ଭୁବନେଶ୍ୱର,୧୫ା୬(ବ୍ୟୁରୋ): ଯାତ୍ରୀଙ୍କ ସୁବିଧା ପାଇଁ ୦୫୮୭୦-୦୫୮୬୯ ରଙ୍ଗପଡ଼ା ନର୍ଥ-ପୁରୀ-ରଙ୍ଗପଡ଼ା ନର୍ଥ (ଆସାମ) ବିଶେଷ ଟ୍ରେନ୍ ସେବାକୁ ରଙ୍ଗପଡ଼ା ନର୍ଥଠାରୁ ଜୁଲାଇ ୨୫ ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇଛି। ଏଥିସହ ପୁରୀଠାରୁ ଏହାର ସେବାକୁ ଜୁଲାଇ ୨୭ ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇଛି। ପୂର୍ବରୁ ରଙ୍ଗପଡ଼ା ନର୍ଥ ଠାରୁ ଜୁଲାଇ ୧୩ ଓ ପୁରୀଠାରୁ ଜୁଲାଇ ୧୫ ପର୍ଯ୍ୟନ୍ତ ଏହି ବିଶେଷ ଟ୍ରେନ ସେବା ରହିଥିଲା। ଏନେଇ ପୂର୍ବତଟ ରେଳ କର୍ତ୍ତୃପକ୍ଷଙ୍କ ପକ୍ଷରୁ ମଙ୍ଗଳବାର ସୂଚନା ଦିଆଯାଇଛି। ତେବେ ଏହି ଟ୍ରେନ ପାଇଁ ସ୍ଥିରୀକୃତ ଷ୍ଟେଶନ ଏବଂ ସମୟ ସାରଣୀରେ କୌଣସି ପରିବର୍ତ୍ତନ କରାଯାଇ ନାହିଁ। ଅନ୍ୟପକ୍ଷରେ ଟ୍ରେନଗୁଡ଼ିକର ଉନ୍ନତ ଗତି ଏବଂ ଯାତ୍ରୀ ଓ ଟ୍ରେନ ନିରାପତ୍ତା ପାଇଁ ସମ୍ପୃକ୍ତ କେତେକ ରେଳ ସେକ୍ସନ ମଧ୍ୟରେ ଜରୁରି ଟ୍ରାକ୍ ରକ୍ଷଣାବେକ୍ଷଣ କାର୍ଯ୍ୟ ହେବାର ଯୋଜନା ରହିଛି। ତେଣୁ ଉଭୟ ପାର୍ଶ୍ୱରୁ ଜୁନ ୧୮ ଓ ୧୯ରେ ୬ଟି ଟ୍ରେନ୍କୁ ବାତିଲ୍ କରିବାକୁ ନିଷ୍ପତ୍ତି ନିଆଯାଇଛି। ଉକ୍ତ ଟ୍ରେନ୍ଗୁଡ଼ିକ ହେଲା ୧୮୩୦୧/୧୮୩୦୨ ସମ୍ବଲପୁର-ରାୟଗଡ଼ା-ସମ୍ବଲପୁର ଇଣ୍ଟରସିଟି ଏକ୍ସପ୍ରେସ୍ ,୧୮୩୦୩/୧୮୩୦୪ ସମ୍ବଲପୁର-ପୁରୀ-ସମ୍ବଲପୁର ଇଣ୍ଟରସିଟି ଏକ୍ସପ୍ରେସ୍, ୨୨୮୨୦/୨୨୮୧୯ ବିଶାଖାପଟନମ୍-ଭୁବନେଶ୍ୱର-ବିଶାଖାପଟନମ୍ ଇଣ୍ଟରସିଟି ଏକ୍ସପ୍ରେସ୍, ୧୮୫୩୨/୧୮୫୩୧ ବିଶାଖାପଟନମ୍-ପଲାସା-ବିଶାଖାପଟନମ୍ ଏକ୍ସପ୍ରେସ୍, ୦୮୫୪୬/୦୮୫୪୫ ବିଶାଖାପଟନମ୍-କୋରାପୁଟ-ବିଶାଖାପଟନମ୍ ପାସେଞ୍ଜର ସ୍ପେଶାଲ ଏବଂ ୧୮୪୧୭/୧୮୪୧୮ ପୁରୀ-ଗୁଣୁପୁର-ପୁରୀ ଏକ୍ସପ୍ରେସ୍।