ନୂଆପଡ଼ା ଅଫିସ,୧୪।୩: ନୂଆପଡା ଜିଲାରେ ପୁଣି ବାଘ ଆତଙ୍କ ଦେଖା ଦେଇଛି। ଏହା ପୂର୍ବରୁ ଅନେକ ଥର ନୂଆପଡା ସଦର ବ୍ଲକ ହଳଦି ଓ ଲୋଡ୍ରା ଗ୍ରାମରେ ବାଘର ଉପସ୍ଥିତି ଦଖାଦେଇଥିବା ବେଳେ ବର୍ତ୍ତମାନ ନୂଆପଡା ବନାଞ୍ଚଳ ଆମାନାରା ବିଟର ମୁସରଙ୍ଗି ସଂରକ୍ଷିତ ଜଙ୍ଗଲ ଅଧୀନ ତରିଆ ମହୁଆଭଟା ଗ୍ରାମରେ ବାଘ ଭୟ ଦେଖାଇଛି। ଭୟରେ ଲୋକେ ନିଜ କ୍ଷେତ କିମ୍ବା ଦିନ ମଜୁରୀ କରିବାକୁ ଯାଇପାରୁନାହାନ୍ତି। ଗତ ୬ ତାରିଖରେ ବାଘ ଗୋଟିଏ ଗାଈକୁ ଶିକାର କରିଥିବା ବେଳେ ୮ରେ ଆଉ ଏକ ଗାଈ ଓ ୧୨ରେ ଏକ ବାଛୁରୀକୁ ଶିକାର କରିଛି। ତେବେ ଶିକାର କରିଥିବା ସ୍ଥାନରେ ପଡିଥିବା ପାଦ ଚିହ୍ନରୁ ଏହା ଏକ କଲରାପତରିଆ ବାଘ ବୋଲି ଆମାନାରା ବିଟ ବନପାଳ ଚୂଡାମଣି ସରାଫ ସ୍ପଷ୍ଟ କରିଛନ୍ତି।
ବଡ ପାଦ ଚିହ୍ନ ସହ ଛୋଟ ବାଘର ପାଦ ଚିହ୍ନ ରହିଥିବାରୁ ମାଈ ବାଘ ସହିତ ଛୁଆ ମଧ୍ୟ ରହିଥିବା ଅନୁମାନ କରାଯାଉଛି। ବର୍ତ୍ତମାନ ସମୟରେ ସମ୍ପୃକ୍ତ ଅଞ୍ଚଳରେ ବନ ବିଭାଗ ପକ୍ଷରୁ ରାତ୍ରୀକାଳିନ ପାଟ୍ରୋଲିଂ ଜାରି ରଖିବା ସହ ଡାକବାଜି ଯନ୍ତ୍ର ସାହାଯ୍ୟରେ ଲୋକଙ୍କୁ ସଚେତନ କରାଯାଇଛି। ମୁସରଙ୍ଗି ସଂରକ୍ଷିତ ଜଙ୍ଗଲତଳି ଗାଁ ପାସାମାରା, ଡାଲିପଖନା, କୋଟେନ, ଦଲଦଲି, ତରିଆ ମହୁଆଭଟା, ଆମାନାରା, ଜରିଡିହି, ପାତାଳଘୁଟକୁରି, ମୋହରାଡିହି, ପାୱାରତୋଳା ଆଦି ଗାଁଗୁଡିକରେ ବନବିଭାଗ କର୍ମଚାରୀ ଲାକଙ୍କୁ ସଚେତନ କରୁଛନ୍ତି। ରାତ୍ରିରେ କିମ୍ବା ଜରୁରୀ କାମ ନ ଥିଲେ ବାହାରକୁ ବାହରନ୍ତୁ ନାହିଁ। ଯଦି ବାହାରକୁ ଯାଉଛନ୍ତି ହାତରେ ଟର୍ଚ୍ଚଲାଇଟ ଓ ଗୋଷ୍ଠୀ ହୋଇ ଯାଆନ୍ତୁ ବୋଲି କୁହାଯାଉଛି। ସନ୍ଧ୍ୟା ହେଲେ ଗୃହପାଳିତ ପଶୁକୁ ସୁରକ୍ଷିତ ସ୍ଥାନରେ ବାନ୍ଧି ରଖିବାକୁ ସଚେତନ କରାଯାଉଛି। ବାଘ ଦିନରେ ପାଖ ଜଙ୍ଗଲକୁ ଚାଲି ଯାଉଛି ଓ ସନ୍ଧ୍ୟା ହେଲେ ଗାଁକୁ ଆସୁଛି। ବାଘର ଗତିବିଧି ଲକ୍ଷ୍ୟ ରଖି ଜଙ୍ଗଲକୁ ଘୋଡାଇବା ପାଇଁ ବନ ବିଭାଗ ସଜାଗ ରହଛି।