ଗ୍ବାଟେମାଲା ସିଟି,୨୨।୪(ପି.ଟି.): ଦୀର୍ଘ ଦୁଇବର୍ଷ ପରେ ଆର୍ଚେରୀ ବିଶ୍ୱକପ୍କୁ ପ୍ରତ୍ୟାବର୍ତ୍ତନ କରି ଭାରତୀୟ ରିକର୍ଭ ଆର୍ଚରମାନେ ଦମ୍ଦାର ପ୍ରଦର୍ଶନ କରିଛନ୍ତି। କ୍ୱାଲିଫିକେଶନ ରାଉଣ୍ଡରେ ଭାରତୀୟ ମହିଳା ରିକର୍ଭ ଟିମ୍ ଶୀର୍ଷରେ ରହିଛି। ଅଙ୍କିତା ଭକତ ଓ ଦୀପିକା କୁମାରୀ ପ୍ରାରମ୍ଭିକ ପର୍ଯ୍ୟାୟରେ ଦମ୍ଦାର ପ୍ରଦର୍ଶନ କରିଛନ୍ତି। ପୁରୁଷ ଓ ମହିଳା ଟିମ୍ ଇଭେଣ୍ଟରେ ଭାରତ କ୍ୱାର୍ଟର ଫାଇନାଲରେ ପ୍ରବେଶ କରିଛି। ୩ଟି ଇଭେଣ୍ଟରେ ଭାରତୀୟ ତୀରନ୍ଦାଜମାନେ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି।
ଅତନୁ ଦାସ ବିଶ୍ୱର ୧ ନମ୍ବର ତୀରନ୍ଦାଜ ବ୍ରାଡି ଏଲିସନଙ୍କ ପଛରେ ରହି ଦ୍ୱିତୀୟ ସ୍ଥାନ ଅଧିକାର କରିଛନ୍ତି। ତାଙ୍କ ପ୍ରଦର୍ଶନ ବଳରେ ଭାରତୀୟ ଦଳ ତୃତୀୟ ସ୍ଥାନରେ ରହି ଅଭିଯାନ ଶେଷ କରିଛି। ମିକ୍ସଡ ସେକ୍ସନରେ ଅତନୁ ଓ ଦୀପିକା ଏକାଠି ପ୍ରତିଯୋଗିତାରେ ଭାଗନେବେ। ଗତବର୍ଷ ଦୁହେଁ ବିବାହ କରିଥିଲେ। ଟୋକିଓ ଅଲିମ୍ପିକ୍ସ ପାଇଁ ଏହି ଟୁର୍ନାମେଣ୍ଟ ପ୍ରସ୍ତୁତିରେ ବେଶ୍ ସହାୟ ହେବ। କୋଭିଡ୍-୧୯ ମହାମାରୀ ପାଇଁ ଏହି ପ୍ରତିଯୋଗିତା ଗୋଟିଏ ବର୍ଷ ଆୟୋଜନ ହୋଇପାରି ନ ଥିଲା। ଇତିମଧ୍ୟରେ ୧୮ ମାସ ବିତିଯାଇଥିଲେ ମଧ୍ୟ ମସ୍କୋରେ ଆର୍ଚେରୀ ବିଶ୍ୱକପ୍ ଆୟୋଜନ ହୋଇପାରିନାହିଁ।
