ଦୋହା, ୨।୧୨:ପ୍ରାରମ୍ଭିକ ବିପର୍ଯ୍ୟୟକୁ ଏଡ଼ାଇ ଆର୍ଜେଣ୍ଟିନା ଚଳିତ ଫିଫା ବିଶ୍ୱକପର ନକ୍ଆଉଟରେ ପ୍ରବେଶ କରିଛି। ନିଜର ପ୍ରଥମ ମ୍ୟାଚରେ ସାଉଦି ଆରବଠାରୁ ହାରିବାପରେ ଦ୍ୱିତୀୟ ମ୍ୟାଚରେ ମେକ୍ସିକୋକୁ ହରାଇ ସଫଳ ପ୍ରତ୍ୟାବର୍ତ୍ତନ କରିଥିବା ଲିଓନେଲ ମେସିଙ୍କ ଦଳ ବୁଧବାର ଅନ୍ତିମ ଲିଗ୍ ମ୍ୟାଚରେ ପୋଲାଣ୍ଡକୁ ୨-୦ ଗୋଲରେ ପରାସ୍ତ କରି ରାଉଣ୍ଡ ଅଫ୍ ୧୬ରେ ପ୍ରବେଶ କରିଛି। ପରାଜିତ ହୋଇଥିଲେ ହେଁ ଏହି ଗ୍ରୁପ୍ରୁ ଅନ୍ୟତମ ଦଳଭାବେ ପୋଲାଣ୍ଡ ନକ୍ଆଉଟରେ ପହଞ୍ଚତ୍ଛି। ଏହି ଗ୍ରୁପ୍ର ଅନ୍ୟଏକ ମ୍ୟାଚରେ ମେକ୍ସିକୋ ୨-୧ ଗୋଲରେ ସାଉଦି ଆରବକୁ ପରାସ୍ତ କରିଛି। ତେବେ ଏହି ବିଜୟ ମେକ୍ସିକୋକୁ ନକ୍ଆଉଟକୁ ନେବାରେ ସହାୟକ ହୋଇ ପାରିନାହିଁ। କାରଣ ଉଭୟ ପୋଲାଣ୍ଡ ଓ ମେକ୍ସିକୋ ୩ ମ୍ୟାଚରୁ ୪ ପଏଣ୍ଟ ଲେଖାଏ ଗ୍ରୁପ୍ ପର୍ଯ୍ୟାୟ ଶେଷ କରିଛନ୍ତି। ତେବେ ଗୋଲ ବ୍ୟବଧାନରେ ପୋଲାଣ୍ଡ ଆଗକୁ ବଢ଼ିଛି।
ପେନାଲ୍ଟି ମିସ୍କଲେ ମେସି
୩୫ତମ ମିନିଟରେ ଆଲ୍ଭାରେଜଙ୍କ ଶଟ୍କୁ ସେଭ୍ କରିବାକୁ ଯାଇ ପୋଲାଣ୍ଡ ଗୋଲକିପର ଜେକ୍ଜେସନି ଫାଉଲ୍ କରିଥିଲେ। ରେଫରି ଭାର୍ (ଭିଡିଓ ଆସିଷ୍ଟାଣ୍ଟ ରେଫରି) ଚେକ୍ କରିବାପରେ ଆର୍ଜେଣ୍ଟିନାକୁ ସ୍ପଟ୍ କିକ୍ ସୁଯୋଗ ଦେଇଥିଲେ। ମାତ୍ର ମେସି ନିରାଶ କରିଥିଲେ। ତାଙ୍କ ଶଟ୍କୁ ଜେକ୍ଜେସ୍ନି ଦକ୍ଷତାର ସହ ସେଭ୍ କରି ଦେଇଥିଲେ। ଦ୍ୱିତୀୟାର୍ଦ୍ଧ ଆରମ୍ଭରେ ଅର୍ଥାତ୍ ୪୭ତମ ମିନିଟରେ ମୋଲିନାଙ୍କଠାରୁ ପାଇଥିବା ପାସ୍କୁ ଗୋଲରେ ପରିଣତ କରି ଆଲେକ୍ସିସ ମ୍ୟାକ ଆଲିଷ୍ଟର ଆର୍ଜେଣ୍ଟିନାକୁ ଅଗ୍ରଣୀ ଦେଇଥିଲେ। ୬୭ତମ ମିନିଟରେ ଜୁଲିଆନ ଆଲଭାରେଜ ଗୋଲ ଦେଇ ଆର୍ଜେଣ୍ଟିନାର ବିଜୟକୁ ନିଶ୍ଚିତ କରି ଦେଇଥିଲେ।
ମେକ୍ସିକୋ ୨, ସାଉଦି ଆରବ ୧
ମେକ୍ସିକୋ-ସାଉଦି ଆରବ ମ୍ୟାଚ ସଂଘର୍ଷପୂର୍ଣ୍ଣ ରହିଥିଲେ ହେଁ ପ୍ରଥମାର୍ଦ୍ଧ ଗୋଲଶୂନ୍ୟ ରହିଥିଲା। ତେବେ ଦ୍ୱିତୀୟାର୍ଦ୍ଧ ଆରମ୍ଭରେ ମେକ୍ସିକୋ ଏକ ଗୋଲ ସ୍କୋର କରି ସାଉଦି ଆରବ ଉପରେ ଚାପ ପକାଇଥିଲା। ୪୭ତମ ମିନିଟରେ ହେନରି ମାର୍ଟିନ ଗୋଲ ସ୍କୋର କରିଥିଲେ। ୫୨ତମ ମିନିଟରେ ଲୁଇସ କାଭେଜ ଆଉ ଏକ ଗୋଲ ଦେଇ ମେକ୍ସିକୋର ଅଗ୍ରଣୀ ବ୍ୟବଧାନକୁ ୨-୦ରେ ପହଞ୍ଚାଇଥିଲେ। ୯୦+୫ ମିନିଟରେ ସାଉଦି ଆରବର ସଲିମ ଅଲଦାଓସାରି ଗୋଟିଏ ଗୋଲ ପରିଶୋଧ କରିଥିଲେ।
