ଇସଲାମାବାଦ,୧୨ା୮: ଅନଓ୍ବର-ଉଲ୍-ହକ୍ କାକର ଶନିବାର ପାକିସ୍ତାନର କାମଚଳା ପ୍ରଧାନମନ୍ତ୍ରୀ ଭାବରେ ମନୋନୀତ ହୋଇଛନ୍ତି। ଦେଶକୁ ଶାସନ କରିବା ଏବଂ ଚଳିତ ବର୍ଷ ସାଧାରଣ ନିର୍ବାଚନକୁ ତଦାରଖ କରିବା ପାଇଁ ସେ ମନୋନୀତ ହୋଇଛନ୍ତି।
ଏହି ପ୍ରସଙ୍ଗରେ ଦୁଇ ରାଉଣ୍ଡ ଆଲୋଚନା ପରେ ବିଦାୟୀ ପ୍ରଧାନମନ୍ତ୍ରୀ ଶେହବାଜ ସରିଫ ଏବଂ ବିରୋଧୀ ଦଳର ନେତା ରାଜା ରିଆଜ ତାଙ୍କ ନାମ ଘୋଷଣା କରିଛନ୍ତି।
ବାଲୁଚିସ୍ତାନ ଆଓ୍ବାମୀ ପାର୍ଟି (ବିଏପି)ର ଜଣେ ଆଇନ ପରାମର୍ଶଦାତା ଅନଓ୍ବର ଚଳିତ ବର୍ଷ ଶେଷ ସୁଦ୍ଧା ଏକ ନୂଆ ନିର୍ବାଚନ ପର୍ଯ୍ୟନ୍ତ ଏକ ତଦାରଖକାରୀ ସରକାରର ନେତୃତ୍ୱ ନେବେ।
ପ୍ରଧାନମନ୍ତ୍ରୀ ସରିଫ ବାଧ୍ୟତାମୂଳକ କାର୍ଯ୍ୟକାଳର ତିନି ଦିନ ପୂର୍ବରୁ ଅଗଷ୍ଟ ୯ରେ ଜାତୀୟ ବିଧାନସଭା ଭଙ୍ଗ କରିବାକୁ ସୁପାରିସ କରିଥିଲେ। ତେଣୁ ସମ୍ବିଧାନ ଅନୁଯାୟୀ ଆଗାମୀ ସାଧାରଣ ନିର୍ବାଚନ ୯୦ ଦିନ ମଧ୍ୟରେ ଅନୁଷ୍ଠିତ ହେବ।
ନୂତନ ଜନଗଣନା ଫଳାଫଳକୁ ବିଦାୟୀ ସରକାର ଅନୁମୋଦନ କରିଥିବାରୁ ନିର୍ବାଚନ ପୂର୍ବରୁ ଦୁଇ ମାସ ବିଳମ୍ବ ହେବ ବୋଲି ଆଶା କରାଯାଉଛି। ଯାହା ନିର୍ବାଚନ ପୂର୍ବରୁ ଭଙ୍ଗ କରିବା ଏକ ସାମ୍ବିଧାନିକ ବାଧ୍ୟତାମୂଳକ ଅଟେ।
