ଭୁବନେଶ୍ୱର, ୫ା୧୨ (ବ୍ୟୁରୋ): ବହୁଚର୍ଚ୍ଚିତ ବ୍ଲାକ୍ମେଲର୍ ଅର୍ଚ୍ଚନା ନାଗଙ୍କ ବେଆଇନ ଆର୍ଥିକ କାରବାର ଦିଗରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଖୋଳତାଡ ଜାରି ରଖିବା ସହ ଜଣକ ପରେ ଜଣେ ବ୍ୟକ୍ତିଙ୍କୁ ଜେରା କରି ତଥ୍ୟ ହାସଲ କରୁଛି। ଏକାଧିକଙ୍କୁ ବାରମ୍ବାର ଜେରା ସରିଥିବାବେଳେ ମୁଖ୍ୟ ଅଭିଯୁକ୍ତା ଅର୍ଚ୍ଚନାଙ୍କୁ ଏଯାଏ ପଚରାଉଚରା କରିପାରି ନାହିଁ। ସୋମବାର ଅର୍ଚ୍ଚନା କୋର୍ଟରେ ହାଜର ହେବେ। ତେଣୁ ଏହି ସମୟରେ ତାଙ୍କୁ ରିମାଣ୍ଡରେ ଆଣିବାକୁ ଇଡି ପକ୍ଷରୁ ଆବେଦନ କରାଯିବ। ପୂର୍ବରୁ ଅର୍ଚ୍ଚନା ଓ ତାଙ୍କ ସ୍ବାମୀ ଜଗବନ୍ଧୁ ଚାନ୍ଦଙ୍କୁ ଇଡି ରିମାଣ୍ଡରେ ଆଣିପାରେ ବୋଲି କୁହାଯାଉଥିଲା। ହେଲେ ଇଡି ପ୍ରଥମେ ଅର୍ଚ୍ଚନାଙ୍କୁ ରିମାଣ୍ଡରେ ଆଣି ରାଜ୍ୟର ଏହି ବଡ଼ ହନିଟ୍ରାପ ଓ ଆର୍ଥିକ କାରବାରର କଳା ସାମ୍ରାଜ୍ୟ ଉପରୁ ପରଦା ଉଠାଇବାକୁ ଚେଷ୍ଟା କରିବାକୁ ଯୋଜନା କରିଥିବା ସୂଚନା ମିଳିଛି। ତେବେ ଅର୍ଚ୍ଚନାଙ୍କୁ ଇଡି କେତେଦିନ ରିମାଣ୍ଡରେ ଆଣି ଆଉ କ’ଣ ନୂଆ ଗୁମର ଖୋଲିବ ତାହା ଉପରେ ସମସ୍ତଙ୍କ ନଜିର ରହିଛି। ଅର୍ଚ୍ଚନାଙ୍କ ରିମାଣ୍ଡ ସମୟରେ ତାଙ୍କ ହନିଟ୍ରାପ୍ର ମୋହର ଥିବା ଶ୍ରଦ୍ଧାଞ୍ଜଳି ବେହେରା ଓ ସିନେ ପ୍ରଯୋଜକ ଅକ୍ଷୟ ପରିଜାଙ୍କୁ ମଧ୍ୟ ଡକାଇ ତ୍ରିମୁଖୀ ଜେରା କରିବାକୁ ଇଡି ଯୋଜନା ରଖିଛି। ଇଡି ଏପର୍ଯ୍ୟନ୍ତ ୮ରୁ ଅଧିକ ବ୍ୟକ୍ତିଙ୍କୁ ଜେରା କରି ତଥ୍ୟ ହାସଲ କରିଛି। ତେବେ ଆଗକୁ ଅର୍ଚ୍ଚନାଙ୍କ ତଥ୍ୟ ଆଧାର କରି ଇଡି ବହୁ ବଡ଼ବଡ଼ିଆଙ୍କୁ ଜେରା କରିବାର ଆଶଙ୍କା କରାଯାଉଛି। ତେବେ ଏହି ଘଟଣାରେ ଆରମ୍ଭରୁ ସନ୍ଦେହ ଘେରରେ ରହି ଆସିଛି କମିଶନରେଟ ପୋଲିସ। ଅର୍ଚ୍ଚନା ଓ ତାଙ୍କ ସ୍ବାମୀ ଜଗବନ୍ଧୁଙ୍କ କଳା ସାମ୍ରାଜ୍ୟରେ ବହୁ ପ୍ରଭାବଶାଳୀ ତଥା କ୍ଷମତା ଶାଳୀ ନେତା, ମନ୍ତ୍ରୀ, ଅଧିକାରୀ ଓ ବ୍ୟବସାୟୀ ସମ୍ପୃକ୍ତ ଥିବାରୁ ପୋଲିସ ଘଟଣାକୁ ଚପାଇ ଦେଇଥିଲା। ଇଡି ଯଦି କିଛି ନେତାମନ୍ତ୍ରୀ କିମ୍ବା ପ୍ରଶାସନିକ ଅଧିକାରୀଙ୍କୁ ସାମ୍ନାକୁ ଆଣେ ତେବେ ପୋଲିସର ତଦନ୍ତକୁ ନେଇ ପ୍ରଶ୍ନ ଉଠିବ। ଏହାରି ଭିତରେ ଅର୍ଚ୍ଚନାଙ୍କ ରିମାଣ୍ଡକୁ ନେଇ ବିଭିନ୍ନ ମହଲରେ ଚର୍ଚ୍ଚା ହେଉଛି।