ମୁମ୍ବାଇ, ୧୬ା୧ (ପି.ଟି.)-ଆଇକନିକ ପୂର୍ବତନ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କ ପୁଅ ତଥା ଉଦୀୟମାନ ବାମହାତୀ ପେସ୍ ବୋଲର ଅର୍ଜୁନ ତେନ୍ଦୁଲକର ଶୁକ୍ରବାର ମୁମ୍ବାଇ ସିନିୟର ଦଳରୁ ତାଙ୍କ ପଦାର୍ପଣ ମ୍ୟାଚ ଖେଳିଛନ୍ତି। ଚଳିତ ସୟଦ ମୁସ୍ତାକ ଅଲୀ ଟ୍ରଫିର ହରିୟାଣା ବିପକ୍ଷ ଏହି ମ୍ୟାଚରେ ମୁମ୍ବାଇ ୮ ଉଇକେଟରେ ପରାଜିତ ହୋଇଛି। ସ୍ଥାନୀୟ ବିକେସି ଗ୍ରାଉଣ୍ଡରେ ଅନୁଷ୍ଠିତ ଏହି ଏଲିଟ୍ ଇ’ ଲିଗ୍ ମ୍ୟାଚରେ ମୁମ୍ବାଇ ଦଳ ପ୍ରଥମେ ବ୍ୟାଟିଂ କରିବାକୁ ଯାଇ ୧୪୩ ରନ କରିଥିଲା। ହରିୟାଣା ୧୭.୪ ଓଭରରେ ବିଜୟ ଲକ୍ଷ୍ୟ ଅତିକ୍ରମ କରିଯାଇଥିଲା। ଅର୍ଜୁନଙ୍କ ବୋଲିଂ ପ୍ରଭାବହୀନ ଥିଲା। ସେ ତାଙ୍କ ୩ ଓଭର ବୋଲିଂରେ ୩୪ ରନ ଦେଇ ଗୋଟିଏ ଉଇକେଟ ଅକ୍ତିଆର କରିଥିଲେ। ହରିୟାଣା ଓପନର ଚଇତ୍ୟ ବିଷ୍ଣୋଇ (୪)ଙ୍କୁ ଉଇକେଟକିପର ଆଦିତ୍ୟ ତାରେଙ୍କ ଦ୍ୱାରା କ୍ୟାଚ ଆଉଟ କରିଥିଲେ। ମୁମ୍ବାଇ ସିନିୟର ଦଳ ତରଫରୁ ଏହା ତାଙ୍କର ପ୍ରଥମ ଉଇକେଟ। ଘଟଣାକ୍ରମେ ତାଙ୍କ କିମ୍ବଦନ୍ତୀ ପିତା ୨୦୧୩ରେ ହରିୟାଣା ବିପକ୍ଷରେ ତାଙ୍କର ଶେଷ ରଣଜୀ ଟ୍ରଫି ମ୍ୟାଚ ଖେଳିଥିଲେ। ମୁମ୍ବାଇ ଦଳ ୧୯.୩ ଓଭରରେ ଅଲଆଉଟ ହୋଇଯିବାରୁ ଅର୍ଜୁନ ଗୋଟିଏ ହେଲେ ବଲ୍ ସାମ୍ନା କରିବା ସୁଯୋଗ ପାଇ ନ ଥିଲେ।