ବଲିଉଡ୍ ଅଭିନେତ୍ରୀ ଅନୁଷ୍କା ଶର୍ମା ଏବଂ ଭାରତୀୟ କ୍ରିକେଟ ଦଳର ଅଧିନୟକ ବିରାଟ କୋହଲିଙ୍କର ଆଜି ହେଉଛି ୩ୟ ବିବାହ ବାର୍ଷିକୀ। ଏହି ଯୋଡି ୩ ବର୍ଷ ପୂର୍ବେ ଇଟାଲିରେ ବିବାହ କରିଥିଲେ। ବିରୁଷ୍କା ନାମରେ ଜଣାଶୁଣା ଏହି ଯୋଡି ନିଜ ବିବାହକୁ ସିକ୍ରେଟ ରଖିଥିଲେ। କେବଳ ସେତିକି ନୁହେଁ, ଏହି ବିବାହ ଉତ୍ସବରେ ଉଭୟଙ୍କ ପରିବାରର ସଦସ୍ୟ ସମେତ କେବଳ ଘନିଷ୍ଟ ବନ୍ଧୁ ଉପସ୍ଥିତ ଥିଲେ। ମାତ୍ର ଭାରତ ଫେରିବା ପରେ ଏହି ଯୋଡି ଦିଲ୍ଲୀ ଏବଂ ମୁମ୍ବାଇରେ ରିସପଶନ ପାର୍ଟି ଦେଇଥିଲେ। ଏହି ପାର୍ଟିରେ ଉଭୟ କ୍ରିକେଟ ଏବଂ ବଲିଉଡ୍ ଜଗତର ଅନେକ ସେଲିବ୍ରିଟି ଶାମିଲ ହୋଇଥିଲେ। ଦିଲ୍ଲୀ ରିସପଶନ ପାର୍ଟିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଉପସ୍ଥିତ ହୋଇଥିଲେ। ବିରୁଷ୍କାଙ୍କ ବିବାହ ସମୟର ଫଟୋ ଉକ୍ତ ସମୟରେ ଖୁବ୍ ଚର୍ଚ୍ଚାରେ ରହିଥିଲା। ବର୍ତ୍ତମାନ ଅନୁଷ୍କା ଗର୍ଭବତୀ ଅଛନ୍ତି ଏବଂ ଜାନୁୟାରୀରେ ସେ ତାଙ୍କର ପ୍ରଥମ ସନ୍ତାନକୁ ଜନ୍ମ ଦେବେ ବୋଲି ଜଣାପଡ଼ିଛି।
ତେବେ ଅନୁଷ୍କା ଯେଉଁ ସମୟରେ ବିବାହ କରିଥିଲେ ଉକ୍ତ ସମୟରେ ତାଙ୍କର ବୟସ ୨୯ ବର୍ଷ ଥିଲା। ତେବେ ଜଣେ ଅଭିନେତ୍ରୀଙ୍କ ପାଇଁ ଏହା ବହୁତ କମ୍ ବୟସ। ଏ କଥାକୁ ନିଜେ ଅନୁଷ୍କା ମଧ୍ୟ ସ୍ବୀକାର କରିଥିଲେ।
ଏକ ସାକ୍ଷାତକାରରେ ଅନୁଷ୍କା କହିଥିଲେ ଯେ, ଏତେ କମ୍ ବୟସରେ ବିବାହ କରିବାର ନ ଥିଲା ବୋଲି ଲୋକେ ମୋତେ କହୁଛନ୍ତି। ଏହାର ଉତ୍ତରରେ ଅନୁଷ୍କା କହିଥିଲେ, ଲୋକମାନେ କଳାକାରଙ୍କୁ କେବଳ ପରଦା ଉପରେ ଦେଖିବାକୁ ପସନ୍ଦ କରନ୍ତି। ମାତ୍ର ସେମାନଙ୍କ ବ୍ୟକ୍ତିଗତ ଜୀବନ ସହ କାହାର କୌଣସି ସମ୍ପର୍କ ନ ଥାଏ। ସେମାନଙ୍କ ବିବାହ ହେଉ ଅବା ମା’ ହୋଇଗଲେ। ଆମକୁ ଏହି ମାନସିକତାରୁ ବାହାରିବାକୁ ପଡ଼ିବ ବୋଲି ସେ କହିଥିଲେ।
ଆହୁରି ମଧ୍ୟ ସେ କହିଥିଲେ, ମୁଁ ୨୯ ବର୍ଷରେ ବିବାହ କରିଛି, କାରଣ ମୁଁ ପ୍ରେମରେ ପଡ଼ିଥିଲି। ଏବେ ବି ମୁଁ ପ୍ରେମ କବଳରେ। ବିବାହ ଏକ ପ୍ରାକୃତିକ ପ୍ରଗତି। ବିବାହ ଏକ ଏପରି ଜିନିଷ, ଯାହା ସମ୍ପର୍କକୁ ଆଗକୁ ବଢ଼ାଇଥାଏ ବୋଲି ଅନୁଷ୍କା କହିଥିଲେ।
ବିବାହ ପୂର୍ବରୁ ବିରୁଷ୍କା ପ୍ରାୟ ୪ ବର୍ଷ ପର୍ଯ୍ୟନ୍ତ ପରସ୍ପରକୁ ଡେଟ୍ କରିଥିଲେ। ମାତ୍ର ଆଜି ପର୍ଯ୍ୟନ୍ତ ସେମାନେ କେବେହେଲେ ନିଜ ସମ୍ପର୍କକୁ ନେଇ ଖୋଲାଖୋଲି ଭାବେ କିଛି କହି ନାହାନ୍ତି।