ବଅଁରପାଳ, ୧୭ା୯ (ଉପେନ୍ଦ୍ର ରାଉତ): ରଙ୍ଗିନ ଆଲୋକମାଳାରେ ଝଲସୁଛି ଅନୁଗୋଳର ନାଲ୍କୋନଗର। ଚାରିଆଡ଼େ ଉତ୍ସାହ ଉଦ୍ଦୀପନା। ୨ ବର୍ଷ ପରେ ଶନିବାର ଧୁମ୍ଧାମରେ ଦେବଶିଳ୍ପୀଙ୍କ ପୂଜା ପାଳନ କରାଯିବାକୁ ଥିବାରୁ ଆରାଧନା ପାଇଁ ପ୍ରସ୍ତୁତ ହୋଇଯାଇଛି ଆଲୁମିନିୟମନଗରୀ। ପୂର୍ବରୁ ଏଠାରେ ୨୩ ମଣ୍ଡପରେ ପୂଜା ହେଉଥିବା ବେଳେ ଚଳିତବର୍ଷ ମଣ୍ଡପ ସଂଖ୍ୟା ୧୮କୁ ହ୍ରାସ ପାଇଛି। ହେଲେ ପୂଜା କମିଟିଗୁଡ଼ିକ ମଧ୍ୟରେ ପ୍ରତିଯୋଗିତା ମନୋଭାବ କମ୍ ହୋଇନାହିଁ। ଆକର୍ଷଣୀୟ ମଣ୍ଡପ ଓ ସାଜସଜ୍ଜା କରାଯାଇଥିବା ବେଳେ ୨୩ ତାରିଖ ଭସାଣି ପର୍ଯ୍ୟନ୍ତ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହେବ।
ଚଳିତବର୍ଷ ନାଲ୍କୋନଗରର ପଟ୍ଲଇନ, କାଷ୍ଟ ହାଉସ ଏ, କାଷ୍ଟ ହାଉସ ବି, ରୋଡିଂଶପ୍-୨, ସିପିପି ଅପରେଶନ, ଷ୍ଟୋର ପରଜେସ, ସିଭିଲ୍, ଠିକାଦାର ସଂଘ, ମୋବାଇଲ ଶପ୍, ଆର୍ପିୟୁ, ସିପିପି ମେକାନିକାଲ, ଇଲେକ୍ଟ୍ରିକାଲ, ଟାଉନଶିପ୍ ଇଲେକ୍ଟ୍ରିକାଲ, ପମ୍ପ୍ ହାଉସ ଆଦି ପୂଜା କମିଟି ପକ୍ଷରୁ ପୂଜା ପାଳନ କରାଯିବ। ଏଥିପାଇଁ ଶୁକ୍ରବାର ସନ୍ଧ୍ୟାରୁ ସମସ୍ତ ଆନୁସଙ୍ଗିକ କାର୍ଯ୍ୟ ଶେଷ ହୋଇଛି। ମଣ୍ଡପଗୁଡ଼ିକରେ ବିଶ୍ୱକର୍ମାଙ୍କ ମୂର୍ତ୍ତି ସ୍ଥାପନ ଓ ଆଲୋକ ସାଜସଜ୍ଜା ସମାପନ ହୋଇଛି। ଏପରି କି ରାତିରେ ଆଲୋକମାଳାରେ ନାଲକୋନଗର ଝଲସି ଉଠୁଛି। ବିଶେଷକରି ନାଲ୍କୋ କମ୍ୟୁନିଟି ସେଣ୍ଟରଠାରୁ ଷ୍ଟାଡିୟମ ପର୍ଯ୍ୟନ୍ତ ରାସ୍ତାରେ ଲାଇଟ୍ ତୋରଣମାନ ଲାଗିଛି। ମହାମାରୀ କରୋନା ପାଇଁ ଗତ ୨ ବର୍ଷ ହେଲା ପୂଜା ହୋଇ ନ ଥିବାରୁ ଏଥର ଅତି ଆଡ଼ମ୍ବରରେ ପୂଜା ପାଳନ କରାଯିବାକୁ ଥିବାରୁ ଅଞ୍ଚଳବାସୀ ଆନନ୍ଦର ସହ ଏହାକୁ ଅପେକ୍ଷା କରିଛନ୍ତି। ପୂଜାକୁ ଅଧିକ ଆକର୍ଷଣୀୟ କରିବାକୁ ବିଭିନ୍ନ ପୂଜା କମିଟି ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମମାନ କରାଯିବାର ଯୋଜନା ରହିଛି। ସେହିପରି ମିନାବଜାର, ଦୋଳି ଆଦି ପାଇଁ ଅନୁମତି ଦିଆଯାଇ ନ ଥିବାରୁ ଏହା ଗିରାଙ୍ଗ ଛକଠାରେ ପଡ଼ିଥିବା ଦେଖିବାକୁ ମିଳିଛି।