ନୂଆଦିଲ୍ଲୀ,୨୯।୩: ଭାରତୀୟ ପୂର୍ବତନ ଅଧିନାୟକ ବିରାଟ କୋହଲିଙ୍କ ସହ ପତ୍ନୀ ତଥା ବଲିଉଡ୍ ଅଭିନେତ୍ରୀ ଅନୁଷ୍କା ଶର୍ମାଙ୍କ ଏକ ଫଟୋ ସାମ୍ନାକୁ ଆସିଛି। ଯାହା ସୂଚାଇ ଦେଉଛି ଯେ, ଅନୁଷ୍କା ମଧ୍ୟ ଆରସିବିର ବାୟୋ-ବବଲରେ ପ୍ରବେଶ କରିଛନ୍ତି। ଏହି ଫଟୋକୁ ବିରାଟ କୋହଲି ନିଜେ ଶେୟାର କରିଥିବା ବେଳେ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏଥିସହ ସେ ଏକ ହାର୍ଟ ଇମୋଜି ମଧ୍ୟ ଶେୟାର କରିଥିବା ଦେଖିବାକୁ ମିଳିଛି। ଏହି ଫଟୋରେ ଦୁହେଁ ବେଶ୍ ଖୁସି ଥିବାର ନଜର ଆସିଛନ୍ତି। ତେବେ ବିରାଟଙ୍କ ଖୁସି ହେବାରେ ମଧ୍ୟ ଯଥାର୍ଥ ରହିଛି। କାରଣ ବାୟୋ-ବବଲରେ ଦୀର୍ଘ ସମୟ ରହିବା ଜଣେ ଖେଳାଳିଙ୍କ ମାନସିକ ସ୍ବାସ୍ଥ୍ୟକୁ କ୍ଷତି ପହଞ୍ଚାଇଥାଏ। ଏଭଳି ପରିସ୍ଥିତିରେ କେହି ନିଜର ବ୍ୟକ୍ତି ଯଦି ତାଙ୍କ ସହ ଥାଆନ୍ତି ତେବେ ଏହି କ୍ଷତିକୁ ଏଡାଇ ଦିଆଯାଇପାରେ।
