ମାଞ୍ଚେଷ୍ଟର,୧୬।୭(ପି.ଟି.): ଗୁରୁବାରଠାରୁ ଆରମ୍ଭ ହୋଇଥିବା ଓ୍ବେଷ୍ଟଇଣ୍ଡିଜ୍ ବିପକ୍ଷ ଦ୍ୱିତୀୟ ଟେଷ୍ଟ ମ୍ୟାଚ୍ରୁ ଇଂଲଣ୍ଡ ଯୁବ ଦ୍ରୁତ ବୋଲର ଜୋଫ୍ରା ଆର୍ଚର ବାଦ୍ ପଡିଛନ୍ତି। ଦଳର ଜୈବ ନିରାପତ୍ତା ନିୟମ ବା ପ୍ରୋଟୋକଲର ଉଲ୍ଲଂଘନ କରିଥିବାରୁ ତାଙ୍କୁ ଦଳରୁ ବାଦ୍ ଦିଆଯାଇଛି। ଏବେ ସେ ୫ ଦିନ ସେଲ୍ଫ ଆସୋଲେଶନରେ ରହିବେ ଓ ଏହି ସମୟରେ ତାଙ୍କର କୋଭିଡ୍-୧୯ ଟେଷ୍ଟ ମଧ୍ୟ କରାଯିବ ବୋଲି ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ତରଫରୁ କୁହାଯାଇଛି। ଅବଶ୍ୟ ଏଥିପାଇଁ ଆର୍ଚର କ୍ଷମା ମାଗିଛନ୍ତି। ନିଜ ଆଚରଣ ପାଇଁ ଦୁଃଖିତ ଓ ମୋ ପାଇଁ ଦଳ ଓ ପୂରା ଟିମ୍ ମ୍ୟାନେଜମେଣ୍ଟ ବିପଦରେ ପଡିଛି ବୋଲି ସେ କହିଛନ୍ତି। ଆର୍ଚର ଗତ ସୋମବାର ବ୍ରିଜ୍ଟାଉନ୍ସ୍ଥିତ ନିଜ ଘରକୁ ଯାଇଥିଲେ। ଏହା ପ୍ରୋଟୋକଲର ଉଲ୍ଲଂଘନ ବୋଲି ଇସିବି ତରଫରୁ କୁହାଯାଇଛି।
କୋଭିଡ୍-୧୯ ମହାମାରୀ ସତ୍ତ୍ୱେ ସାଉଥାମ୍ପଟନରେ ଇଂଲଣ୍ଡ ଓ ଭ୍ରମଣକାରୀ ଓ୍ବେଷ୍ଟଇଣ୍ଡିଜ୍ ମଧ୍ୟରେ ପ୍ରଥମ ଟେଷ୍ଟ ସଫଳତାର ସହ ଆୟୋଜନ ହୋଇଥିଲା। ଏଥିରେ ଓ୍ବେଷ୍ଟଇଣ୍ଡିଜ ବିଜୟ ଲାଭ କରିଥିଲା। ଇଂଲଣ୍ଡ ୩ ମ୍ୟାଚ୍ ବିଶିଷ୍ଟ ଏହି ସିରିଜରେ ୧-୦ରେ ପଛରେ ପଡିଥିବା ବେଳେ ଦଳରୁ ଆର୍ଚର ବାଦ୍ ପଡିବା ଇଂଲଣ୍ଡ ପାଇଁ ଏକ ଝଟ୍କା ସଦୃଶ ହୋଇଛି। ବାର୍ବାଡୋସ୍ ଜନ୍ମିତ ୨୫ ବର୍ଷୀୟ ଆର୍ଚର ଏପର୍ଯ୍ୟନ୍ତ ଇଂଲଣ୍ଡ ପକ୍ଷରୁ ପ୍ରତିନିଧିତ୍ୱ କରି ୮ ଟେଷ୍ଟ, ୧୪ ଦିନିକିଆ ଓ ଗୋଟିଏ ଅନ୍ତର୍ଜାତୀୟ ଟି୨୦ ମ୍ୟାଚ୍ ଖେଳିଛନ୍ତି। ଛୋଟିଆ କ୍ୟାରିୟରରେ ସେ ୫୮ଟି ଅନ୍ତର୍ଜାତୀୟ ଉଇକେଟ ଅକ୍ତିଆର କରି ଉଲ୍ଲେଖନୀୟ ସଫଳତା ଅର୍ଜନ କରିଛନ୍ତି।