ମୁମ୍ବାଇ,୬।୯: ବଲିଉଡ୍ ନାୟକ ଅର୍ଜୁନ କପୁର କରୋନାରେ ପୀଡିତ ହୋଇଥିବା ଜଣାପଡିଛି। ସେ ନିଜେ ଟୁଇଟ୍ କରି ଏହି ସୂଚନା ଦେଇଛନ୍ତି। ଅର୍ଜୁନ ଲେଖିଛନ୍ତି ମୁଁ ଏବେ କରୋନାରେ ପୀଡ଼ିତ। ତେବେ ଏହି ଖବର ଆପଣମାନଙ୍କୁ ଜଣାଇବା ମୋର କର୍ତ୍ତବ୍ୟ ଭାବି ମୁଁ ଏହା ଜଣାଉଛି। ଏବେ ସେ ସୁସ୍ଥ ଅନୁଭବ କରୁଛନ୍ତି ଓ ଡାକ୍ତରଙ୍କ ପରାମର୍ଶ କ୍ରମେ ହୋମ କ୍ୱାରାଣ୍ଟାଇନରେ ଥିବା କହିଛନ୍ତି। ତାଙ୍କ ପାଖରେ ସାମାନ୍ୟ ଲକ୍ଷଣ ଦେଖାଦେଇଥିବା ବେଳେ ସେ ଖୁବ୍ଶୀଘ୍ର ସୁସ୍ଥ ହୋଇଯିବେ ବୋଲି ଆଶା ରଖିଛନ୍ତି। ପ୍ରଶଂସକଙ୍କ ପ୍ରାର୍ଥନା ପାଇଁ ସେ ଆଗୁଆ ଧନ୍ୟବାଦ ଜଣାଇଛନ୍ତି। ତେବେ ତାଙ୍କ ସ୍ବାସ୍ଥ୍ୟ ସମ୍ପର୍କୀତ ସମସ୍ତ ଖବର ସେ ଆଗକୁ ଶେୟାର କରିବେ ବୋଲି କହିଛନ୍ତି। ବର୍ତ୍ତମାନ ଏକ ଅଦ୍ଭୁତ ସମୟ ଚାଲିଛି ତେବେ ମାନବିକତା ଆଗରେ ଭାଇରସ ହାର ମାନିବ ବୋଲି ମଧ୍ୟ ଅର୍ଜୁନ ଲେଖିଛନ୍ତି। ସୂଚନାଯୋଗ୍ୟ, କରୋନା ଭାଇରସ ପ୍ରତିଦିନ ଦେଶରେ ରେକର୍ଡ ପରେ ରେକର୍ଡ ସୃଷ୍ଟି କରୁଥିବା ବେଳେ ସାଧାରଣ ଜନତାଙ୍କଠାରୁ ଆରମ୍ଭ କରି ରାଜନେତା, ସେଲିବ୍ରିଟି ସମସ୍ତଙ୍କ ଘରେ ପହଞ୍ଚି ସାରିଲାଣି। ବଲିଉଡ୍ ମହାନାୟକ ଓ ତାଙ୍କ ପରିବାରର ୪ ସଦସ୍ୟ ପୂର୍ବରୁ କରୋନାରେ ପୀଡ଼ିତ ହୋଇ ସୁସ୍ଥ ହୋଇ ସାରିଥିବା ବେଳେ ଏବେ କପୁର ପରିବାର ପହଞ୍ଚିଛି କରୋନା ଭାଇରସ।