ନୂଆଦିଲ୍ଲୀ,୧୧।୧୨: ଭାରତୀୟ କ୍ରିକେଟ ଟିମ୍ର ଅଧିନାୟକ ବିରାଟ କୋହଲୀଙ୍କ ଆଜି ବିବାହ ବାର୍ଷିକୀ। ୨୦୧୭ ଡିସେମ୍ବର ୧୧ରେ ଲୋକପ୍ରିୟ ଅଭିନେତ୍ରୀ ଅନୁଷ୍କା ଶର୍ମାଙ୍କ ହାତ ଧରିଥିଲେ ବିରାଟ। ୨୯ ବର୍ଷରେ ବିବାହ କରୁଥିବା ହେତୁ ଅନୁଷ୍କାଙ୍କ ପ୍ରଶଂସକ ସେତେବେଳେ ନିରାଶ ହୋଇଥିଲେ। କ୍ୟାରିୟର ଗଢ଼ିବା ସମୟରେ ବିବାହ ନିଷ୍ପତ୍ତି ଠିକ୍ ନୁହେଁ ବୋଲି ସେମାନେ କହିଥିଲେ। ମାତ୍ର ଅନୁଷ୍କା ପ୍ରେମରେ ଥିବା କହିବା ସହ ଏବେ ବିବାହ କରିବା ଠିକ୍ ବୋଲି କହି ସମସ୍ତଙ୍କୁ ଚୁପ୍ କରାଇଦେଇଥିଲେ। ନିକଟରେ ସେ ଏକ ସାକ୍ଷାତକାରରେ ବିବାହ ସହ ଜଡ଼ିତ କିଛି ମଜାଦାର କଥା ପ୍ରଶଂସକଙ୍କ ସହ ବାଣ୍ଟିଛନ୍ତି।
ବିବାହର ପାରମ୍ଭିକ ଦିନଗୁଡ଼ିକରେ ବିରାଟଙ୍କୁ ଭେଟିପାରୁ ନ ଥିଲେ ଅନୁଷ୍କା। ଦୀର୍ଘ ୬ ମାସ ମଧ୍ୟରେ ସେମାନେ କେବଳ ୨୧ ଦିନ ସାଙ୍ଗରେ ରହିଥିଲେ। କାରଣ ଉଭୟ ବହୁତ ବ୍ୟସ୍ତ ରହୁଥିଲେ। ଫଳରେ ଅନୁଷ୍କା ଦିନ ଗଣୁଥିଲେ। କେବଳ ବିରାଟଙ୍କ ସହ ଭୋଜନ କରିବାକୁ ସେ ବିଦେଶ ଗସ୍ତ କରୁଥିଲେ। ପରବର୍ତ୍ତୀ ସମୟରେ ଅଧିକ ସମୟ ବିତାଇବା ପାଇଁ ଅନୁଷ୍କା କମ୍ କାମ କରିଥିଲେ। ଏଣୁ ୩ ବର୍ଷରେ ମାତ୍ର ୫ଟି ଫିଲ୍ମ କରିଛନ୍ତି ସେ। ସଞ୍ଜୁ, ଜିରୋ, ପରୀ, ସୁଈ ଧାଗା, ଅଗ୍ରେଜି ମିଡିୟମ ଭଳି ଫିଲ୍ମରେ ତାଙ୍କ ଅଭିନୟକୁ ପ୍ରଶଂସା କରାଯାଇଛି।