ଭୁବନେଶ୍ବର, ୧୫ା୭(ସୁନିତ୍ ମିଶ୍ର): ଭୁବନେଶ୍ୱର ଏମ୍ପି ଅପରାଜିତା ଷଡ଼ଙ୍ଗୀ ତାଙ୍କ ୪ର୍ଥ ବର୍ଷର ରିପୋର୍ଟ କାର୍ଡ ଉପସ୍ଥାପିତ କରିଛନ୍ତି। ଅପରାଜିତା ଶୁକ୍ରବାର ଏକ ଖବରଦାତା ସମ୍ମିଳନୀ ଜରିଆରେ ଏନେଇ ପ୍ରକାଶ କରିଛନ୍ତି। ସେ କହିଛନ୍ତି, ଯେଉଁମାନେ ତାଙ୍କୁ ଭୋଟ ଦେଇ ପାର୍ଲାମେଣ୍ଟ ପଠାଇଛନ୍ତି ସେମାନଙ୍କର ଜାଣିବାର ଅଧିକାର ରହିଛି, ନିର୍ଦ୍ଦିଷ୍ଟ ଭାବେ କି କାମ ସବୁ ହୋଇଛି। ଏନ୍ଏଚ୍ଏଆଇ ପକ୍ଷରୁ ୬୪୬୨ କୋଟି ଟଙ୍କାର ପ୍ରକଳ୍ପ ଭୁବନେଶ୍ୱର ସଂସଦୀୟ କ୍ଷେତ୍ରରେ ଆରମ୍ଭ ହୋଇଛି। ୩୦ଟି ଗାଡ଼ି ଯିବା ଲାଗି ଅଣ୍ଡର ପାସ୍, ୯ଟି ଫ୍ଲାଇଓଭର, ୪ଟି ଫୁଟ୍ ଓଭରବ୍ରିଜ୍ ଏବଂ କ୍ୟାପିଟାଲ ରିଜନ ରିଂରୋଡ୍ ହେବ। ଏହି ରିଂରୋଡ୍ ଦ୍ୱାରା ରାମେଶ୍ୱର-ଖୋର୍ଦ୍ଧାଠାରୁ ଟାଙ୍ଗୀ-କଟକ ପର୍ଯ୍ୟନ୍ତ ୧୧୧ କୋଟି ଟଙ୍କାର କାମ ଆରମ୍ଭ ହୋଇଛି। ଖୋର୍ଦ୍ଧା ଟାଉନରୁ ବାଇପାସ୍ ରୋଡ୍ କିପରି ହେବ ଏହା ସବୁଠାରୁ ବଡ଼ ଚିନ୍ତା ଥିଲା। ଏହି କାମ ମଧ୍ୟ ଖୁବ୍ଶୀଘ୍ର ଆରମ୍ଭ ହେବାକୁ ଯାଉଛି। ଏନ୍ଏଚ୍-୫୭ ଖୋର୍ଦ୍ଧା ବାଇପାସ୍ ରୋଡ୍ର କାମ ମଧ୍ୟ ଆରମ୍ଭ ହୋଇଯାଇଛି। ଏଥିଲାଗି ୧୫୭ କୋଟି ଟଙ୍କାର ବଜେଟ୍ ରଖାଯାଇଛି। ପ୍ରତ୍ୟେକ ସପ୍ତାହରେ କାର୍ଯ୍ୟଗୁଡିକର ସମୀକ୍ଷା କରାଯାଉଛି। ନିର୍ଦ୍ଧିଷ୍ଟ ସମୟସୀମା ମଧ୍ୟରେ ସେହି କାର୍ଯ୍ୟ ସାରିବାକୁ ଲକ୍ଷ୍ୟ ରଖାଯାଇଛି। ଲୋକଙ୍କ ଦାବି ରହିଥିବା କସ୍ମୋପଲିସ ପାଖରେ ଓଭରବ୍ରିଜ କାର୍ଯ୍ୟ ୩୧ ଅକ୍ଟୋବର ୨୦୨୩ ସୁଦ୍ଧା ଶେଷ ହେବ। ଏମ୍ସ ନିକଟରେ ଥିବା ଭେହିକିଲ ଅଣ୍ଡରପାସ୍ ମଧ୍ୟ ଏହି ସମୟ ଭିତରେ ସାରିବାକୁ କୁହାଯାଇଛି। କ୍ରାଉନ ହୋଟେଲ ନିକଟରେ ଫୁଟ୍ ଓଭରବ୍ରିଜ୍ କାର୍ଯ୍ୟ ଟେଣ୍ଡର କାମ ସରିଲାଣି ୩୧ ଡିସେମ୍ବର ୨୦୨୩ ସୁଦ୍ଧା ଏହା ସରିବ। ସତ୍ସଙ୍ଗ ବିହାର ନିକଟରେ ଫୁଟ୍ ଓଭର ବ୍ରିଜ୍ରେ ଲିଫ୍ଟ ଲାଗିବାର ବ୍ୟବସ୍ଥା ହେବ। ପଳାଶୁଣୀରେ ସ୍ଥାନୀୟ ସମସ୍ୟା ନେଇ ଫୁଟ୍ ଓଭର ବ୍ରିଜ କାର୍ଯ୍ୟ ହୋଇପାରିନାହିଁ। ଏହା କିପରି ତୁରନ୍ତ ହୋଇପାରିବ ସେଥିଲାଗି ସମସ୍ତଙ୍କୁ ସହଯୋଗ କରି କାମ କରିବାକୁ ପଡିବ ବୋଲି ସେ କହିଛନ୍ତି। ନହରକଣ୍ଟା ଏବଂ ହଂସପାଳ ପାଖରେ ଆରମ୍ଭ ହୋଇଥିବା ଫୁଟ୍ ଓଭର ବ୍ରିଜ୍ କାର୍ଯ୍ୟ ଡିସେମ୍ବର ୩୧ ସୁଦ୍ଧା ସରିବ ବୋଲି ଅପରାଜିତା କହିଛନ୍ତି।
