Categories: ଜାତୀୟ

୨ ସପ୍ତାହ ମଧ୍ୟରେ ଉତ୍ତର ଦିଅ

ନୂଆଦିଲ୍ଲୀ,୨୧।୧: ନିର୍ଦ୍ଦେଶ କାର୍ଯ୍ୟକାରୀ କରି ନ ଥିବାରୁ ଗଞ୍ଜାମ ଜିଲାପାଳଙ୍କୁ ନ୍ୟାଶନାଲ ଗ୍ରୀନ୍‌ ଟ୍ରିବ୍ୟୁନାଲ(ଏନ୍‌ଜିଟି) ଶୁକ୍ରବାର ନୋଟିସ ଜାରି କରିଛନ୍ତି। ଜିଲାରେ ଥିବା ଟେକ୍‌ ହୋମ୍‌ ରାଶନ ଛତୁଆ ଫ୍ୟାକ୍ଟ୍ରିକୁ ବନ୍ଦ କରିବା ଦିଗରେ ପଦକ୍ଷେପ ନେବା ଲାଗି ପୂର୍ବରୁ ଏନ୍‌ଜିଟି ଜିଲାପାଳଙ୍କୁ ନିର୍ଦ୍ଦେଶ ଦେଇଥିଲେ ହେଁ ତାହା କାର୍ଯ୍ୟକାରୀ ହୋଇନାହିଁ। ନ୍ୟାୟିକ ସଦସ୍ୟ ବି. ଅମିତ୍‌ ଷ୍ଟାଲେକର ଏବଂ ବିଶେଷଜ୍ଞ ସଦସ୍ୟ ସାଇବାଲ ଦାସଗୁପ୍ତା ଜିଲାପାଳଙ୍କୁ ୨ ସପ୍ତାହ ମଧ୍ୟରେ ଜବାବ ଦାଖଲ କରିବାକୁ କହିଛନ୍ତି। ନିର୍ଦ୍ଦେଶ ପାଳନ କରି ନ ଥିବାରୁ ଏନ୍‌ଜିଟି ଆଇନ ୨୦୧୦ ଅନୁଯାୟୀ ଜିଲାପାଳଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇପାରେ ବୋଲି ଖଣ୍ଡପୀଠ ସତର୍କ କରାଇଦେଇଛନ୍ତି।
ଟେକ୍‌ ହୋମ ରାଶନ ଛତୁଆ କାରଖାନା ପରିବେଶର କ୍ଷତି କରିଥିବାରୁ ଏହାଠାରୁ ୧.୮୭ କୋଟି ଟଙ୍କା ପରିବେଶ କ୍ଷତିପୂରଣ ଆଦାୟ ଲାଗି ପଦକ୍ଷେପ ନେବାକୁ ୨୦୨୧ ଅକ୍ଟୋବରରେ ଟ୍ରିବ୍ୟୁନାଲ ଓଡ଼ିଶା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡକୁ ନିର୍ଦ୍ଦେଶ ଦେଇଥିଲେ। ଗଞ୍ଜାମ ଜିଲାର ରଙ୍ଗେଇଲୁଣ୍ଡା ବ୍ଲକ୍‌ ଇନ୍ଦ୍ରାଖିଠାରେ ବଜରଙ୍ଗବାଲି ମହିଳା ସ୍ବୟଂସହାୟକ ଗୋଷ୍ଠୀର ଉକ୍ତ କାରଖାନାକୁ ବନ୍ଦ କରିଦେବା ଲାଗି ଖଣ୍ଡପୀଠ ଗଞ୍ଜାମ ଜିଲାପାଳଙ୍କୁ ନିର୍ଦ୍ଦେଶ ଦେଇଥିଲେ। ନିର୍ଦ୍ଦେଶ ଅବମାନନା କଲେ ଏହାର ଲାଇସେନ୍ସ ରଦ୍ଦ କରିବାକୁ କୁହାଯାଇଥିଲା। କ୍ଷତିପୂରଣ ଆଦାୟ ଲାଗି ଉକ୍ତ କାରଖାନା ବିରୋଧରେ ମାମଲା ରୁଜୁ ହୋଇଥିବା ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ସତ୍ୟପାଠ ମାଧ୍ୟମରେ ଏନ୍‌ଜିଟିଙ୍କୁ ଜଣାଇଥିବାବେଳେ ଗଞ୍ଜାମ ଜିଲାପାଳ କୌଣସି ସତ୍ୟପାଠ ଦାଖଲ କରି ନ ଥିଲେ।

Share