ମଥୁରାରେ ମାତିଲେ ଚୋର
ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ଦୀର୍ଘ ୧୧ଦିନ ଧରି ଚାଲିଥାଏ। ବିଶ୍ୱ ପ୍ରସିଦ୍ଧ କୁହାଯାଉଥିବା ଏହି ମହୋତ୍ସବରେ ଦର୍ଶକଙ୍କ ଭିଡ଼ ମଧ୍ୟ ପରିଲକ୍ଷିତ ହୋଇଥାଏ। ଏଥିପାଇଁ ମହୋତ୍ସବ ଚାଲିଥିବାବେଳେ ମଥୁରାନଗରୀରେ ବ୍ୟାପକ ପୋଲିସ ମୁତୟନ କରାଯାଏ। ଏଥର ମଧ୍ୟ ସେଭଳି ବ୍ୟବସ୍ଥା କରାଯାଇଛି। ସିସିଟିଭି ସର୍ଭିଲାନ୍ସରେ ପ୍ରମୁଖ ମଞ୍ଚ, ଛକ ରହିଛି। ଏହାସତ୍ତ୍ବେ ମଥୁରାନଗରୀରେ ଚୋରଙ୍କ ଦୌରାତ୍ମ୍ୟ ବଢ଼ି ଚାଲିଛି। ଅତାବିରା ଥାନା ଖଲିଆପାଲି ଗ୍ରାମର ଅମିତ ନାଗ ରଙ୍ଗମହଲ ପାର୍ଶ୍ୱସ୍ଥ ରାସ୍ତାକଡ଼ରେ ତାଙ୍କ ବାଇକ୍ (ନଂ.ଓଡ଼ି୧୭ଏଚ୍/୧୨୧୫)କୁ ଲକ୍ କରି ରଖିଥିଲେ ଏବଂ ସାଙ୍ଗସାଥୀଙ୍କ ସହିତ ଯାତ୍ରା ଉପଭୋଗ କରୁଥିଲେ। ସେ ଯାତ୍ରା ଦେଖି ସାରି ବାଇକ୍ ରଖିଥିବା ସ୍ଥାନକୁ ଆସିବାବେଳେ ଆଉ ବାଇକ୍ ନ ଥିଲା। ସେତେବେଳକୁ ଚୋର ବାଇକ୍ ଚୋରି କରି ସେଠାରୁ ଛୁ ମାରି ସାରିଥିଲେ। ତେବେ ଏହା କେବଳ ଗୋଟିଏ ଘଟଣା ହୋଇଥିବାବେଳେ ଲୋକେ ମୋବାଇଲ ଲୁଟ୍ପାଟ୍ ସହିତ ଅନୁରୂପ ଚୋରିର ସମ୍ମୁଖୀନ ହେଉଥିବା ସାଧାରଣରେ ଆଲୋଚନା ହେଉଛି ।
ଜଗନ୍ନାଥ ଉଚ୍ଚାରଣ କରିବାରୁ ଜରିମାନା
ରାଜ୍ୟ ହସ୍ତତନ୍ତ ଓ ବୟନ ଶିଳ୍ପ ମନ୍ତ୍ରୀ ରୀତା ସାହୁ ଗୁରୁବାର ରାତିରେ କଂସ ଦରବାରରେ ରାଜ ଅତିଥି ଭାବେ ଯୋଗଦାନ କରିଥିଲେ। ତେବେ ମଥୁରାଧିପତିଙ୍କ ଆଦେଶ ପାଇ ମଥୁରାବାସୀଙ୍କ ଉଦ୍ଦେଶ୍ୟରେ ସେ କିଛି ଉଦ୍ବୋଧନ ଦେଇଥିଲେ। ମନ୍ତ୍ରୀ ସାହୁ ତାଙ୍କ ଉଦ୍ବୋଧନରେ ଜଗନ୍ନାଥ ଏକ୍ସପ୍ରେସ ଶୁଭାରମ୍ଭ କଥା କହି ରାଜ୍ୟ ସରକାରଙ୍କ ଗୁଣଗାନ କରିଥିଲେ। ମାତ୍ର ତାହା ଶୁଣିବା ମାତ୍ରେ କଂସ ମହାରାଜ ରାଗରେ ଜର୍ଜରିତ ହୋଇ ପଡ଼ିଥିଲେ। କାହିଁକି ଜଗନ୍ନାଥ ନାମ ଉଚ୍ଚାରଣ କରୁଛନ୍ତି କହି ମନ୍ତ୍ରୀ ସାହୁଙ୍କୁ ତାଗିଦ୍ କରିଥିଲେ ଏବଂ ସେଥିପାଇଁ ୭୦ଲକ୍ଷ ସ୍ବର୍ଣ୍ଣମୁଦ୍ରା ଜରିମାନା କରିଥିଲେ। କଂସ ଦରବାରରେ ଏହି ଦୃଶ୍ୟାଭିନୟଟି ଦର୍ଶକ ମହଲରେ ବେଶ୍ ରୋଚକ ହୋଇଥିଲା ।
ବାଟେଘାଟେ ଆତ୍ମଘୋଷିତ ନିର୍ଦ୍ଦେଶକ
କୁହାଯାଏ ବରଗଡ଼ ଧନୁଯାତ୍ରା ମହୋତ୍ସବର ପାଣ୍ଡୁଲିପି ନାହିଁ। ସେହିପରି କେହି ନିର୍ଦ୍ଦେଶକ ନାହାନ୍ତି ବୋଲି ମଧ୍ୟ ମହୋତ୍ସବ ସମିତିର କର୍ମକର୍ତ୍ତା କୁହନ୍ତି। ଏହାସତ୍ତ୍ବେ ମହୋତ୍ସବରେ ଅନେକ ଆତ୍ମଘୋଷିତ ନିର୍ଦ୍ଦେଶକ ଥିବା ବାଟେଘାଟେ ପରିଲକ୍ଷିତ ହୋଇଥାଏ। କଂସଙ୍କ ମଥୁରା ଭ୍ରମଣ ହେଉ, ବେନିଭାଇଙ୍କ ଗୋପପୁର ପରିକ୍ରମା କିମ୍ବା ଅନ୍ୟ କିଛି ଦୃଶ୍ୟାଭିନୟରେ ମହୋତ୍ସବର ବିଭିନ୍ନ ଚରିତ୍ରକୁ ଓହ୍ଲାଇଥିବା କଳାକାରଙ୍କୁ ସମ୍ପୃକ୍ତ ଆତ୍ମଘୋଷିତ ନିର୍ଦ୍ଦେଶକମାନେ ସେଭଳି ନିର୍ଦ୍ଦେଶନା ଦେଉଥିବା ଭଳି ମନେ ହୁଏ। ଏପରିକି କିଛି କଳାକାର ମଧ୍ୟ ସେଭଳି ନିର୍ଦ୍ଦେଶକଙ୍କ ବୋଲ ମାନୁଥିବା ଏବଂ ତାର ଦୃଶ୍ୟ କ୍ୟାମେରା, ମୋବାଇଲରେ କଏଦ ହେବା ସାଙ୍ଗକୁ ସୋସିଆଲ ମିଡ଼ିଆରେ ଲାଇଭ୍ ହେଉଥିବା ମଧ୍ୟ ଦେଖିବାକୁ ମିଳୁଛି। ଏହାଦ୍ୱାରା ସମ୍ପୃକ୍ତ ଆତ୍ମଘୋଷିତ ନିର୍ଦ୍ଦେଶକଙ୍କ ଯୋଗୁ ଧନୁଯାତ୍ରାର ଗାରିମା କ୍ଷୂର୍ଣ୍ଣ ହେଉଛି ବୋଲି ଲୋକେ କୁହାକୁହି ହେଉଛନ୍ତି ।