ନୂଆଦିଲ୍ଳୀ, ୧୪ା୬(ପି.ଟି): ଜୁନିୟର ମହିଳା ଏସିଆ କପ୍ ହକି ଚାମ୍ପିୟନ ଭାରତୀୟ ଦଳର ଫରଓ୍ବାର୍ଡ ଅନୁ ନିଜ ମାତାପିତାଙ୍କୁ ସ୍ମାର୍ଟଫୋନ୍ ଗିଫ୍ଟ କରିବା ନେଇ ଇଚ୍ଛା ପ୍ରକାଶ କରିଛନ୍ତି। ଟୁର୍ନାମେଣ୍ଟରେ ଡବଲ୍ ହ୍ୟାଟ୍ରିକ୍ ଅର୍ଜନ କରିବା ସହିତ ଅନୁ ୯ଟି ଗୋଲ ଦେଇ ଭାରତ ପାଇଁ ସର୍ବାଧିକ ସ୍କୋରର ରହିଥିଲେ। ଏପରିକି ଫାଇନାଲ ମ୍ୟାଚରେ ମଧ୍ୟ ସେ ଭାରତ ପକ୍ଷରୁ ପ୍ରଥମ ଗୋଲ ଦେଇଥିଲେ। ତେବେ ଅନୁଙ୍କ ମାତାପିତା ମ୍ୟାଚ୍ ଦେଖିବାରେ ସମର୍ଥ ହୋଇ ନ ଥିଲେ। ମ୍ୟାଚ୍ଟି ଟିଭି ପରିବର୍ତ୍ତେ ଏକ ଓ୍ବେବ୍ସାଇଟ୍ରେ ପ୍ରସାରିତ ହେଉଥିଲା, ଯାହାଫଳରେ ସ୍ମାର୍ଟଫୋନ ଠାରୁ ଦୂରରେ ଥିବା ଅନୁଙ୍କ ମାତାପିତା ମ୍ୟାଚ୍ ଦେଖି ପାରି ନ ଥିଲେ। ଏପରିକି ଅନୁ ଚାମ୍ପିୟନ ହୋଇ ଫେରିଛନ୍ତି ବୋଲି ଘରଲୋକଙ୍କୁ ମଧ୍ୟ ଜଣା ନ ଥିଲା। ବର୍ତ୍ତମାନ ସ୍ମାର୍ଟଫୋନ୍ କିଣି ଉପହାର ଭାବରେ ମାତାପିତାଙ୍କୁ ପ୍ରଦାନ କରିବି, ଯାହା ଦ୍ୱାରା ଭବିଷ୍ୟତରେ କୌଣସି ମ୍ୟାଚ୍ ଦେଖିବାରୁ ସେମାନେ ବଞ୍ଚିତ ହେବେ ନାହିଁ ବୋଲି କହିଛନ୍ତି ଅନୁ।
ଭାରତରେ ଆଥ୍ଲେଟମାନେ ସର୍ବଦା ଦାରିଦ୍ର୍ୟର କଷାଘାତ ମଧ୍ୟରୁ ଉପରକୁ ଉଠିଥାନ୍ତି। ଅନୁଙ୍କ କାହାଣୀ ମଧ୍ୟ ଏହାଠାରୁ ଭିନ୍ନ ନୁହେଁ। ହରିୟାଣାର ଜିନ୍ଦ ଜିଲା ଅନ୍ତର୍ଗତ ରୋଜ ଖେରା ଅଞ୍ଚଳରୁ ଆରମ୍ଭ ତାଙ୍କର ଯାତ୍ରା। ପିତା ରାଜ ପାଲ ଜଣେ କୃଷି ଶ୍ରମିକ ଭାବରେ କାମ କରନ୍ତି ଏବଂ ସମୟ ସମୟରେ ଇଟାଭାଟିରେ ମଧ୍ୟ କାମ କରନ୍ତି। ସ୍ବଳ୍ପ ମଜୁରିରେ ପରିବାର ପ୍ରତିପୋଷଣ କରିବା କଷ୍ଟ ହେଉଥିବା ବେଳେ ଅନେକ ସମୟରେ ଖାଲି ପେଟରେ ଶୋଇବାକୁ ପଡିଥାଏ। ଅନୁଙ୍କ ମା’ ମେରୁଦଣ୍ଡଜନିତ ସମସ୍ୟାରେ ପୀଡିତ। ଅନୁଙ୍କୁ ଜଣେ ହକି ଖେଳାଳି ଭାବରେ ଗଢି ତୋଳିବା ପାଇଁ ମାତାପିତାଙ୍କ ଅବଦାନ ଅତୁଳନୀୟ ବୋଲି ଅନୁ କହିଛନ୍ତି। ଭାରତୀୟ ଦଳର ଖେଳାଳି ରାଣୀ ରାମପାଲ୍ ଓ ସବିତା ପୁନିଆଙ୍କ ପରି ସଂଘର୍ଷର କଷାଘାତରୁ ଆସିଥିବା ଅନୁ ମଧ୍ୟ ଆଗାମୀ ଦିନରେ ଭାରତୀୟ ସିନିୟର ଦଳ ପାଇଁ ଲକ୍ଷ୍ୟ ରଖିଛନ୍ତି।
ଆରମ୍ଭରୁ ମୋର ଦୁଇଟି ଲକ୍ଷ୍ୟ ରହିଛି। ପରିବାର ତଥା ମାତାପିତାଙ୍କୁ ଏକ ଉତ୍ତମ ଜୀବନଶୈଳୀ ପ୍ରଦାନ କରିବା ସହିତ ଦେଶର ପ୍ରତିନିଧିତ୍ୱ କରିବା ମୋର ଏକମାତ୍ର ଲକ୍ଷ୍ୟ। ଅନୁ ଯେକୌଣସି ଟୁର୍ନାମେଣ୍ଟରୁ ଆର୍ଥିକ ପୁରସ୍କାର ପାଇଥାଆନ୍ତି ଏହା ଘରର ଋଣ ଶୁଝିବାରେ ଲାଗିଥାଏ ବୋଲି କହିଛନ୍ତି ମାତାପିତା । ହରିୟାଣା ରାଜ୍ୟ ଦଳରେ ସ୍ଥାନ ପାଇବା ପରଠାରୁ ଅର୍ଥସଙ୍କଟ ଧୀରେ ଧୀରେ ହ୍ରାସ ପାଇବାରେ ଲାଗିଛି ବୋଲି କହିଛନ୍ତି ଅନୁ।
ଚତୁର୍ଥ ଶ୍ରେଣୀରୁ ହକି ଖେଳିବା ଆରମ୍ଭ କରିଥିବା ବେଳେ ମାତାପିତାଙ୍କୁ ନାନା କଥା ଶୁଣିବାକୁ ମିଳୁଥିଲା। ତେବେ ଏଥିପ୍ରତି କର୍ଣ୍ଣପାତ ନ କରି ଉଭୟେ ଅନୁଙ୍କୁ ସମର୍ଥନ କରିଥିଲେ। ଖେଳିବା ପାଇଁ ପିତା ମୋତେ ବିଭିନ୍ନ ସ୍ଥାନକୁ ନେଇ ଯାଉଥିବା ବେଳେ ଏହାକୁ ବିଭିନ୍ନ ଆଡୁ ସମାଲୋଚନା କରାଯାଉଥିଲା। ତେବେ ବର୍ତ୍ତମାନ ପୂରା ଗାଁ ଉତ୍ସବମୁଖର ହୋଇ ଉଠିଛି। ଆରମ୍ଭରୁ ମୋ ପିତା ମୋ ଉପରେ ଦେଖାଇଥିବା ବିଶ୍ୱାସର ଏହା ବିଜୟ ବୋଲି କହିଛନ୍ତି ଅନୁ।
ଅନୁଙ୍କ କ୍ୟାରିୟରରେ ହିସାରସ୍ଥିତ ଭାରତୀୟ କ୍ରୀଡା ପ୍ରାଧିକରଣ(ସାଇ)ର ମୁଖ୍ୟ କୋଚ୍ ଆଜାଦ ସିଂଙ୍କ ଭୂମିକା ମଧ୍ୟ ବେଶ୍ ଗୁରୁତ୍ୱପୂର୍ଣ୍ଣ। ମୋ ପରିବାରର ସମସ୍ୟା ସମ୍ପର୍କରେ ଆଜାଦ ସାର ସବୁ କିଛି ଜାଣିଥିବା ବେଳେ ଆବଶ୍ୟକ ସମୟରେ ସହଯୋଗ କରିଥାନ୍ତି ବୋଲି କହିଛନ୍ତି ଅନୁ। ଅନୁଙ୍କ ଭାଇ ବର୍ତ୍ତମାନ ଭାରତୀୟ ସେନାରେ କାର୍ଯ୍ୟରତ ଅଛନ୍ତି। ଭାରତୀୟ ଦଳର ମୁଖ୍ୟ କୋଚ୍ ଜାନେକ୍ ଶପ୍ମ୍ୟାନଙ୍କ ଉପଦେଶ ତାଙ୍କ ପାଇଁ ବେଶ୍ ଲାଭଦାୟକ ସାବ୍ୟସ୍ତ ହୋଇଛି ବୋଲି ଅନୁ କହିଛନ୍ତି। ଭାରତ ପରି କ୍ରିକେଟ ପାଗଳ ଦେଶରେ ହକି ତଥା ଜୁନିୟର ମହିଳା ହକିକୁ ଏତେ ଆଦୃତି ମିଳିବା ଏକ ବଡ କଥା ବୋଲି ଅନୁ କହିଛନ୍ତି। ପ୍ରଥମେ ଜୁନିୟର ପୁରୁଷ ଓ ପରେ ଜୁନିୟର ମହିଳା ଦଳ ଚାମ୍ପିୟନ ହୋଇଥିବା ବେଳେ ଏହା ଆଗାମୀ ଦିନରେ ହକି ଖେଳକୁ ଅଧିକ ଲୋକପ୍ରିୟ କରିବାରେ ସହାୟକ ହେବ।