ବାଙ୍ଗାଲୋର: ପ୍ରମୁଖ ସୋସିଆଲ ମିଡିଆ ପ୍ଲାଟ୍ଫର୍ମ ଫେସ୍ବୁକ୍ର ବଜାର ଲାଗି ନିଯୁକ୍ତ ପବ୍ଲିକ ପଲିସି ମୁଖ୍ୟ ଆଂକ୍ଷୀ ଦାସ କମ୍ପାନୀ ଛାଡ଼ିଛନ୍ତି। ଏହି ସୋସିଆଲ ମିଡିଆ ପ୍ଲାଟ୍ଫର୍ମରେ ହେଟ୍ କଣ୍ଟେଣ୍ଟର ବ୍ୟାପିବାକୁ ରୋକିବା ଦିଗରେ କମ୍ପାନୀର ରହିଥିବା ଦୁର୍ବଳତାକୁ ନେଇ ସେ ବିବାଦୀୟ ହୋଇ ପଡିଥିଲେ। ପବ୍ଲିକ ସର୍ଭିସ କ୍ଷେତ୍ରରେ କାର୍ଯ୍ୟ କରିବା ଲାଗି ଫେସ୍ବୁକ୍ ଛାଡିବା ନେଇ ଆଂକ୍ଷୀ ନିଷ୍ପତ୍ତି ନେଇଥିବା କମ୍ପାନୀର ଏମ୍ଡି ଅଜିତ ମୋହନ କହିଛନ୍ତି। ଗତ ୯ ବର୍ଷରେ ଭାରତ ବଜାରରେ କମ୍ପାନୀର ଅଭିବୃଦ୍ଧିକୁ ତାଙ୍କର ଯୋଗଦାନ ଗୁରୁତ୍ୱପୂର୍ଣ୍ଣ ବୋଲି ମୋହନ ମତ ପ୍ରକାଶ କରିଛନ୍ତି। ଭାରତ ଭଳି ଏକ ଦ୍ରୁତ ଅଭିବୃଦ୍ଧିଶୀଳ ବଜାରରେ ରାଜନୈତିକ କଣ୍ଟେଣ୍ଟ ନିୟନ୍ତ୍ରଣକୁ ଦିଗରେ ଫେସ୍ବୁକ୍ ଭୂମିକା ଉପରେ ବିଭିନ୍ନ ପ୍ରଶ୍ନବାଚୀ ସୃଷ୍ଟି ହୋଇଛି। ଏହାକୁ ନେଇ କମ୍ପାନୀର କର୍ମଚାରୀମାନେ ମଧ୍ୟ ପ୍ରଶ୍ନ ଉଠାଇଥିଲେ। ଏହାର ଗୋଟିଏ ସପ୍ତାହ ପରେ ଆଂକ୍ଷୀ ଇସ୍ତଫା ଦେଇଥିବା ଜଣାପଡିଛି। ଅପରପକ୍ଷରେ ଲୋକଙ୍କ ଡାଟା ସୁରକ୍ଷାକୁ ନେଇ ମଧ୍ୟ ସୋସିଆଲ ମିଡିଆ ପ୍ଲାଟ୍ଫର୍ମର କାର୍ଯ୍ୟକଳାପ ଉପରେ ମଧ୍ୟ ପ୍ରଶ୍ନ ଉଠୁଥିବା ନଜରକୁ ଆସିଛି। ଏହି ପ୍ରସଙ୍ଗରେ ଆଂକ୍ଷୀ ନିକଟରେ ପାର୍ଲାମେଣ୍ଟର ଯୁଗ୍ମ କମିଟିକୁ ଭେଟିଥିଲେ।