ଅନୁଗୋଳ ଅଫିସ, ୧୦।୭: ଅନୁଗୋଳରେ ଗତ ୫ ବର୍ଷରେ ୯ଥର ମାଓବାଦୀ କାର୍ଯ୍ୟକଳାପ ଦେଖାଦେଇଛି। ସେଥିମଧ୍ୟରୁ ୬ଥର ପୋଲିସ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି। ଏ ନେଇ ଶୁକ୍ରବାର ଆୟୋଜିତ ଏକ ଖବରଦାତା ସମ୍ମଳନୀରେ ଅନୁଗୋଳ ଏସ୍ପି ଜଗମୋହନ ମୀନା ସୂଚନା ଦେଇଛନ୍ତି।
ଅନୁଗୋଳ ଜିଲାକୁ ମାଓବାଦୀ ପ୍ରବଣ ଜିଲାରୁ ମୁକ୍ତ କରାଯିବା ପରେ ଏସ୍ପି ଏହି ସୂଚନା ଦେଇଛନ୍ତି। ଏଥିସହ ମାଓ କାର୍ଯ୍ୟକଳାପ ଉପରେ ଜିଲାରେ ଥିବା ଗୁଇନ୍ଦା ବିଭାଗ ଓ ଅନୁଗୋଳ ପୋଲିସ ଦୃଷ୍ଟି ରଖିବ ବୋଲି ଏସ୍ପି ମୀନା କହିଛନ୍ତି। ଅନ୍ୟପକ୍ଷରେ ଏସ୍ଓଜିରୁ ପ୍ରଶିକ୍ଷଣ ନେଇଥିବା ଗୋଟିଏ ପ୍ଲାଟୁନ କମାଣ୍ଡୋ ଜିଲାରେ ମୁତୟନ ଅଛନ୍ତି। ଯଦି କୌଣସି ମାଓ କାର୍ଯ୍ୟକଳାପ ଦେଖାଦେବ ସେମାନଙ୍କୁ ନେଇ ଅପରେସନ କରାଯିବ। ଆବଶ୍ୟକ ପଡିଲେ ଏସ୍ଓଜି ରିକ୍ୟୁସନ ମଧ୍ୟ କରାଯିବ ବୋଲି ସେ କହିଛନ୍ତି।
ସୂଚନାଯୋଗ୍ୟ ଯେ, ୨୦୧୮ରେ ଅନୁଗୋଳରେ ଶେଷଥର ପାଇଁ ମାଓ କାର୍ଯ୍ୟକଳାପ ଦେଖାଦେଇଥିଲା। ଏହାପରେ ମାଓବାଦୀ କାର୍ଯ୍ୟକଳାପ ଦେଖା ନ ଦେବାରୁ ଏସ୍ଆର୍ଇକୁ ରାଜ୍ୟ ସରକାର ପ୍ରତ୍ୟାହାର କରିଥିବା ଏସପି ମୀନା ସୂଚନା ଦେଇଛନ୍ତି।