ଅନୁଗୋଳ ଅଫିସ,୧।୪ ୧୯୯୩ ଏପ୍ରିଲ ୧ରେ ଜିଲା ମାନ୍ୟତା ପାଇଥିବା ଅନୁଗୋଳ ୨୯ ବର୍ଷରେ ପଦାର୍ପଣ କରିଛି। ତେଣୁ ଏପ୍ରିଲ୍ ୧ ଶୁକ୍ରବାର ଓଡ଼ିଶା ଦିବସ ସହ ଜିଲାର ଏହି ପ୍ରତିଷ୍ଠା ଦିବସକୁ ବେଶ୍ ଧୁମ୍ଧାମରେ ପାଳନ କରିବାକୁ ଅନୁଗୋଳ ଜିଲା ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି। କୋଭିଡ୍ କାରଣରୁ ଗତ ୨ ବର୍ଷ ଧରି ଏହି ଦିବସ ପାଳନ କେବଳ ସଭାସମିତିରେ ସୀମିତ ରହିଥିବା ବେଳେ ଚଳିତବର୍ଷ ଏହା ଅତ୍ୟନ୍ତ ଆଡ଼ମ୍ବରପୂର୍ଣ୍ଣ ହେବ। ପୂର୍ବପରି ରାସ୍ତାକୁ ଫେରିବ ରାହାଗିରି। ସେହିପରି ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ଜିଲାବାସୀଙ୍କ ମନକୁ ଅତ୍ୟନ୍ତ ପ୍ରଫୁଲ୍ଲ କରିଦେବ।
ପ୍ରଶାସନର କାର୍ଯ୍ୟସୂଚୀ ଅନୁଯାୟୀ ଭୋର୍ ୪ଟା ୩୦ରୁ ସହରରେ ବନ୍ଦେ ଉତ୍କଳ ଜନନୀ ସଙ୍ଗୀତ ପରିବେଷଣ କରାଯିବ। ସକାଳ ୭ଟାରେ ବରପୁତ୍ରମାନଙ୍କ ପ୍ରତିମୂର୍ତ୍ତିରେ ସାମୂହିକ ମାଲ୍ୟାର୍ପଣ, ୭ଟା ୪୫ରେ ଗାନ୍ଧୀ ପାର୍କସ୍ଥିତ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ, ପୂର୍ବାହ୍ନ ୮ଟା ୩୦ରେ ଅନୁଗୋଳ ରକ୍ତ ଭଣ୍ଡାରଠାରେ ରକ୍ତଦାନ ଶିବିର ଆୟୋଜନ, ଅପରାହ୍ନ ୬ଟାରେ ଜିଲା ପରିଷଦ ସମ୍ମିଳନୀ କକ୍ଷରେ ସାଧାରଣ ସଭା ଓ ପୁରସ୍କାର ବିତରଣ ଏବଂ ସନ୍ଧ୍ୟା ୭ଟାରେ ଜିଲା ସଂସ୍କୃତି ପରିଷଦଠାରେ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଛି। ସେହିପରି ସକାଳ ୬ଟାରୁ ୯ଟା ପର୍ଯ୍ୟନ୍ତ ରାହଗିରି ଅନୁଷ୍ଠିତ ହେବ। ଅନୁଗୋଳ ଜଗନ୍ନାଥ ମନ୍ଦିରଠାରୁ ବିଇଡି ଛକଯାଏ ରାସ୍ତା ଉପରେ ଲୋକେ ଉତ୍ସବ ମନାଇବେ। ଗୀତ, ନାଚ, ଖେଳ, ସାଇକେଲ ଚାଳନା ଆଦି କରିବେ। ଅପରପକ୍ଷରେ ୨୯ ବର୍ଷରେ ପଦାର୍ପଣ କରିଥିବା ଅନୁଗୋଳ ଜିଲାର ବିକାଶ ଦିଗରେ ପ୍ରଶାସନ ପକ୍ଷରୁ ଶତପ୍ରତିଶତ ଉଦ୍ୟମ ଜାରି ରହିଛି। ଜିଲାବାସୀଙ୍କୁ ଉତ୍ତମ ସ୍ବାସ୍ଥ୍ୟସେବା ଯୋଗାଇ ଦେବାକୁ ପ୍ରାଧାନ୍ୟ ଦିଆଯାଉଛି। ଚାଷ ଜମିକୁ ଜଳସେଚନ ନେଇ ଥିବା ଅସୁବିଧା ଦୂର ଦିଗରେ ପ୍ରଚେଷ୍ଟା ଚାଲିଛି। ମିଲେଟ ମିଶନରେ କିପରି ଅଧିକ ଚାଷୀ ସାମିଲ ହୋଇପାରିବେ ତାହା ଉପରେ ଗୁରୁତ୍ୱ ଦିଆଯାଉଛି। ଗଁାଠାରୁ ସହର ଯାଏ ପାନୀୟ ଜଳ ସମସ୍ୟାର ସମାଧାନ ପାଇଁ ପ୍ରୟାସ କରାଯାଉଛି। ଜିଲାର ବିଭିନ୍ନ ପର୍ଯ୍ୟଟନସ୍ଥଳୀର ଉନ୍ନତୀକରଣ ସହ ଏହାକୁ ନେଇ ଏକ ପର୍ଯ୍ୟଟନ ସର୍କିଟ କରାଯାଉଛି। ଯୁବତୀ ଯୁବକଙ୍କୁ ରୋଜଗାର, ନିଯୁକ୍ତି ଦେବାକୁ ଦକ୍ଷତା ବିକାଶ ଉପରେ ଗୁରୁତ୍ୱ ଦିଆଯାଉଛି। ଆଦର୍ଶ ବିଦ୍ୟାଳୟରେ ବିଦେଶୀ ଭାଷାରେ ଶିକ୍ଷାଦାନ ଯୋଜନା ରଖାଯାଇଛି। ଇତିମଧ୍ୟରେ ଅନୁଗୋଳ ସହରର ସୌନ୍ଦର୍ଯ୍ୟକରଣ କରାଯାଇଥିବାବେଳେ ତାଳଚେର ସହରକୁ ସ୍ବଚ୍ଛ ଓ ସୁନ୍ଦର କରିବା କାର୍ଯ୍ୟ ଚାଲିଛି। ଷ୍ଟାଡିୟମ, ହେଲ୍ଥ କରିଡର, ବସ୍ଷ୍ଟାଣ୍ଡ ଆଦି ନିର୍ମାଣ ହେଉଛି। ବିଶ୍ୱସ୍ତରୀୟ କୋଲ୍ ମ୍ୟୁଜିୟମ କରାଯାଉଛି। ଅନୁଗୋଳରେ ଅତ୍ୟାଧୁନିକ ବସ୍ଷ୍ଟାଣ୍ଡ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି। ଇ-ଲାଇବ୍ରେରି, ତୃଣମୂଳସ୍ତରରୁ କ୍ରୀଡ଼ାବିତ୍ ସୃଷ୍ଟି କରିବା ପାଇଁ କ୍ରୀଡ଼ା ଉତ୍ସବମାନ ଆୟୋଜନ ସହ ମିନି ଷ୍ଟାଡିୟମ ନିର୍ମାଣ ହେଉଛି। ୨୦୨୩ ସୁଦ୍ଧା ଏସବୁ କାର୍ଯ୍ୟ ଶେଷ କରାଯିବାକୁ ଲକ୍ଷ୍ୟ ରଖାଯାଇଥିବା ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ସୂଚନା ଦେଇଛନ୍ତି।