ଲକ୍ଷ୍ନୌ,୨୧ ।୨: ଉତ୍ତର ପ୍ରଦେଶର ଇଟାୱାରେ ଯେ କୌଣସି ନିର୍ବାଚନ ହେଉନା କାହିଁକି ସମସ୍ତଙ୍କର କିନ୍ତୁ ନଜର ଥାଏ ମୁଲାୟମ ସିଂ ଯାଦବଙ୍କ ପରିବାର ଉପରେ । ୟୁପି ବିଧାନସଭା ଲାଗି ରବିବାର ତୃତୀୟ ପର୍ଯ୍ୟାୟ ମତଦାନ ସରିଛି । ହେଲେ ଏଥିରେ ମୁଲୟମ ସିଂ ଯାଦବଙ୍କ ବୋହୂ ଅପର୍ଣ୍ଣ ଯାଦବ, ପତ୍ନୀ ସାଧନା ଓ ପୁଅ ପ୍ରତିକ ଭୋଟ ଦେଇ ନ ଥିବା ସୂଚନା ମିଳିଛି । ଏହାକୁ ନେଇ ଏବେ ଚର୍ଚ୍ଚା ଯୋର ଧରିଛି ।
ସୂଚନାଯୋଗ୍ୟ, ସମାଜବାଦୀ ପାର୍ଟିର ସଂସ୍ଥାପକ ମୁଲାୟମ ସିଂ ଯାଦବଙ୍କ ପରିବାରର ସମସ୍ତ ସଦସ୍ୟଙ୍କ ନାମ ସୈଫଇ ମତଦାନ ତାଲିକାରେ ରହିଛି । ୪ ଦିନ ପୂର୍ବରୁ ଲକ୍ଷ୍ନୌର ସୈଫଇ ଆସିଥିବା ମୁଲାୟମ ସିଂ ଯାଦବ ମୈନପୁରୀ କରହଲରେ ପୁଅ ଅଖିଳେଶ ଯାଦବଙ୍କ ଲାଗି ଜନସଭାକୁ ସାମ୍ବାଧନ କରିବା ପରେ ଭୋଟ ଦେବାକୁ ସେଠାରେ ରହିଯାଇଥିଲେ । ସୈଫଇର ଅଭିନବ ବିଦ୍ୟାଳୟରେ ହୋଇଥିବା ମତଦାନ କେନ୍ଦ୍ରରେ ମୁଲାୟମ ସିଂ ଯାଦବ, ତାଙ୍କ ପୁଅ ଅଖିଳେଶ ଯାଦବ, ତାଙ୍କ ପତ୍ନୀ ଡିମ୍ପଲ ଯାଦବ, ଶିବପାଲ ସିଂ ଯାଦବଙ୍କ ସମେତ ପରିବାରର ଅନ୍ୟ ସଦସ୍ୟମାନେ ଯୋଗ ଦେଇଥିଲେ । ହେଲେ ମୂଲାୟମଙ୍କ ବୋହୂ ଅପର୍ଣ୍ଣା, ପତ୍ନୀ ସାଧନା ଓ ପୁଅ ପ୍ରତିକ ଶେଷ ପର୍ଯ୍ୟନ୍ତ ଭୋଟ ଦେବାକୁ ଆସି ନ ଥିବା ଜଣାପଡିଛି । ସୂଚନାଯୋଗ୍ୟ, ନିକଟରେ ଅପର୍ଣ୍ଣା ଭାରତୀୟ ଜନତା ପାର୍ଟି(ଭାଜପା)ରେ ଯୋଗ ଦେଇଛନ୍ତି ।
