ଦାରିଙ୍ଗବାଡ଼ି,୨୮ା୬(ଅରୁଣ ସାହୁ): ଓଡ଼ିଶାର କଶ୍ମୀର କୁହାଯାଉଥିବା କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅଞ୍ଚଳ ଏକ ପର୍ଯ୍ୟଟନସ୍ଥଳ ଭାବେ ସାରା ରାଜ୍ୟ ତଥା ରାଜ୍ୟ ବାହାରେ ଜଣାଶୁଣା। ଏଠାକାର ଜଳବାୟୁ ସାରା ଭାରତ ବର୍ଷରେ ଏକ ସ୍ବତନ୍ତ୍ର ସ୍ଥାନ ଗ୍ରହଣ କରିଛି। ହଳଦୀ ଚାଷ ପାଇଁ କନ୍ଧମାଳ ବିଶ୍ୱ ପ୍ରସିଦ୍ଧ ହୋଇଥିବା ବେଳେ ଥଣ୍ଡା ଜଳବାୟୁ ପାଇଁ କଫି ଚାଷ ବି ସାରା ଦେଶରେ ପରିଚିତ। ସେହିପରି ଅନ୍ୟ ଚାଷ ମଧ୍ୟରେ ପନିପରିବା, ଆମ୍ବ, ଲିଚୁ, ଓ ବହୁ ଚର୍ଚ୍ଚିତ ଲାଭଦାୟକ ଷ୍ଟ୍ରବେରୀ ଚାଷ ମଧ୍ୟ ଦାରିଙ୍ଗବାଡ଼ିରେ ସଫଳତାର ସହ ହୋଇପାରିଛି। ଏବେ ପୁଣି ଅଞ୍ଚଳରେ ସେଓ ଫଳିବା ପରେ ଏହି ଜଳବାୟୁରେ ସେଓ ସହ ଅଙ୍ଗୁର ଚାଷ ମଧ୍ୟ ହୋଇପାରିବ ବୋଲି ଆଶା କରାଯାଇଛି। ଏଭଳି ସଫଳତାର ସହ ଚାଷ ହୋଇଥିବା ଦେଖିବାକୁ ମିଳିଛି ଦାରିଙ୍ଗବାଡ଼ିଠାରେ ଥିବା ଏକ ରିସର୍ଟ ପରିସରରେ। ରିସର୍ଟର ଚେୟାର ପର୍ସନ ବିପିନ ପାଇକରାୟ ଭୁବନେଶ୍ୱର ପାତ୍ରପଡ଼ା ଅଞ୍ଚଳର ହୋଇଥିବା ବେଳେ ସେ ଦାରିଙ୍ଗବାଡ଼ିଠାରେ ଏକ ରିସର୍ଟ କରିଛନ୍ତି। ସେଠାରେ ସେ ସିମ୍ଲାରୁ ଆଣିଥିବା ୨୧ଟି ସେଓ ଚାରା ପରୀକ୍ଷାମୂଳକ ଭାବେ ରୋପଣ କରିଥିଲେ। ତାକୁ ତଦାରଖ କରିବା ପରେ ଉକ୍ତ ଗଛରେ ୩ ବର୍ଷରେ ଫଳିବାକୁ ଥିବା ସେଓ ମାତ୍ର ଦେଢ଼ ବର୍ଷରେ ଫଳ ଦେଇଛି। ଏବେ ବିପିନ କହିଛନ୍ତି, ସେ ଏହି ଚାଷ ଅଧିକ କରିବେ ଏବଂ ପୁଣି ସିମ୍ଲାରୁ ଚାରା ଆଣି ଏହାର ବହୁଳ ଚାଷ କରିବେ। ଏଥିସହ ସେ ଏହି ଚାଷ ଅନ୍ୟମାନେ ମଧ୍ୟ କରନ୍ତୁ ବୋଲି କହିଛନ୍ତି। ଦାରିଙ୍ଗବାଡ଼ିରେ ଏହି ଚାଷର ସମ୍ଭାବନାକୁ ନେଇ ସମସ୍ତେ ଆଗ୍ରହ ପ୍ରକାଶ କରିବା ଦରକାର ବୋଲି ସେ କହିଛନ୍ତି।