ବମ୍ବେ: ହାତକୁ ଦୁଇ ହାତ ହେବେ ବଲିଉଡ୍ ଅଭିନେତା ଅରବାଜ ଖାନ୍। ମଲାଇକା ଅରୋରାଙ୍କଠାରୁ ଛାଡ଼ପତ୍ର ଏବଂ ଜର୍ଜିୟା ଆଣ୍ଡ୍ରିୟାନୀଙ୍କ ସହ ବ୍ରେକ୍ଅପ୍ ପରେ ଏବେ ଅଭିନେତାଙ୍କୁ ଜୀବନସାଥୀ ମିଳିଛନ୍ତି। ୫୬ ବର୍ଷୀୟ ଏହି ଅଭିନେତା ଡିସେମ୍ବର ୨୪ରେ ପ୍ରେମିକା ଶେରା ଖାନ୍ଙ୍କୁ ବିବାହ କରିବାକୁ ଯାଉଛନ୍ତି। ଏନେଇ ଜଣାପଡ଼ିବା ପରେ ଖାନ୍ ପରିବାରକୁ ଶୁଭେଚ୍ଛାର ସୁଅ ଛୁଟିଛି।
ଅରବାଜଙ୍କ ବିବାହ ନେଇ ଖବର ଜଣାପଡ଼ିବା ପରେ କିଏ ସେ ଯୁବତୀ ତାହା ଜାଣିବା ଲାଗି ପ୍ରଶଂସକଙ୍କ ଉତ୍କଣ୍ଠା ବଢ଼ିଛି। ତେବେ ଶେରା ବୃତ୍ତିଗତ ଜୀବନରେ ଜଣେ ମେକଅପ୍ ଆର୍ଟିଷ୍ଟ। ସେ ବଲିଉଡର ଅନେକ ବଡ଼ ସେଲିବ୍ରିଟିଙ୍କ ସହ କାମ କରୁଛନ୍ତି। ବିଶେଷକରି ରବିନା ଟଣ୍ଡନ ଏବଂ ତାଙ୍କ ଝିଅ ରାଶାଙ୍କ ମେକ୍ଅପ୍ ଆଟିଷ୍ଟ ଭାବେ ସେ ଜଣାଶୁଣା। ହେଲେ ଏବେ ସେ ଖାନ୍ ପରିବାରର ବୋହୂ ହେବାକୁ ଯାଉଛନ୍ତି।
ଶେରାଙ୍କୁ ଅରବାଜ ଅପକମିଂ ଫିଲ୍ମ ‘ପଟନା ଶୁକ୍ଳା’ର ସେଟ୍ରେ ଭେଟିଥିଲେ। ଏବେ ଦୁହେଁ ସମ୍ପର୍କକୁ ଆଗକୁ ନେବାକୁ ମନସ୍ଥ କରିଛନ୍ତି। ଉଭୟଙ୍କ ବିବାହ ବେଶ ଗୋପନୀୟ ଢ଼ଙ୍ଗରେ ହେବ। ଦୁହିଁଙ୍କ ପରିବାରଲୋକଙ୍କ ସହ ବନ୍ଧୁମାନେ ଏଥିରେ ସାମିଲ ହେବେ ବୋଲି ଜଣାପଡ଼ିଛି।