ମାଞ୍ଚେଷ୍ଟର, ୨୨|୭ (ଏପି)-କରୋନା ଭାଇରସ୍ ପାଇଁ ଦ୍ୱିତୀୟ ଟେଷ୍ଟରେ ନେଗେଟିଭ୍ ଆସିପରେ ଫାଷ୍ଟ ବୋଲର ଜୋଫ୍ରା ଆର୍ଚର ଓ୍ବେଷ୍ଟଇଣ୍ଡିଜ ବିପକ୍ଷ ତୃତୀୟ ତଥା ନିର୍ଣ୍ଣାୟକ ଟେଷ୍ଟ ପାଇଁ ଇଂଲଣ୍ଡ ଦଳରେ ଯୋଗ ଦେଇଛନ୍ତି। ଗତ ସପ୍ତାହରେ କର୍ତ୍ତୃପକ୍ଷଙ୍କ ବିନା ଅନୁମତିରେ ହୋଭ୍ସ୍ଥିତ ନିଜ ଘରକୁ ଚାଲିଯାଇଥିଲେ। ଏହାଦ୍ୱାରା ସେ ଜୈବସୁରକ୍ଷିତ ନିୟମ ଉଲ୍ଲଂଘନ କରିଥିବାରୁ ତାଙ୍କୁ ଦ୍ୱିତୀୟ ଟେଷ୍ଟ ପାଇଁ ଦଳରୁ ବାଦ୍ ଦିଆଯାଇଥିଲା। ଶୃଙ୍ଖଳା କମିଟି ଆର୍ଚରଙ୍କୁ ୧୫,୦୦୦ ପାଉଣ୍ଡ (୧୯,୦୦୦ ଆମେରିକୀୟ ଡଲାର) ଜରିମାନା କରିଛି। ଦଳରେ ଯୋଗଦାନ ପୂର୍ବରୁ ଏହି ଫାଷ୍ଟ ବୋଲରଙ୍କୁ ଓଲ୍ଡ ଟ୍ରାଫୋର୍ଡସ୍ଥି ଏକ ହୋଟେଲରେ ୫ ଦିନ କ୍ୱାରାଣ୍ଟାଇନରେ ରହିବାକୁ ପଡ଼ିଥିଲା। ସାଉଥାମ୍ପଟନ ଓ ମାଞ୍ଚେଷ୍ଟର ମଧ୍ୟରେ ଯାତ୍ରା ବେଳେ ଜଣେ ଅଜ୍ଞାତ ବ୍ୟକ୍ତିଙ୍କ ସଂସ୍ପର୍ଶରେ ଆସିଥିବାରୁ ଆର୍ଚରଙ୍କ କରୋନା ଟେଷ୍ଟ ଜରୁରି ଥିଲା। ସେ ଦଳରେ ଯୋଗଦେବା ଦ୍ୱାରା ଶୁକ୍ରବାର ମାଞ୍ଚେଷ୍ଟରରେ ଆରମ୍ଭ ହେବାକୁଥିବା ସିରିଜର ନିର୍ଣ୍ଣାୟକ ମ୍ୟାଚ୍ ପାଇଁ ଇଂଲଣ୍ଡର ସମ୍ପୂର୍ଣ୍ଣ ୬ଜଣ ସିମ୍ ବୋଲର ଉପଲବ୍ଧ ହେବେ।
