ମେଲବୋର୍ନ,୩୧।୧୦ : ଟି -୨୦ ବିଶ୍ୱକପ ୨୦୨୨ ରେ ଦକ୍ଷିଣ ଆଫ୍ରିକା ରବିବାର ଟିମ ଇଣ୍ଡିଆକୁ ୫ ୱିକେଟରେ ପରାସ୍ତ କରିଛି। ଏହି ମ୍ୟାଚର ଫଳାଫଳ ପାକିସ୍ତାନ ଦଳ ଉପରେ ସବୁଠାରୁ ବଡ ପ୍ରଭାବ ପକାଇଛି। ଭାରତର ପରାଜୟ ପାକିସ୍ତାନ ଦଳକୁ ସେମିଫାଇନାଲ ଦୌଡ଼ରୁ ପ୍ରାୟତଃ ବାଦ ଦେଇଛି। ବର୍ତ୍ତମାନ ପାକିସ୍ତାନ ସେମିଫାଇନାଲ ଖେଳିବା ପାଇଁ ଆଗାମୀ ୨ ମ୍ୟାଚରେ ଆଶାଠାରୁ ଅଧିକ ପ୍ରଦର୍ଶନ କରିବା ଜରୁରୀ ହୋଇପଡ଼ିଛି।
ତିନୋଟି ସମୀକରଣ ଉପରେ ପାକିସ୍ତାନ ସେମିଫାଇନାଲ ଖେଳିବାର ଆଶା ରହିଛି। ସର୍ବପ୍ରଥମେ ପାକିସ୍ତାନକୁ ଏହାର ଶେଷ ଅବଶିଷ୍ଟ ୨ ମ୍ୟାଚ ଜିତିବାକୁ ପଡ଼ିବ। ଦକ୍ଷିଣ ଆଫ୍ରିକା ଏବଂ ବାଂଲାଦେଶକୁ ପାକିସ୍ତାନ ଏପର୍ଯ୍ୟନ୍ତ ଭେଟି ନାହିଁ। ଏହି ଦୁଇଟି ମ୍ୟାଚରେ ବିଜୟୀ ହେଲେ ପାକିସ୍ତାନ ଦଳର ମୋଟ ପଏଣ୍ଟ ୬ ହେବ।
ଏହା ସହିତ ନେଦରଲାଣ୍ଡ ମଧ୍ୟ ଦକ୍ଷିଣ ଆଫ୍ରିକାକୁ ପରାସ୍ତ କରିବା ଜରୁରୀ। ଯଦି ଏହା ଘଟେ ତେବେ ଦକ୍ଷିଣ ଆଫ୍ରିକା କେବଳ ୫ ପଏଣ୍ଟରେ ରହିଯିବ। ଏଭଳି ପରିସ୍ଥିତିରେ ପାକିସ୍ତାନ ଦଳ ପଏଣ୍ଟ ଟେବୁଲରେ ଦକ୍ଷିଣ ଆଫ୍ରିକାଠାରୁ ଉର୍ଦ୍ଧ୍ୱରେ ରହିବ।
ଯଦି ଦକ୍ଷିଣ ଆଫ୍ରିକା ଦଳ ନେଦରଲାଣ୍ଡଠାରୁ ପରାଜିତ ନହୁଏ ତେବେ ମଧ୍ୟ ପାକିସ୍ତାନ ପାଇଁ ଏକ ସୁଯୋଗ ରହିଛି। ଯଦି ବାଂଲାଦେଶ ଦଳ ଭାରତକୁ ପରାସ୍ତ କରେ ଏବଂ ଭାରତୀୟ ଦଳ ଜିମ୍ବାୱେକୁ ପରାସ୍ତ କରେ, ତେବେ ଏହି ପରିସ୍ଥିତିରେ ପାକିସ୍ତାନ ଦଳ ପଏଣ୍ଟ ଟେବୁଲରେ ଭାରତ, ଜିମ୍ବାୱେ ଏବଂ ବାଂଲାଦେଶଠାରୁ ଅଧିକ ରହି ସେମିଫାଇନାଲରେ ପ୍ରବେଶ କରିପାରିବ।