ଦାମନଯୋଡ଼ି,୧୨।୫(ଡି.ଏନ୍.ଏ.): ଭାରତୀୟ ମହାକାଶ ଗବେଷଣା ସଂସ୍ଥା ଇସ୍ରୋର ଯୁବବିଜ୍ଞାନୀ କାର୍ଯ୍ୟକ୍ରମ ୨୦୨୨ ପାଇଁ ଦାମନଯୋଡ଼ି ସ୍ଥିତ ଦିଲ୍ଲୀ ପବ୍ଲିକ ସ୍କୁଲର ଦଶମ ଶ୍ରେଣୀ ଛାତ୍ର ଅଂଶୁମାନ ସାହୁ ମନୋନୀତ ହୋଇଛନ୍ତି। ସର୍ବଭାରତୀୟ ସ୍ତରରେ ୧୫୦ ଜଣ ଛାତ୍ରୀଛାତ୍ରଙ୍କ ମଧ୍ୟରୁ ୫ଜଣଙ୍କ ମଧ୍ୟରେ ଅଂଶୁମାନ ସ୍ଥାନ ପାଇ ଦାମନଯୋଡ଼ି ତଥା କୋରାପୁଟ ଜିଲା ପାଇଁ ଗୌରବ ଆଣିଛନ୍ତି। ଉକ୍ତ କାର୍ଯ୍ୟକ୍ରମ ଚଳିତ ମେ ୧୫ରୁ ୨୯ ତାରିଖ ପର୍ଯ୍ୟନ୍ତ ଦେଶର ବିଭିନ୍ନ ସ୍ଥାନରେ ଅବସ୍ଥିତ ଇସ୍ରୋର ୫ଟି ଶାଖା କେନ୍ଦ୍ରରେ ଅନୁଷ୍ଠିତ ହେବ। ସେଥିରୁ ହାଇଦ୍ରାବାଦସ୍ଥିତ ଜାତୀୟ ସୁଦୂର ସମ୍ବେଦନ କେନ୍ଦ୍ର (ଏନ୍ଆର୍ଏସ୍ସି)ଠାରେ ଅଂଶୁମାନ ମେ ୧୫ରେ ଯୋଗଦେବେ। ସେଠାରେ ବିଭିନ୍ନ କର୍ମଶାଳା ଓ ବୈଜ୍ଞାନିକଙ୍କ ସହ ଆଲୋଚନାରେ ସେ ଅଂଶଗ୍ରହଣ କରିବେ। ମେ ୨୬ରୁ ୨୮ ପର୍ଯ୍ୟନ୍ତ ଶ୍ରୀହରିକୋଟାସ୍ଥିତ ସତୀଶ ଧାୱନ ମହାକାଶ କେନ୍ଦ୍ର (ଏସ୍ଡିଏସ୍ସି) ଓ ରକେଟ ଉତ୍କ୍ଷେପଣ କେନ୍ଦ୍ର ପରିଦର୍ଶନ କରି ଇସ୍ରୋ ଅଧ୍ୟକ୍ଷଙ୍କ ସହ ଆଲୋଚନା କରିବାର ସୁଯୋଗ ପାଇବେ ଅଂଶୁମାନ। ତାଙ୍କର ଏହି ସଫଳତା ପାଇଁ ତାଙ୍କୁ ବିଦ୍ୟାଳୟ ଅଧ୍ୟକ୍ଷା ଦୀପାନ୍ବିତା ଦାସଙ୍କ ସହ ସମସ୍ତ ଶିକ୍ଷୟିତ୍ରୀ ଶିକ୍ଷକ ଅଭିନନ୍ଦନ ଜଣାଇଛନ୍ତି। ସୂଚନାଯୋଗ୍ୟ, ଅଂଶୁମାନ ନାଲ୍କୋ ଟାଉନଶିପ ସରସ୍ବତୀ ବିଦ୍ୟାମନ୍ଦିରିରେ କାର୍ଯ୍ୟରତ ଶିକ୍ଷକ ରବୀନ୍ଦ୍ର ସାହୁ ଓ ପ୍ରାଣୀଧନ ନିରୀକ୍ଷକ ରୂପେ କାର୍ଯ୍ୟରତା ନିର୍ମଳା ସାହୁଙ୍କ ପୁଅ।