ଭୁବନେଶ୍ୱର,୩।୧୨(ବ୍ୟୁରୋ): ବହୁଚର୍ଚ୍ଚିତ ରହସ୍ୟମୟୀ ବ୍ଲାକ୍ମେଲର୍ ଅର୍ଚ୍ଚନା ନାଗଙ୍କ ବେଆଇନ ଆର୍ଥିକ କାରବାର ଦିଗରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଖୋଳତାଡ଼ ଜାରି ରଖିଛି। ଅଭିଯୁକ୍ତା ଅର୍ଚ୍ଚନାଙ୍କୁ ରିମାଣ୍ଡରେ ଆଣି ଏହି ମାମଲାରେ ଅଧିକ ତଥ୍ୟ ହାସଲ କରିବାକୁ ଇଡି ପ୍ରସ୍ତୁତି କରୁଛି। ଗତ ବୁଧବାର ଅର୍ଚ୍ଚନା କୋର୍ଟରେ ହାଜର ହୋଇଥାନ୍ତେ। କୌଣସି କାରଣ ପାଇଁ ସେ ହାଜର ହୋଇପାରି ନ ଥିଲେ। ତେବେ ଆସନ୍ତା ଡିସେମ୍ବର ୫ ଅର୍ଥାତ୍ ସୋମବାର ଅର୍ଚ୍ଚନା କୋର୍ଟରେ ହାଜର ହେବେ ବୋଲି ଇଡି ପକ୍ଷରୁ ସୂଚନା ମିଳିଛି। ଏହି ସମୟରେ ତାଙ୍କୁ ରିମାଣ୍ଡରେ ଆଣିବାକୁ ଇଡି ପକ୍ଷରୁ ଆବେଦନ କରାଯିବ। ଅର୍ଚ୍ଚନା ଓ ଜଗବନ୍ଧୁଙ୍କୁ ଇଡି ରିମାଣ୍ଡରେ ଆଣିପାରେ ବୋଲି କୁହାଯାଉଥିଲା। ହେଲେ ଇଡି ପକ୍ଷରୁ ପ୍ରଥମେ ଅର୍ଚ୍ଚନାଙ୍କୁ ଅଣାଯାଇପାରେ ବୋଲି ସୂଚନା ମିଳିଛି। ଅର୍ଚ୍ଚନାଙ୍କ ରିମାଣ୍ଡ ଅବଧି ସମୟରେ ଶ୍ରଦ୍ଧାଞ୍ଜଳି ବେହେରା, ସିନେ ପ୍ରଯୋଜକ ଅକ୍ଷୟ ପରିଜାଙ୍କୁ ମଧ୍ୟ ଡକାଇ ତ୍ରିମୁଖୀ ଜେରା କରିବାକୁ ଇଡି ଯୋଜନା ରଖିଛି।
ଅପରପକ୍ଷରେ ଶୁକ୍ରବାର ଚଳଚ୍ଚିତ୍ର ପ୍ରଯୋଜକ ପ୍ରମୋଦ ସ୍ବାଇଁଙ୍କୁ ପୁଣି ଥରେ ଦ୍ୱିତୀୟଥର ପାଇଁ ଇଡି ଜେରା କରିଛି। ସେହିପରି ଜମି ମାଲିକ ପ୍ରଭାତ ରଞ୍ଜନ ପତିଙ୍କୁ ମଧ୍ୟ ଇଡି ମାରାଥନ ଜେରା କରିଛି। ଜମି ମାଲିକ ପ୍ରଭାତ ରଞ୍ଜନ ପତିଙ୍କ ଠାରୁ ଅର୍ଚ୍ଚନା ଓ ଖଗେଶ୍ୱର ଜମି କିଣିଥିଲେ। ଏହି ଜମି କାରବାର ଟଙ୍କା କିମ୍ବା ଚେକ୍ରେ ହୋଇଥିଲା, କବଲା ସମୟରେ ଜମିର ପ୍ରକୃତ ମୂଲ୍ୟଠାରୁ କମ୍ ଦରରେ ଜମି କିଣିଥିଲେ କି, ଏଭଳି ବିଭିନ୍ନ ଦିଗକୁ ନେଇ ଇଡି ତାଙ୍କଠାରୁ ତଥ୍ୟ ହାସଲ କରିଛି। ଅନ୍ୟପଟେ ହନିଟ୍ରାପ ମାମଲାରେ ମୋହରା ସାଜିଥିବା ଅର୍ଚ୍ଚନାଙ୍କ ସହଯୋଗୀ ଶ୍ରଦ୍ଧାଞ୍ଜଳିଙ୍କୁ ଇଡି ୨ଥର ଡାକି ଜେରା କରିଛି। ଗତ ନଭେମ୍ବର ୨୩ ଏବଂ ୨୫ରେ ତାଙ୍କୁ ଡାକି ମାରାଥନ ଜେରା କରିବା ସହ ଇଡି ଗୁରୁତ୍ୱପୂର୍ଣ୍ଣ ତଥ୍ୟ ପାଇଥିଲା। ତେବେ ଆଉ କିଛି ଗୁମର ତଥ୍ୟ ଜାଣିବାକୁ ଶ୍ରଦ୍ଧାଞ୍ଜଳିଙ୍କୁ ଇଡି ପକ୍ଷରୁ ବାରମ୍ବାର ନୋଟିସ୍ କରାଯାଉଥିଲେ ମଧ୍ୟ ସେ ଆଉ ଧରାଛୁଆଁ ଦେଉନାହାନ୍ତି। କିଛି ଗୁରୁତ୍ୱପୂର୍ଣ୍ଣ ସୂଚନା ଲୁଚାଇବା ପାଇଁ ଶ୍ରଦ୍ଧାଞ୍ଜଳି ଇଡି କାର୍ଯ୍ୟାଳୟରେ ହାଜର ହେଉନାହାନ୍ତି ବୋଲି ଚର୍ଚ୍ଚା ହେଉଛି। ଯଦି ଶ୍ରଦ୍ଧାଞ୍ଜଳି ଆଗାମୀ ଦିନରେ ହାଜର ନ ହୁଅନ୍ତି ଇଡି ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିପାରେ ବୋଲି ଚର୍ଚ୍ଚା ହେଉଛି।