ବମ୍ବେ: ଭଜନ ସମ୍ରାଟ ଅନୁପ ଜଲୋଟା ଉଭୟ ଗାୟକ ଏବଂ ଗୀତିକାର ଭାବେ ସଙ୍ଗୀତଜଗତରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି। ଗାଇବା ବ୍ୟତିତ ସେ କିଛି ସମୟ ପାଇଁ ଟେଲିଭିଜନ ଉପସ୍ଥାପକ ଭାବେ କାମ କରିଥିଲେ। ଆଜି ତାଙ୍କ ଶୁଭ ଜନ୍ମଦିନ ଅବସରରେ ଆସନ୍ତୁ ଜାଣିବା ଜୀବନକୁ ନେଇ କିଛି ରୋଚକ ତଥ୍ୟ….
ବିବାଦୀୟ ଶୋ’ ବିଗବସ୍ରେ ପ୍ରତିଯୋଗୀ ଭାବେ ଭାଗ ନେଇଥିଲେ ଅନୁପ। ଏହି ସମୟରେ ୨୮ ବର୍ଷୀୟ ଜସଲିନ୍ ମଥାରୁଙ୍କ ସହ ତାଙ୍କର ସମ୍ପର୍କ ଚର୍ଚ୍ଚାରେ ରହିଥିଲା। ଏହାପୂର୍ବରୁ ଅନୁପଙ୍କର ତିନୋଟି ବିବାହ ହୋଇଥିଲା। ତାଙ୍କର ପ୍ରଥମ ସ୍ତ୍ରୀଙ୍କ ନାମ ସୋନାଲୀ ସେଠ। ସେ ଜଣେ ଗୁଜରାଟୀ ଝିଅ ଥିଲେ। ହେଲେ ଅନୁପଙ୍କ ପରିବାରଲୋକେ ତାଙ୍କୁ କେବେହେଲେ ଆପଣାଇ ନ ଥିଲେ। ବତ୍ତି ଯୋଗୁ ସେମାନେ ଭଲ ଦମ୍ପତି ପାଲଟିଥିଲେ। ହେଲେ ଏହା ବେଶୀ ଦିନ ଚାଲି ନ ଥିଲା। ଉଭୟ ଅଲଗା ହୋଇଯାଇଥିଲେ। ପରେ ସୋନାଲୀ ରୂପ କୁମାର ରାଠୋଡଙ୍କୁ ବିବାହ କରିଥିଲେ। ଏହାପରେ ଅନୁପ ବିନା ଭାଟିଆଙ୍କୁ ବିବାହ କରି ଛାଡ଼ପତ୍ର ଦେଇଥିଲେ। ତୃତୀୟ ଥର ପାଇଁ ସେ ମେଧା ଗୁଜ୍ରାଲଙ୍କୁ ବିବାହ କରିଥିଲେ। ଏହା ସେତେବେଳେ ଚର୍ଚ୍ଚାର ବିଷୟ ପାଲଟିଥିଲା। କାରଣ ସେ ପୂର୍ବ ପ୍ରଧାନମନ୍ତ୍ରୀ ଆଇ. କେ ଗୁଜରାଲଙ୍କ ଭାଣେଜୀ ଥିଲେ। ଉଭୟଙ୍କ ଏକ ପୁଅ ଆର୍ଯ୍ୟମାନ ଜନ୍ମ ହୋଇଥିଲା। ପରେ ଯକୃତ ଖରାପ ହୋଇଯିବା କାରଣରୁ ମେଧାଙ୍କ ଦେହାନ୍ତ ହୋଇଥିଲା।
ପ୍ରେମସମ୍ପର୍କ ବ୍ୟତିତ କଲେଜ ଦିନରେ ଅନୁପ ଜଣେ ଭଲ କ୍ରିକେଟର ଭାବେ ଜଣାଥିଲେ। ପରେ ରେଡିଓ ତାଙ୍କୁ ଖ୍ୟାତି ଦେଇଥିଲା। ଗୋଟିଏ ପରେ ଗୋଟିଏ ଗୀତ ହିଟ୍ ହେବା କାରଣରୁ ସେ ଭଜନ ସମ୍ରାଟ ଭାବେ ଜଣାଶୁଣା ହୋଇଥିଲେ। ଭାରତ ସରକାରଙ୍କ ପକ୍ଷରୁ ତାଙ୍କର ସଙ୍ଗୀତ କ୍ଷେତ୍ରରେ ଅବଦାନକୁ ଦେଖି ପଦ୍ମଶ୍ରୀ ସମ୍ମାନରେ ସମ୍ମାନିତ କରାଯାଇଛି।
