଆର ବିଶିଷ୍ଟ ବିରୋଧୀଦଳ ନେତା ତଥା ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସମାଲୋଚକ ଆଲେକ୍ସି ନଭଲନିଙ୍କୁ ଗତ ବର୍ଷ ଅଗଷ୍ଟରେ ରୁଷିଆର କୋର୍ଟ ୧୯ବର୍ଷ କାରାଦଣ୍ଡରେ ଦଣ୍ଡିତ କରିଥିଲେ। ଏହି ସମୟରେ, ନଭଲନିଙ୍କ ମତ୍ୟୁର କାରଣ ସମ୍ପର୍କରେ କୌଣସି ସୂଚନା ନାହିଁ ବୋଲି କ୍ରେମଲିନ ଦାବି କରିଛି। ତାଙ୍କ ମୃତ୍ୟୁ ଘଟଣାରେ ଜେଲ ସେବା ସମସ୍ତ ଅନୁସନ୍ଧାନ କରୁଛି ବୋଲି ରୁଷିଆ ସରକାର କହିଛନ୍ତି। ରୁଷିଆର ଅନୁସନ୍ଧାନ କମିଟି ମୃତ୍ୟୁ ଘଟଣାର ପ୍ରକ୍ରିୟା ଆରମ୍ଭ କରିଛି। ରୁଷିଆର ଖବରକାଗଜ ସମ୍ପାଦକ ତଥା ନୋବେଲ ଶାନ୍ତି ପୁରସ୍କାର ବିଜେତା ଦିମିତ୍ରୀ ମୁରାଟୋଭ ରଏଟର୍ସକୁ କହିଛନ୍ତି ଯେ ଜେଲରେ ଥିବା ବିରୋଧୀଦଳର ନେତା ଆଲେକ୍ସି ନଭଲନିଙ୍କ ମୃତ୍ୟୁ ଏକ ହତ୍ୟା। ସେ କହିଛନ୍ତି ଯେ ଜେଲର ଅବସ୍ଥା ତାଙ୍କ ମୃତ୍ୟୁର କାରଣ ହୋଇଛି।