ନୂଆଦିଲ୍ଲୀ,୧୩।୩ : ଲଣ୍ଡନରେ ରାହୁଲ ଗାନ୍ଧୀଙ୍କ ବିବୃତ୍ତି ନେଇ ସୋମବାର ଲୋକସଭା ଓ ରାଜ୍ୟସଭାରେ ଅଧିବେଶନ ଆରମ୍ଭରୁ ହଟ୍ଟଗୋଳ ହୋଇଛି। ଭାଜପା ଏମପିମାନେ ଗୋଟିଏ ସ୍ବରରେ ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି। ସମସ୍ତେ ଦାବି କରିଛନ୍ତି ଯେ ରାହୁଲ ଗାନ୍ଧୀ ଦେଶବାସୀ ଏବଂ ଗୃହକୁ କ୍ଷମା ମାଗନ୍ତୁ। ଲୋକସଭାରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କହିଛନ୍ତି ଯେ ଏହି ଗୃହର ସଦସ୍ୟ ରାହୁଲ ଗାନ୍ଧୀ ଲଣ୍ଡନରେ ଭାରତକୁ ଅପମାନିତ କରିଛନ୍ତି। ମୁଁ ଦାବି କରୁଛି ଯେ ତାଙ୍କ ବିବୃତ୍ତିକୁ ଏହି ଗୃହର ସମସ୍ତ ସଦସ୍ୟ ନିନ୍ଦା କରନ୍ତୁ ଏବଂ ତାଙ୍କୁ ଗୃହ ସମ୍ମୁଖରେ କ୍ଷମା ମାଗିବାକୁ କୁହାଯାଉ।
ରାଜ୍ୟସଭାରେ ଭାଜପା ଏମ୍ପି ତଥା ପୂର୍ବତନ କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲ କହିଛନ୍ତି ଯେ ରାହୁଲ ଗାନ୍ଧୀ ଜଣେ ବିରୋଧୀ ଦଳର ନେତା। ସେ ବିଦେଶ ଯାଇ ଭାରତୀୟ ଗଣତନ୍ତ୍ର ଉପରେ ଲଜ୍ଜାଜନକ ମନ୍ତବ୍ୟ ଦେଇଛନ୍ତି। ସେ ଭାରତ ଏବଂ ସଂସଦର ଲୋକଙ୍କୁ ଅପମାନିତ କରିଛନ୍ତି। ଭାରତରେ ବାକ୍ସ୍ବାଧୀନତା ଅଛି ଏବଂ ଏମ୍ପିମାନେ ସଂସଦରେ କଥା ହୋଇପାରିବେ। ରାହୁଲ ଗାନ୍ଧୀ ସଂସଦରେ କ୍ଷମା ପ୍ରାର୍ଥନା କରିବା ଉଚିତ। ଗୋୟଲ କହିଛନ୍ତି, ଆମେ ଦାବି କରୁଛୁ ଯେ ରାହୁଲ ଗାନ୍ଧୀ ସଂସଦକୁ ଆସି ଦେଶର ଲୋକ ଏବଂ ଗୃହରେ କ୍ଷମା ପ୍ରାର୍ଥନା କରନ୍ତୁ।
କେନ୍ଦ୍ର ମନ୍ତ୍ରୀ ଗିରିରାଜ ସିଂ ମଧ୍ୟ ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି, ଲଣ୍ଡନରେ ରାହୁଲ କହିଛନ୍ତି ଯେ ଏମ୍ପିମାନଙ୍କୁ ସଂସଦରେ କହିବାକୁ ଅନୁମତି ନାହିଁ। ଏହା ଲୋକସଭା ପାଇଁ ଅପମାନ। ଏହି ବିବୃତ୍ତିରେ ଗୃହର ବାଚସ୍ପତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ। ଆମ ଗଣତନ୍ତ୍ରକୁ ଅପମାନିତ କରିଥିବାରୁ ତାଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ ହେବା ଆବଶ୍ୟକ।
ଶାସକ ସଦସ୍ୟଙ୍କ ପ୍ରବଳ ହଟ୍ଟଗୋଳ ଯୋଗୁ ଲୋକସଭା ଓ ରାଜ୍ୟସଭାର ପ୍ରକ୍ରିୟାକୁ ଅପରାହ୍ନ ୨ ଟା ପର୍ଯ୍ୟନ୍ତ ସ୍ଥଗିତ ରଖାଯାଇଥିଲା।