ବାହାନଗା, ୫।୧୧(ଡି.ଏନ୍.ଏ.): ବାଲେଶ୍ୱର ଜିଲା ବାହାନଗା ବ୍ଳକ ଖରାସାହାପୁର ପଞ୍ଚାୟତର ବାଉଁଶ ଆଡିଆ ସ୍ଥିତ ମାଛ ଧରା କେନ୍ଦ୍ର(ଜେଟି)ର ସମୁଦ୍ର ଭିତରୁ ପୁଣି ଏକ ଟାର୍ଗେଟ ମିଶାଇଲକୁ ଧିବୀରମାନେ ଉଦ୍ଧାର କରିଛନ୍ତି। ଏହାକୁ ଦେଖିବା ପାଇଁ ବାଉଁଶ ଆଡିଆ ଓ ବରଜଦେଉଳୀ ଗାଁଲୋକଙ୍କ ଭିଡ଼ ଜମିଥିଲା। ଏହାପରେ ଗ୍ରାମବାସୀ ଓ ଧିବୀରମାନେ ବାଲେଶର ସ୍ଥିତ ଡିଆରଡିଏ (ପ୍ରତିରକ୍ଷା ଗବେଷଣା ଓ ବିକାଶ ସଂସ୍ଥା ) ଓ ଆଇଟିଆର(ସମ୍ମନିତ ପରିକ୍ଷଣ ଘାଟି)କୁ ଖବର ଦେଇଥିଲେ। କିନ୍ତୁ ଘଟଣାସ୍ଥଳରେ ଅଧିକାରୀଙ୍କ ପହଞ୍ଚିବା ବିଳମ୍ବ ହେବାରୁ ମତ୍ସ୍ୟଜୀବୀମାନେ ଉକ୍ତ ମିଶାଇଲକୁ ଖରାସାହାପୁର ମାଝି ସାହିକୁ ନେଇଆସିଛନ୍ତି। ଏହି ମିଶାଇଲ ମତ୍ସ୍ୟଜୀବୀ ହରିହର ମାଝୀଙ୍କ ଜାଲରେ ବିଳମ୍ବିତ ରାତିରେ ଲାଗିଥିବା ବେଳେ ତାଙ୍କ ୪ଜଣ ସାଥି ଜାଲକୁ ଟାଣି ଭୂଟୁଭୂଟି (ଯନ୍ତ୍ର ଚାଳିତ ଡଙ୍ଗା )ସାହାଯ୍ୟରେ ଗୁରୁବାର ସକାଳେ କୂଳକୁ ଆଣିଥିଲେ। ଏହା ଜେଟିର ୧୦ କିଲୋମିଟର ଦୂର ସମୁଦ୍ର ଭିତରେ ପଡିଥିଲା।
ଏହି ଟାର୍ଗେଟ ମିଶାଇଲକୁ ପ୍ରତିରକ୍ଷା ବିଭାଗ ଗତ ବୁଧବାର ପରିକ୍ଷଣ କରିଥିବା ବେଳେ ତାହା ସମୁଦ୍ର ଭିତରେ ଖସିପଡିଥିବା ଅନୁମାନ କରାଯାଉଛି। ଏହି ମିଶାଇଲି ପ୍ରତିରକ୍ଷା ବିଭାଗର ମାନବ ବିହୀନ ଟାର୍ଗେଟ ଏୟାରକ୍ରାପ୍ଟ ବଂଶୀ ମିଶାଇଲ। ଖବର ଲେଖା ହେବା ପର୍ଯ୍ୟନ୍ତ କୌଣସି ପ୍ରତିରକ୍ଷା ବିଭାଗର ଅଧିକାରୀମାନେ ଘଟଣା ସ୍ଥଳରେ ପହଞ୍ଚି ନ ଥିବା ସୂଚନା ରହିଛି। ସୂଚନାଯୋଗ୍ୟ, ଚଳିତ ବର୍ଷ ଅଗଷ୍ଟ ୧୭ ତାରିଖରେ ରେମୁଣା ବ୍ଲକର ତାଳପଦା ସ୍ଥିତ ଜାମୁକା ମତ୍ସ୍ୟଧରା କେନ୍ଦ୍ରର ମତ୍ସ୍ୟଜୀବୀମାନେ ସମୁଦ୍ର ଭିତରୁ ଜାଲ ସାହାଯ୍ୟରେ ଅଫୁଟା ମିଶାଇଲ ଉଦ୍ଧାର କରିଥିଲେ। ପରେ ପ୍ରତିରକ୍ଷା ବିଭାଗ ପହଞ୍ଚି ଉଦ୍ଧାର ହୋଇଥିବା ମିଶାଇଲକୁ ନେଇଯାଇଥିଲେ।