ଭୁବନେଶ୍ୱର,୧୨।୧(ବ୍ୟୁରୋ): ମାର୍କେଟ ବିଲ୍ଡିଂରୁ ଉଠା ଦୋକାନକୁ ଉଠାଇ ଦିଆଯିବା ପରେ ଜୀବିକା ହରାଇଥିବା ଜଣକ ପରେ ଜଣେ ବ୍ୟବସାୟୀ ଜୀବନ ହାରିବାରେ ଲାଗିଛନ୍ତି। ରବିବାର ବେଡ୍ଶିଟ୍ ବ୍ୟବସାୟୀ ଅଜିତ୍ ସାହାଣୀ ଆତ୍ମହତ୍ୟା କରିଥିବାବେଳେ ମଙ୍ଗଳବାର ପୁଣି ଆଉଜଣେ ଉଠା ଦୋକାନୀ ଆତ୍ମହତ୍ୟା କରିଛନ୍ତି। ସେ ହେଲେ ବଡ଼ଗଡ଼ ଥାନା ଅନ୍ତର୍ଗତ ନୂଆସାହିରେ ରହୁଥିବା ବିହାର ସମଷ୍ଟିପୁର ଜିଲା ପଟୋରୀ ଥାନାଞ୍ଚଳର ସୁବାସ ପଣ୍ଡିତ(୩୫)। ସେ ମାର୍କେଟ ବିଲ୍ଡିଂରେ ପ୍ଲାଷ୍ଟିକ୍ ଦୋକାନ କରିଥିଲେ। କ୍ୟାପିଟାଲ ହସ୍ପିଟାଲରେ ତାଙ୍କ ମୃତଦେହକୁ ବ୍ୟବଚ୍ଛେଦ କରାଯିବା ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏନେଇ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି।
ମୃତ ସୁବାସଙ୍କ ୨ଟି ଝିଅ ଅଛନ୍ତି। ଜଣଙ୍କର ବୟସ ୧୦ ବର୍ଷ ହୋଇଥିବାବେଳେ ଆଉ ଜଣେ ୫ ବର୍ଷର। ସେ ୨୦ ବର୍ଷ ତଳେ ଭୁବନେଶ୍ୱର ଆସିଥିଲେ। କିଛିଦିନ ମାର୍କେଟ୍ ବିଲ୍ଡଂରେ ଦୋକାନ ପକେଇବା ପରେ ଅସୁବିଧା ହେବାରୁ ରାମମନ୍ଦିର ନିକଟରେ ଦୋକାନ କରିଥିଲେ। ସେଠାରୁ ଉଠାଇ ଦିଆଯିବା ପରେ ପୁଣି କିଛି ମାସ ହେବ ମାର୍କେଟ ବିଲ୍ଡିଂରେ ଭିଶାଲ୍ ମଲ୍ ସାମ୍ନାରେ ପ୍ଲାଷ୍ଟିକ୍ ଦୋକାନ କରିଥିଲେ। ତେବେ କରୋନା ପାଇଁ ଦୋକାନ ବନ୍ଦ ହୋଇଯିବାରୁ ଆର୍ଥିକ ସମସ୍ୟା ଦେଖାଯାଇଥିଲା। ସ୍ଥିତି ସୁଧୁରିବା ପରେ ମାର୍କେଟ ବିଲ୍ଡିଂରେ ପୁଣି ଦୋକାନ ଖୋଲିଥିଲେ। କିଛି ମାସ ହେବ ସେ ବ୍ୟବସାୟ ପାଇଁ ଫାଇନାନ୍ସରେ ଏକ ବାଇକ୍ ଆଣିଥିଲେ। ଏଥିସହ ମହିଳା ସମିତି ମାଧ୍ୟମରେ ପ୍ରାୟ ୧ ଲକ୍ଷରୁ ଊର୍ଦ୍ଧ୍ୱ ଟଙ୍କା ଋଣ କରିଥିଲେ। ଗତ ମଙ୍ଗଳବାର ଉଠାଦୋକାନୀଙ୍କୁ ଉଚ୍ଛେଦ ଦାବିରେ ମାର୍କେଟ ବିଲ୍ଡିଂ ବ୍ୟବସାୟୀ ସଂଘ ବଜାର ବନ୍ଦ କରି ଆନ୍ଦୋଳନକୁ ଓହ୍ଲାଇବାରୁ ସୁବାସଙ୍କ ବେପାର ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା। ଶୁକ୍ରବାର ମାର୍କେଟ ବିଲ୍ଡିଂ ଖୋଲିଥିଲେ ମଧ୍ୟ କୋର୍ଟଙ୍କ ନିର୍ଦ୍ଦେଶ ଓ ଭୁବନେଶ୍ୱର ମହାନଗର ନିଗମ (ବିଏମ୍ସି)ର ପଦକ୍ଷେପ ଯୋଗୁ ଉଠାଦୋକାନୀଙ୍କ ବ୍ୟବସାୟକୁ ବାରଣ କରାଯାଇଛି। ବ୍ୟବସାୟ ବନ୍ଦ ହୋଇଯିବା ପରେ ସୁବାସ ମାନସିକ ସ୍ତରରେ ଭାଙ୍ଗି ପଡିଥିଲେ। ମଙ୍ଗଳବାର ମଧ୍ୟାହ୍ନରେ ୨ଝିଅ ଟିଉଶନ ଯାଇଥିଲେ। ଘରେ ଥିବା ସ୍ତ୍ରୀ ରୋଜାଲିନ ପଣ୍ଡିତ୍ ବାଥ୍ରୁମ୍ ଯାଇଥିଲେ। ଏହି ସମୟରେ ସୁବାସ ଏକ ଷ୍ଟୋଲ୍କୁ ବେକରେ ବାନ୍ଧି ଝୁଲି ପଡିଥିଲେ। କିଛି ସମୟ ପରେ ସ୍ତ୍ରୀ ଏହା ଦେଖି ଚିତ୍କାର କରି ଡାକ ପକାଇବାରୁ ନିକଟରେ ବଢ଼େଇ କାମ କରୁଥିବା ଜଣେ ପଡ଼ୋଶୀ ଛୁରି ଆଣି ଉକ୍ତ ଷ୍ଟୋଲ୍କୁ କାଟି ଉଦ୍ଧାର କରିଥିଲେ। ପରେ ଆମ୍ବୁଲାନ୍ସରେ ତାଙ୍କୁ କ୍ୟାପିଟାଲ ହସ୍ପିଟାଲ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ପୋଲିସ ହସ୍ପିଟାଲରେ ପହଞ୍ଚତ୍ଥିଲା।