ତାଳଚେର, ୪।୩ (ନି.ପ୍ର.): ତାଳଚେର ସରକାରୀ ମେଡିକାଲ କଲେଜକୁ ଅବିଳମ୍ବେ କାର୍ଯ୍ୟକ୍ଷମ କରିବା ପାଇଁ କ୍ରିୟାନୁଷ୍ଠାନ କମିଟିର ପ୍ରତିଷ୍ଠା ବାର୍ଷିକୀରେ ଏକ ସଚେତନ ନାଗରିକ ସମାବେଶ ମେଡିକାଲ କଲେଜ ସମ୍ମୁଖରେ ଅନୁଷ୍ଠିତ ହୋଇଯାଇଛି। ଆବାହକ ପଦ୍ମଚରଣ ସାମଲଙ୍କ ସଭାପତିତ୍ୱରେ ଆୟୋଜିତ ଏହି ସମାବେଶରେ କେନ୍ଦ୍ର ଓ ରାଜ୍ୟ ସରକାର ତାଳଚେରରୁ ସହସ୍ରାଧିକ କୋଟି ଟଙ୍କା ରାଜସ୍ବ ପାଉଥିବାବେଳେ ତାଳଚେର ମେଡିକାଲ କଲେଜକୁ ସରକାରୀ ପରିଚାଳନାରେ କାର୍ଯ୍ୟକ୍ଷମ କରାଯାଉ ନ ଥିବାରୁ ସଭାରେ ଉଦ୍ବେଗ ପ୍ରକାଶ ପାଇଥିଲା। ରାଜ୍ୟ ସରକାର ଅନ୍ୟ ଜିଲାରେ ମେଡିକାଲ କଲେଜ ଖୋଲିଥିବାବେଳେ ତାଳଚେରରେ ୫୦୦ କୋଟି ଟଙ୍କାରେ କୋଠା ନିର୍ମାଣ ଓ ଏମ୍ସିଏଲ୍ ଆର୍ଥତ୍କ ସହଯୋଗ କରିବା ପାଇଁ ସମ୍ମତି ଦେଇଥିଲେ ମଧ୍ୟ କାହିଁକି ରାଜ୍ୟ ସରକାର ଏହି ମେଡିକାଲ କଲେଜ ଖୋଲିବା ପାଇଁ ଚାହୁଁନାହାନ୍ତି ବୋଲି ପ୍ରଶ୍ନ କରାଯାଇଥିଲା। ମାର୍ଚ୍ଚ ୩୦ ମଧ୍ୟରେ ମେଡିକାଲ କଲେଜ କାର୍ଯ୍ୟକ୍ଷମ ନେଇ ସରକାରୀ ଘୋଷଣା ନ ହେଲେ ଆସନ୍ତା ଏପ୍ରିଲ ୧ରେ ୧୨ ଘଣ୍ଟିଆ ତାଳଚେର ବନ୍ଦ କରାଯିବ ବୋଲି ସମାବେଶରେ ନିଷ୍ପତ୍ତି ନିଆଯାଇଥିଲା। ଏହି ସଭାରେ ତାଳଚେର ଅଞ୍ଚଳରୁ ଶତାଧିକ ସଚେତନ ନାଗରିକ, ବୁଦ୍ଧିଜୀବୀ ଯୋଗଦେଇଥିଲେ। କରୁଣାକର ସାହୁ, ଦିଗାମ୍ବର ଗଡନାୟକ, କେଶବ ଭୂତିଆ, ଅଭୟ ପାଣି, ଜୟସେନ ମେହେର, ବିଭୂତି ସାହୁ, ବାଉରୀବନ୍ଧୁ ବେଜ, ପ୍ରହ୍ଲାଦ ଚନ୍ଦ୍ର ସାହୁ, ପ୍ରେମାନନ୍ଦ ମହାନ୍ତି, ଗଗନ ଦାସ, ଭୁପେନ ଥମ୍ବ, ରଣଜିତ ମହାପାତ୍ର, କୈଳାସ ସାହୁ, କୁମର ସାହୁ, ଚୈତନ୍ୟ ପ୍ରଧାନ, ପ୍ରଗତିବାଳା ନାୟକ, ଜିନେଶ ସାହୁ, ପ୍ରଫୁଲ ନାଏକ, ଉଚ୍ଛନ ପଟ୍ଟନାୟକ, ନୃସିଂହ ଗୋଚ୍ଛାୟତ, ସଞ୍ଜୀବ ନାଏକ, ଭଗବାନ ପ୍ରଧାନ, ସୁକାନ୍ତ ଦାସ, ପରମାନନ୍ଦ ସାହୁ ପ୍ରମୁଖ ଅଂଶ ଗ୍ରହଣ କରିଥିଲେ।